

D2200

@##། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ནཎི་ཨཱརྱ་ནཱ་མ་ཏནྟྲ་ཊཱི་ཀཱ། བོད་སྐད་དུ། འཕགས་པ་ལག་ན་རྡོ་རྗེ་གོས་སྔོན་པོ་ཅན་ཞེས་བྱ་བའི་རྒྱུད་ཀྱི་རྣམ་པར་བཤད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བདེན་པ་གཉིས་ལ་རབ གནས་ཤིང་།།ཐབས་དང་ཤེས་རབ་ཟུང་འབྲེལ་པའི། །མགོན་པོ་སྒྲིབ་པ་ཀུན་སྤངས་ཡོན་ཏན་མ་ལུས་ཀུན་གྱི་བདག་པོ་དེ། །ཤེས་རབ་ཐབས་ཀྱིས་མྱ་ངན་མཐའ་སྤངས་ནས། །སྙིང་རྗེ་ཆེན་པོས་སེམས་ཅན་མུན་འཐིབས་པ། །མུན་མ་མཐོང་སྒོམ་རྩ་བ་ཉོན་མོངས་ཞི་མཛད་པ། ། གསང་སྔགས་སྡུད་མཛད་མི་གཡོ་བཅོམ་ལྡན་འདས། །ཐུགས་རྗེ་བསྙེལ་བ་མེད་ལ་ཕྱག་འཚལ་ལོ། །གང་གིས་གསལ་བར་བྱས་པ་དེ་རྣམས་བྱས་པ་མ་ཡིན་ཚིག་དོན་སྐྱོན་དང་ལྡན། །དེ་ནས་འདིར་ནི་གསང་བ་དོན་ལས་དགའ་བ་སྐྱེས། །ཚིག་གི་སྐྱོན་བྲལ་མན་ངག་ཉམས དང་ལྡན།།ཤཱཀྱའི་རིགས་ཀྱི་མན་ངག་དོན་ལྡན་རྒྱས་པར་བསྟན་པ་ལས། །ཤེས་རབ་དམིགས་མ་ཕྱེད་པས་བཤད་ཟིན་བསྟན་པ་དག་།དེ་དག་སྨན་འགྱུར་འདིར་ནི་གསལ་བར་བྱས། །དེས་ནི་ཉི་ཟླ་དག་དང་མཐུན་པའི་དམ་ཆོས་འདི། །ཐུགས་རྗེ་ཉེ་བར་བསྔོས་པ་ཡིས། ། སྙིང་རྗེ་ལྡན་པའི་སེམས་ཀྱིས་སུ། །རྩ་རྒྱུད་མན་ངག་བཤད་པར་བྱ། །རྩ་རྒྱུད་རང་བཞིན་དོན་རྣམས་ལ། །སྡེ་ཚན་ལྔ་ལྔ་ཉི་ཤུ་ལྔ། །ཡ་ཤ་མཐའ་བཅས་རྩ་བ་ལྡན། །ཐབས་དང་ཤེས་རབ་ཡི་གེ་གཉིས་ལྡན་གསུམ་དུ་འདུས། །བརྗོད་བྱ་རྟོགས་བྱེད་ཚིག་གི་དོན། །རྩ་བ་བཤད་དང ཚིག་གི་དོན་ཕྱིར་མ།།ཕྱི་མ་མཆོག་དང་མ་ལོག་བཞི་རུ་སྟོན། །བཅོམ་ལྡན་རྡོ་རྗེ་འཆང་ཆེན་པོས། །འོག་མིན་ཆོས་དབྱིངས་ཕ་བྲང་དུ། །རྫོགས་པའི་སངས་རྒྱས་དེར་སངས་རྒྱས། །སྤྲུལ་པ་པོ་ནི་འདིར་སངས་རྒྱས། །མ་ལུས་པ་ཡི་སྟོབས་ཀྱིས་སུ། །སྐུ་དེ་རྣམ་པ་གསུམ་ གྱི་དོན།།ཐོབ་བྱེད་རྒྱུ་འབྲས་གཉིས་ཀྱི་ལམ། །དངོས་བྱེད་འབྲས་བུའི་ལམ་ཡིན་ཏེ། །རྒྱུ་ནི་ཚིག་དེ་དྲན་སོགས་པའི། །ཕྱིར་ཞིང་དྲོ་བའི་རང་བཞིན་ཏེ། །ཉོན་མོངས་མ་ཚིག་ཞི་རྩེ་མོའོ། །ཕྱིར་མི་ལྡོག་དང་འཇིག་རྟེན་མཐར་སྟོབས་ལྔ། །དབང་པོ་ལྔ་ཡི་རང་བཞིན་ནོ། །བྱང་ཆུབ་ཡན་ ལག་བདུན་པོ་ནི།།མཐོང་ལམ་སྐད་ཅིག་བཅུ་དྲུག་གོ། །ས་དང་བསྒོམ་ལམ་མཐར་ཕྱིན་འབྲས་བུའོ། །དངོས་བྱེད་ལམ་ནི་འབྲས་བུ་སྔགས། །བྱེན་གྱིས་བརླབས་པས་སྔགས་མཐུ་ཡོན་ཏན་ནོ། །ལམ་མ་བགྲོད་པས་འབྲས་བུ་མེད། །དཔེར་ན་གྲུ་གཟིངས་བསྐྱོད་པ་ཡིས། །རིན་ ཆེན་མཆོག་ནི་ཐོབ་པར་འགྱུར།།བརྗོད་བྱ་སྟོན་པའི་ཚིག་གིས་ཀྱང་། །འབྲས་བུ་བདེན་པ་མྱུར་དུ་འབྱིན། །དེས་ན་སྔགས་ནི་གསང་སྔགས་ལམ། །ལམ་མ་བགྲོད་པར་གསལ་བྱེད་འགྱུར། །དེས་ན་བརྗོད་བྱའི་ཁྱད་ཀྱི་ནུས་པ་ཡིན་ནོ། །འདི་སྐད་ལ་སོགས་པ་བཤད་པ་མཛེས་པར་ བྱ་བའི་ཕྱིར།རྒྱུད་འདི་པར་བརྗོད་བྱ་དང་། དགོས་པ་དང་། འབྲེལ་པ་དང་། མཆོག་གི་དགོས་པ་བསྟན་པར་བྱ་སྟེ། བརྗོད་བྱ་དངོས་པོ་མེད་པའི་ཚིག་ནི་བསྟན་ཀྱང་རྟོགས་པ་སྔོན་དུ་གཏོང་བ་རྣམས་འཇུག་པར་མི་འགྱུར་ཏེ། དུང་ལ་དཀར་པོ་སྤྱི་ནི་འཇུག་གི་བྱེ་བྲག་ལ་འཁྲུལ་ པ་བཞིན་ནོ།།དེས་ན་སྐྱོན་ཡོད་པའི་ཕྱིར་ཆོས་ཀྱི་རྗེས་སུ་འབྲང་བ་རྣམས་མི་འཇུག་གོ། །དེས་ན་བྱིས་པ་དང་སྨྱོན་པ་དང་མཆོག་ཡིན་ཞིང་གཞན་ལ་སོགས་པ་ནི་དགོས་པ་མེད་སྙམ་པའམ། འདི་ཉིད་ཀྱི་མ་ཡིན་སྙམ་པས་མི་འཇུག་སྟེ། ཚིག་དང་དོན་ཐམས་ཅད་ཀྱི་འབྲེལ་པ་དང་། བརྗོད་བྱ་དང་། དགོས་པ་དང་། དགོས་པའི་ཡང་དགོས་པ་རྣམས་གཏན་ལ་ཕབ་པ་སྔོན་དུ་བྱས་ནས་མཆོད་པས་ན།འདི་ཉིད་འབྲེལ་པ་ལ་སོགས་པ་ཡང་བརྗོད་པར་བྱའོ། །དེ་བཞིན་དུ་འབྲེལ་པ་དང་བརྗོད་པ་བཤད་པར་ཅིས་ཏེ་མི་བྱ། སྨྱོན་པའི་ཚིག་བཞིན དུ་མི་འབྲེལ་པའམ།མོ་གཤམ་ལ་སོགས་པ་ལ་དོན་མེད་པར་འདོད་པའི་ཞེན་པས་ཚིག་ཆད་པར་འགྱུར་བས་མ་ནིང་གི་གཟུགས་ལ་ཞེན་པའི་འདོད་པ་རྣམས་ཅི་ནས་ཀྱང་ཚིག་ཆད་པར་འགྱུར་ཞེས་བརྟགས་ནས་འཇུག་པར་མི་འགྱུར་བ་ཉིད་དོ། །དེ་བས་ན་འཇུག་པའི་ཡན་ ལག་གི་གཙོ་བོ་ཡིན་པའི་ཕྱིར་ཏེ།ཐོག་མ་ཉིད་དུ་དགོས་པ་བརྗོད་པར་བྱའོ། །དེ་གང་ལས་ཤེས་པར་བྱ་བའི་ཕྱིར། དགོས་པ་དང་འབྲེལ་པ་བརྗོད་པར་བྱ་བ་ཡང་བསྟན་ཏོ། །དེ་ནས་དགོས་པའི་དགོས་པ་ལ་སོགས་པ་བསྟན་ཏོ། །བརྗོད་བྱ་ཇི་ལྟ་བུ་སྙམ་པ་ལ། འདི་ལྟར་ལམ་ དང་འབྲས་བུ་བརྗོད་བྱའི་འབྲས་བུར་རྟོག་ཅེས་བྱའོ།།བརྗོད་བྱ་ནི་གཉིས་སུ་མེད་པའི་ཡེ་ཤེས་སོ། །དེ་ཡང་སྒྲས་དྲངས་ནས་བློ་ལ་དངོས་སུ་སྣང་བས་དངོས་ཀྱི་བརྗོད་བྱ་ཞེས་པ་ནས་སྣང་བ་ཞེན་པའི་བརྗོད་བྱས། སྒྲ་དྲངས་པའི་ཚིག་གི་།དོན་འདིས་བརྗོད་བྱ་རྟོགས་པས་བརྗོད་བྱ་ མཚོན་པར་བྱེད་པའི་ཚིག་ལ་ཡང་བརྗོད་བྱ་འདིའི་དོན་ཞེས་འབྲེལ་པར་བྱ་སྟེ།འདི་ལྟར་ལམ་ལ་བརྟེན་པས་འབྲས་བུ་ཐོབ་སྟེ། དེ་ནི་དེ་དང་འགལ་བའི་ཆོས་སྤོང་བར་འགྱུར་རོ། །གལ་ཏེ་དེ་ལྟར་ཡིན་དུ་ཟད་མོད། དེ་ཉིད་བསྟན་པ་ཅི་ཕྱིར་སྙམ་ནས་དེས་ན་འདིར་སྒྲའི་ཚོགས་ལ་མ་བརྟེན་པར་ ནམ་ཡང་རྟོགས་པ་མི་འབྱུང་ངོ་།།ཅིའི་ཕྱིར་གལ་ཏེ་བྱུང་ན་ནི་ཐམས་ཅད་གཞུང་གི་ཚོགས་ལ་སོགས་པ་ལ་མི་ལྟོས་པར་འགྱུར་ན་ནི་དོན་མེད་དོ། །གལ་ཏེ་ཡོད་ན་ཐམས་ཅད་སྐྱེ་བའམ། རྐྱེན་མེད་པ་རྟོགས་པ་ཐར་པར་གྱུར་པ་ལས། རྒྱུ་མེད་འབྲས་བུ་སྐྱེ་བར་རིགས་པ་མེད་དོ། ། ནམ་མཁའི་མེ་ཏོག་བཞིན་ནོ། །དེས་ན་རྒྱུ་ལ་རང་བཞིན་དུ་བྱེ་བྲག་གྱུར་པ་མེད་པ་ལས་འབྱུང་བར་འགྱུར་རོ། །ཕྱི་མ་ལྟར་ན་ཡང་འབའ་ཞིག་པ་རྣམས་ལ་ནི་འབའ་ཞིག་རང་ལས་གཞན་ནུས་པའི་ཕྱིར་མི་འབྱུང་ངོ་། །འབྲས་བུ་ཡན་ལག་རྒྱུ་ལ་མ་ཚང་བར་བྱུང་ན་ནི། དུས་ཐམས ཅད་དུ་འབྲས་བུ་འབྱུང་སྟེ།དེ་ནི་མེད་པའི་ཕྱིར་རོ། །དེ་བས་ན་གཞུང་གི་ཚོགས་མེད་ན་བརྗོད་བྱའི་རྟོགས་པ་མི་འབྱུང་ངོ་། །དེ་བཞིན་དུ་གཞུང་ཐབས་ཡིན་པ་དང་གཞུང་ཡང་བརྗོད་བྱའི་དོན་རྟོགས་པ་ཐབས་ལས་འབྱུང་བའི་འབྲེལ་པའོ། །དེ་བས་ན་གཞུང་གི་ཚོགས་ འདི་བརྗོད་བྱ་ཤུགས་ཀྱིས་རྟོགས་བྱ་ཡིན་ལ།དགོས་པ་ནི་ཐབས་ལས་འབྱུང་བ་ཡིན་ལ། ཉིད་ཀྱིས་འབྲེལ་ཏེ་དེ་དག་རང་ཉིད་ཀྱིས་འབྲེལ་པའོ། །དེའི་ཕྱིར་གཞུང་བསྟན་པས་བླང་དོར་ནི་དགོས་པ་ཡིན་ནོ། །དེས་ཅིར་འགྱུར་ཞེ་ན། རང་གི་དོན་ཕུན་སུམ་ཚོགས་པར་འགྱུར་ཏེ། ལམ་གྱི་རིམ་པས་ཚོགས་ལམ་དང་དྲོད་ལ་སོགས་པར་འབྱུང་ངོ་། །ཚུ་རོལ་གྱི་ཡེ་ཤེས་དང་མཐོང་སྒོམ་ལ་སོགས་པས་འབྲེལ་ཞེས་ཏེ་དེ་ནི་མཐར་ཕྱིན་པ་ཡང་བཟུང་སྟེ། རིགས་ཀྱི་བུ་རྣམས་དགོས་པའོ། །དེ་ནི་མེ་དང་དུ་བ་བཞིན་དུ་དེ་དང་དེ་ལས་འབྱུང་བའི་འབྲེལ་པ་སྟེ། །ཐབས་དང ཐབས་ལས་འབྱུང་བའི་ཚུལ་གྱིས་འབྲེལ་པའོ།།དེས་ན་ཉོན་མོངས་པ་དང་ཤེས་བྱ་རྩ་ནས་བྱང་བ་ནི་རང་དོན་ནོ། །འབྲེལ་པ་ལ་ཡང་དེ་ཉིད་དོ། །ས་བོན་དང་བཅས་པ་སྟོན་པ་ནི་རང་དོན་ཕུན་སུམ་ཚོགས་པའོ། །དེས་ན་དགོས་པའི་དགོས་པ་ཡང་། །གཞན་ལ་བརྟེན་གཞན་མུ་ སྟེགས་དང་།།ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་དང་། ཕྱག་རྒྱ་ཆེན་པོས་གཞན་མཐར་ཕྱིན་པ་ལ་སོགས་པ་ནི། དགོས་པའི་དགོས་པའོ། །དེས་ན་ཆོས་ཀྱི་རྗེས་སུ་འབྲང་བ་རྣམས་ལ་ནི། རྒྱུད་འདི་བརྗོད་བྱའི་འབྲེལ་པ་དང་། དགོས་པའི་དགོས་ པ་བསྟན་ཏོ།།དེ་ནས་བརྗོད་བྱ་དང་འབྲེལ་པ་དང་། དགོས་པ་དང་འབྲས་བུ་དགོས་པའི་དགོས་པ་ལ་སོགས་པ་བཞི་ངེས་པར་བསྟན་ཏོ། །གང་ཟག་དད་པའི་རྗེས་སུ་འབྲང་བ་རྣམས་ནི། སྲིད་པའི་མཚོ་ངེས་པར་བཟུང་ནས། སངས་རྒྱས་ཀྱི་བཀའ་ངེས་པར་འཇུག་པའི་ཕྱིར་ བསྟན་མི་དགོས་སོ།།དེ་ལྟར་བརྗོད་བྱ་དང་དགོས་པ་བརྗོད་ནས། ཡན་ལག་བསྟན་པ་ནི་གཞུང་དོན་ཏོ། །དེ་ལ་འདི་སྐད་བདག་གིས་ཐོས་པ་ཞེས་པ་ལ་སོགས་པ་སྨོས་ཏེ། སྦུད་པ་པོའི་ཚིག་ཏུ་སྨོས་ཏེ། འདི་སྐད་སྨྲས་པ་ཐོས་ཞེས་སྦྱར་རོ། །འདིའི་ཚེ་འདིས་ཐོས། གཞན་ གྱི་ཚེ་གཞན་གྱིས་ཐོས་པར་བསྟན་ཏོ།།ཐོས་པ་ནི་བདག་ཁོ་ནས་ཐོས་ཏེ། གཞན་དང་འབྲེལ་པ་མེད་དེ། དེ་ནི་གཞན་ཐོས་པའོ། །འདི་ནི་རི་རབ་རྩེ་རྩ་རྒྱུད་ཉི་ཁྲི་སུམ་སྟོང་ཁ་ནས་ཐོས་པའོ། །དེས་ནི་ཐོས་པར་དཀའ་བ་དང་། ཐོས་པ་མང་བ་ལ་སོགས་པ་ཡང་ ཡོངས་སུ་བཟུང་ངོ་།།གཞན་ནི་བཱ་རཱ་ཎ་སཱིར་བདེན་པ་བཞི་ལ་སོགས་པ་སྟེ། གཞན་ཉེ་བ་འཁོར་དང་། ཤཱ་རིའི་བུ་ལ་སོགས་པའི་གཙོ་འཁོར་ཐ་དད་པའི་ཕྱིར་རོ། །འདི་སྐད་བདག་གིས་ཐོས་ནི་རྒྱལ་བ་མར་མེ་མཛད་དང་། ཤཱཀྱ་ཐུབ་པ་དང་། གཙོ་བོ་རྡོ་རྗེ་འཆང་དང་། རྣམ་ རྒྱལ་ལ་སོགས་པས་ལས་ཐོས་པ་སྟེ་སྔོན་དང་ད་ལྟ་ལ་སོགས་པ་དང་།བར་དུ་ཡང་ཐོས་པ་སྟེ། གཙོ་བོ་དང་འཁོར་ཐ་མི་དད་པར་བསྟན་ཏོ། །ཐ་མི་དད་ན་རང་གི་ཚིག་དང་འགལ་ལོ། །གཅིག་པ་ཡིན་པའི་ཕྱིར་སྙམ་པ་ལ། གཅིག་ཀྱང་མི་སྟོ་སྟེ། ཀུན་རྫོབ་ཏུ་སྣང་བ་ཐམས་ཅད་ཀྱང་ འཁྲུལ་པ་མི་བདེན་པ་སྒྱུ་མ་ཡིན་པས་དོན་ནི་སྟོང་པ་ཉིད་ཁོ་ནའོ་ཞེས་རྒྱུད་ལས་གསུངས་པ་ཡིན་ནོ།།ཐ་དད་ཀྱང་མི་འགལ་ཏེ་བདེ་བར་གཤེགས་པ་ལ་སྐྱོན་གཉིས་མེད་དེ། ཐམས་ཅད་ཞི་བ་མྱ་ངན་ལས་འདས་པ་ཁམས་དང་སྐྱེ་མཆེད་བྲལ་བས་དུས་ཐམས་ཅད་བདག་དང་བདག་གིས་ སྟོང་པ་ཉིད་དུ་མེད།ཟླ་བ་དང་ཆུ་བཞིན་ནོ། །དེ་བས་ཁམས་གསུམ་རྣམ་པར་རྒྱལ་བ་ནི། ཕྱག་ན་རྡོ་རྗེ་ཉིད་དང་རང་བཞིན་གཅིག་པས། བྱང་ཆུབ་སེམས་དཔའ་རྣམས་ཀྱི་གདུལ་བྱ་ནི། སྣང་བས་སྣང་ཞེས་བསྟན་ཏེ་མེ་ལོང་རྐྱེན་གྱིས་གཟུགས་རང་ལས་གཉིས་སུ་སྣང་བའོ། །དེ་ བཞིན་དུ་སེམས་བསྐྱེད་པའི་སྨོན་ལམ་དང་སྙིང་རྗེ་ཆེན་པོས་སེམས་ཅན་གཞུག་པའི་ཆེད་དུ་སྟོན་པ་དང་།འཁོར་དང་ལྡན་པ་དང་ལམ་དང་དྲི་ཟའི་གཟུགས་དང་། ཕུང་པོ་དང་སྐྱེ་མཆེད་བཅུ་གཉིས་དང་། ཁམས་དང་རྣམ་པར་བྱང་པའི་འབྲས་བུ་དང་། ཉོན་མོངས་པ་དང་། མང་ དུ་བསྟན་པ་རྣམས་ནི།སེམས་ཅན་གཞུག་པའི་ཆེད་ཡིན་པས་ཐོས་ཞེས་བྱ། གཞན་ནས་ཐེག་པ་བསྟན་པ་སེམས་ཅན་གཞུག་པའི་ཆེད་དུ་ལགས། ཐེག་པ་མེད་ཅིང་འབྲས་བུ་མེད། །ཅེས་གསུངས་སོ། །དེས་ན་ཕྱག་ན་རྡོ་རྗེ་ལ་ཁམས་གསུམ་རྣམ་པར་རྒྱལ་བས་ཐོས་པ་སྟེ། གཙོ་འཁོར་ཐ་མི་དད་པར་བསྟན་ཏོ། །གཅིག་པའི་ཕྱིར་ཐོས་པ་དང་འགལ་སྙམ་པ་ལ། མི་འགལ་ཏེ། བཅོམ་ལྡན་འདས་རྡོ་རྗེ་འཆང་ཕྱག་ན་རྡོ་རྗེར་སྣང་ལ། དེ་ཡང་ཁམས་གསུམ་རྣམ་པར་རྒྱལ་བ་རུ་སྣང་ངོ་།། །འོ་ན་དེ་དངོས་སུ་སྣང་ངམ་མི་སྣང་བ་ཡིན། སྤྲུལ་པ་ཡིན་ནམ་མ སྤྲུལ་པ་ཡིན།སྣང་ཞིང་སྤྲུལ་པ་ཡིན་ན་སངས་རྒྱས་མ་ཡིན་ཏེ། དངོས་པོ་ཐ་དད་དུ་སྣང་ཞིང་ཤེས་པ་གཉིས་དང་ལྡན་པའི་ཕྱིར་རོ། །བཅོམ་ལྡན་འདས་ནི་ལོག་པའི་ཤེས་པ་དང་སྟེ། ས་ལ་གནས་པའི་བྱང་ཆུབ་སེམས་དཔའ་དང་ཁྱད་མེད་དོ། །དེའི་ཕྱིར་དེ་ནི་སངས་རྒྱས་སུ་བལྟ་ བར་མི་བྱའོ།།སྤྲུལ་པ་མ་ཡིན་ན་སྣང་བར་མི་རིགས་སོ། །ཅིའི་ཕྱིར། རྒྱུ་མེད་འབྲས་བུ་སྣང་བའི་ཕྱིར། །རི་བོང་རྭ་སོགས་སྣང་བར་རིགས། །ཞེས་བྱའོ། །བདེན་ཏེ་ལོག་པའི་ཤེས་པ་དང་ལྡན་ན་དེ་གཉིས་འབྱུང་གི། དེ་མེད་པའི་ཕྱིར་དེ་མི་འབྱུང་ངོ་། །དངོས་སུ་སྤྲུལ་ཡང་མི་སྟོ་ འདུལ་བའི་དུས་ལ་བབ་པའི་ཕྱིར།དེའི་རང་བཞིན་དེར་སྣང་བའོ། །མ་སྤྲུལ་ཡང་རང་ཉིད་དེའི་ཚེ་དེས་འདུལ་ལ་རྣམ་པར་རྒྱལ་བར་སྣང་བའོ། །དེ་ནས་བཀའ་ལ་བར་མེད་པའི་ཕྱིར་རང་གིས་ཐོས་པ་དང་ཡང་སྡུད་པ་པོས་ཐོས་ཞེས་བྱའོ། །འདིར་སེམས་ཅན་གདུལ་བྱས་མ་ རྟོགས་པར་སྟོན་པ་དང་སྡུད་པ་པོ་ཐ་དད་དུ་བྱ་བ་མེད་དོ།།སྨོན་ལམ་དང་ཐུགས་རྗེ་དཔག་ཏུ་མེད་པའི་འགྲོ་དོན་འབྱུང་བའི་ཕྱིར་ཐོས་ཞེས་སྦྱར་རོ། །དེས་ན་སྐྱོན་དེ་གཉིས་མི་འབྱུང་སྟེ། དེ་ནི་སྐྱོན་ཐམས་ཅད་དང་བྲལ་བའི་ཕྱིར་རོ། །དུས་ཀྱང་དེ་སྟེ་བདེའི་ཚེ་ཐོས། གཞན་གྱི་ཚེ་ གཞན་ཐོས་པ་སྟེ་དུས་ཀྱང་དེའི་ཚེ་ཞེས་བསྟན་ཏོ།།འདི་སྐད་བདག་གིས་ཐོས་པ་ནི་ཨེ་ཝཾ་མཱ་ཡ་ཞེས་འབྱུང་བས་བྱང་ཆུབ་སེམས་དཔའ་རྣམས་ཀྱིས་འབྱུང་བ་ལྔ་རིགས་དང་ཡེ་ཤེས་ལྔ་དང་སྒྲ་དང་སྐྱེ་མཆེད་དང་། ཁམས་བཅོ་བརྒྱད་དང་། གཡོ་བ་དང་། མི་གཡོ་བ་དང་། རྩ་ ལྔ་དང་དབང་དང་དགའ་བ་ལ་སོགས་པ་ལ་ཤེས་པར་བྱའོ།།དེ་དག་བསྟན་པའི་ཡན་ལག་ནི། །ཕྱི་ནང་མཐར་ཐུག་རྣམ་པ་གསུམ། །ཅི་བཞིན་མིན་དང་ཇི་བཞིན་སྒྲ། །དགོངས་པས་བཤད་དང་དགོངས་པ་མིན། །དྲང་བའི་དོན་དང་ངེས་པའི་དོན། །ཕྱི་ནི་མི་བཟད་དབྱིངས་ དང་སྦྱར།།ནང་ནི་རྩ་རླུང་བྱང་ཆུབ་སེམས། །རྩ་ལྔ་གཏུམ་མོའི་མན་ངག་གོ། །མཐར་ཐུག་མཐོང་ལམ་ཡེ་ཤེས་ཏེ། །དཔེ་ཡེ་ཤེས་གཉིས་མེད་ཕྱག་རྒྱ་ཆེན་པོའི་ལམ་བཅུ་གཉིས་ནི་དངོས་པོ་བྲལ་བ་དེས་ན་བྲལ་བའི་ཤེས་པའོ། །གཞན་ཡང་ཕུང་པོ་ལྔ་ དང་།ཚོགས་དྲུག་དང་། སྐྱེ་མཆེད་བཅུ་གཉིས་དང་། ཁམས་དང་། བག་ཆགས་རྣམས་སོ། །དེ་ནི། བརྡ་མིན་སྐྱེ་བོ་ཐལ་བའི་ཚིག་།དགོས་པ་མ་ཡིན་ཞེས་སུ་བྱ། །ཤུ་ཀྲ་སུ་ཏྲ་མ་ནུ་ཧ་ར་དང་། །ཏནྟྲ་ཡནྟྲ་མནྟྲའོ། །བྱང་སེམས་ཀྱིས་སེམས་ཅན་ཕལ་པ་རྣམས་ ཐུགས་རྗེ་ཟག་བཅས་ཐམས་ཅད་སྐྱོབ་པའོ།།སྔགས་དང་ཤེས་པ་མ་ལུས་ཡོངས་སུ་འཛིན་རྒྱུད་ནི། །འཁོར་བ་བརྒྱུད་དེ་ཆོས་ཉིད་བྱང་ཆུབ་སེམས། །འདི་ཡང་གནས་པ་མ་ལུས་སྟོང་པས་འཛིན་པར་བྱེད། །ལུང་ལས་འདི་ལྟ་སྟེ། ཇི་ལྟ་ཇི་ལྟར་འདུལ་འགྱུར་བས། །སེམས་ ཅན་མ་ལུས་གསད་པར་བྱ།།མ་བྱིན་ལེན་དང་བརྫུན་སྨྲ་དང་། །དེ་ལྟ་དེ་ལྟར་སེམས་ཅན་དོན། །འདོད་ཆགས་ལ་སོགས་སྤང་བས་སྤྱད། །སེམས་ཅན་ཀུན་ལ་ཕན་དོན་དུ། །སངས་རྒྱས་བསྟན་པ་རྒྱུ་ཡི་ཕྱིར། །སེམས་ཅན་ཐམས་ཅད་བསད་ན་ཡང་། །དེ་ལ་སྡིག་པས་མི་ གོས་སོ།།སེམས་ཅན་ཀུན་ལ་ཕན་དོན་དུ། །སངས་རྒྱས་ཀུན་ལ་སྦྱོར་བ་ཡིས། །གཞན་གྱི་ནོར་རྣམས་ཕྲོག་ན་ཡང་། །དེ་ལ་སྡིག་པས་མི་གོས་སོ། །འདོད་ཆགས་ལྟ་བུའི་བདེ་བ་མེད། །དེ་ནི་རྒྱལ་བ་རྣམས་ལ་ཕུལ། །སེམས་ཅན་དོན་དུ་གཞན་བུད་མེད། །བསྟེན་ པས་བསོད་ནམས་ཐོབ་པར་འགྱུར།།སེམས་ཅན་ཀུན་ལ་ཕན་དོན་དུ། །སངས་རྒྱས་བསྟན་པའི་རྒྱུ་ཡི་ཕྱིར། །མི་དགེ་བཅུ་སོགས་སྤྱད་པ་ཡང་། །བསོད་ནམས་རྣམ་མང་འཕེལ་ཞེས་གསུངས། པར་འཇུག་པ་ནས་བཟུང་བ། །ཕ་དང་མ་ནི་གསད་པར་བྱ། །རྒྱལ་ པོ་ངན་པ་བཀུར་མི་བྱ།།བྲམ་ཟེའི་གྲོང་ཁྱེར་གཞོམ་པར་བྱ། །དེས་ཀྱང་གྲོང་བར་གསུངས་པ་སྟེ། །དགོས་པ་བཤད་པ་ཞེས་ནི་བྱ། །དྲང་བའི་དོན་ནི་ཐེག་པ་གསུམ་དང་དགུ་རུ་བསྟན་པའོ། །ཡོད་པས་ཉན་ཐོས་རང་རྒྱལ་རྣམས་ནི་སྨོས། །ཕྲ་རབ་རྫས་སུ་འདོད་པ་ཉན་ཐོས་ རྣམས།།བྱང་ཆུབ་སེམས་དཔའ་དེ་ནི་བྱིས་པའི་རང་བཞིན་ནོ། །མེད་པར་ཞེན་ཅིང་ཆགས་པར་འདོད་པའི་བྱིས་པ་སྟེ། །ཐེག་པ་དམན་པ་ལོག་པའི་ཤེས་པ་སྟེ། །དེ་ཁོ་དེ་ལ་དེ་ཡི་ཐེག་བསྟན་པ། །ཞེས་རྒྱུད་ལས་གསུངས་སོ། །ཡང་དག་དོན་དང་ལྡན་གྱུར་པ། །སྟོང་ ཉིད་རང་བཞིན་ལྷུག་པ་ནི།།བྱང་ཆུབ་སེམས་དཔའ་རྣམས་ཀྱི་དངོས། །བླང་དོར་མེད་པ་ཐར་པའི་ལམ། །ལུང་ལས་ཀྱང་། བྱང་ཆུབ་སེམས་དཔའ་ཆེན་པོ་སྦྱིན་པ་ནི་བཅིང་བའོ། །ཚུལ་ཁྲིམས་ནས་ཡེ་ཤེས་ཀྱི་བར་དུ་ནི་བཅིང་བའོ། །བདེ་བ་དང་། སྟོང་པ་དང་། རིག་པ་དང་། བདག་ མེད་པ་ནི་བཅིང་བའོ།།ཅིའི་ཕྱིར་ཞེ་ན་བདག་ཐམས་ཅད་དང་བྲལ་བའི་ཕྱིར་རོ། །དེ་ནས་བྲལ་བའི་ཆོས་ལ་ཡང་རིགས་ཀྱི་བུའམ། རིགས་ཀྱི་བུ་མོ་བསླབ་པར་མི་བྱའོ། །དེས་ན་མུ་སྟེགས་པ་ལ་སོགས་པའི་བདག་ལྟ་དང་། བྱིས་པ་རྣམས་ཀྱི་ཡོད་པའི་ཤེས་པ་རྣམས་ནི་གཞོམ་ པ་སླའོ།།བདག་མེད་དང་། རིག་སྟོང་ལ་སོགས་པ་ཕྱོགས་བྲལ་གྱི་བདག་རྣམས་ནི་གཞོམ་པར་དཀའ་བ་ཡིན་པའི་ཕྱིར་འཁོར་བ་ལས་མི་ཐར་བ་བསྟན་ཏོ། །དེས་ན་འདོད་པ་ལམ་དུ་བྱས་པའི་བཅིང་བའོ། །བྱ་བ་མེད་པ་ཐོབ་པ་མེད་པ་ནི་ངེས་པའི་དོན་ཞེས་བྱའོ། །དེ་སྐད་གསུངས་པ་ ཡིན་པའི་ཕྱིར།།དེ་ནི་དུས་ཕུན་སུམ་ཚོགས་པའོ། །གནོད་སྦྱིན་ཐམས་ཅད་ཡོངས་སུ་རྒྱུ། །ཤིན་ཏུ་དབེན་པ་ཤིན་ཏུ་ཡོངས་དག་པ། །ཞེས་པས་གནས་ཕུན་སུམ་ཚོགས་པ་བསྟན་པ་ཡིན་ཏེ། གནོད་སྦྱིན་ཐམས་ཅད་ཡོངས་སུ་རྒྱུ་བ་ནི་རི་རབ་རྩེ་མོ་སྟེ། དེ་ན་ནི་གནོད་སྦྱིན་གང་བ་བཟང་པོ་དང་། ནོར་བུ་བཟང་པོ་དང་ལྔས་རྩེན་ལ་སོགས་པ་སྟེ། གནོད་སྦྱིན་གོས་སྔོན་ཅན་གྱི་འཁོར་དུ་བསྟན་ཏེ། དེ་ན་ནི་གནོད་སྦྱིན་མ་རུངས་པ་གཞན་ཡང་ཡོད་པ་སྟེ། དེ་རྣམས་ཡོད་པ་ནི་གནོད་སྦྱིན་ཐམས་ཅད་ཡོངས་སུ་རྒྱུ་བ་ཞེས་བྱའོ། །ཤིན་ཏུ་དབེན་པ་ནི་སྟུག་པོ་བཀོད་པའི་གནས་ཏེ། འདི ཡང་དཔེ་ཤེལ་གསལ་བའི་ནང་དུ་ཆུད་པའི་དཀྱིལ་འཁོར་གསལ་བ་ནི།གཞལ་ཡས་ཁང་འདུག་པ་ནི་མ་ལུས་པའི་ལྷུན་གྱིས་གྲུབ་པའི་རྒྱན་དང་ལྡན་ཞེས་བྱའོ། །དེ་ན་ཡེ་ཤེས་ཆེན་པོ་སྟོན་པ་བཞུགས་ཏེ། འཁོར་དང་ཆོས་ལ་སོགས་པ་གཅིག་ཏུ་བཞུགས་ཏེ་མེ་དང་ཚ་བ་ བཞིན་ནོ།།རང་བཞིན་གཅིག་པར་ཤེས་པར་བྱའོ། །དེས་ན་གནས་གསུམ་མོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་ཞེས་བྱ་བ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱིས་ལས་ཀྱི་ཁྲོ་བོའི་དབང་བསྐུར་བ་ཞེས་བྱ་བར་ གནས་གསུམ་དུ་སྟོན་པ་གསུམ་ཐ་མི་དད་པར་བསྟན་ཏོ།།གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ཞེས་བྱ་བ་ནི། གནོད་སྦྱིན་མ་རུངས་པ་དེ་རྣམས་ཀྱི་གཙོ་བོ་སྤྲུལ་སྐུ་ལག་ན་རྡོ་རྗེས་འདུལ་བར་བསྟན་ཏོ། །དེ་ལ་ནི་སྦྲུལ་གྱེ་རྒྱན་ནི། ཉིད་ལས་ཐ་མི་དད་པའི་འཁོར་གྱི་གནོད་ སྦྱིན་རྣམས་སྟོན་པའི་གཟི་བརྗིད་ཀྱིས།ཉེ་བའི་འཁོར་བྱང་ཆུབ་སེམས་དཔའ་རྣམས་ཀྱིས་སྤྲུལ་པའི་སྦྲུལ་གྱི་རྒྱན་བཏབ་ཅེས་བྱ་བར་བསྟན་ཏོ། །སྟག་གི་ཤམ་ཐབས་དང་གོས་སྔོན་པོ་བླ་གོས་རྣམས་ནི། གནོད་སྦྱིན་བྲེད་པའི་སྟོབས་ཀྱིས་སྐྱབས་ཀྱི་འོད་ལ་ཕུལ་ཞེས་བྱའོ། །དུས་ གསུམ་བདེ་གཤེགས་ཞེས་བྱ་བ་ནི།བྱང་ཆུབ་སེམས་དཔའ་ཕྱག་ན་རྡོ་རྗེ་བཅུ་ལ་གནས་པའི་ཚེ། པདྨ་སྟོང་དང་ལྡན་པའི་དབུས་སུ་བཞག་སྟེ། དུས་གསུམ་སངས་རྒྱས་ཐམས་ཅད་ཀྱི་ཐུགས་ཀྱི་སྟོང་པ་ཉིད་ཀྱི་རྡོ་རྗེ་ཕྱུང་ནས་ཕྱག་ན་རྡོ་རྗེ་ཐུགས་ཀྱི་བདག་པོར་སྡུད་པ་པོར་དབང་བསྐུར་ ཞིང་བཀའ་གནང་ནས།ལས་ཐམས་ཅད་བཏིང་ཕན་ཆད་ཀྱིས་ཞེས་པའོ། །མཆེ་བ་གཙིགས་པ། ཡིད་ཁྲོས་པ་ལྟ་བུ། མིག་མེ་མདག་གི་ཕུང་པོ་འདྲ་བ། དབུགས་མེ་ལྟར་འབར་བ། འཇིགས་པའི་ང་རོ་ཅན་ཞེས་པ་ལ་མཆེ་བ་གཙིགས་པས་ནི་ལོག་པར་རྟོག་པའི་བདུད་ རྣམས་ཟ་ཞིང་འཇོམས་པའོ།།ཡིད་ཁྲོས་པས་ནི་དོན་སྙིང་རྗེ་ཆེན་པོ་དང་ལྡན་པ་ཡིན་ཏེ། ཀུན་རྫོབ་ཏུ་ཁྲོ་བོའི་ཆ་བྱད་དོ། །མིག་མེ་མདག་གི་ཕུང་པོ་ནི། ལས་གཉིས་ལ་འཇུག་།རང་སྨིན་པའི་ལས་དང་བལྟས་པ་ཙམ་གྱིས་འཇིགས་པར་བྱེད་པའོ། །དབུགས་མེ་ལྕེ་ལྟར་ འབར་བ་ནི།སྨིན་མ་དང་སྒྲ་ཙམ་གྱིས་འདུལ་བར་བསྟན་ཏོ། །འཇིགས་པའི་ང་རོ་ནི་ངག་གི་སྐྱོན་བཞི་དང་བྲལ་ཞིང་ཡིད་ཀྱི་ཟུག་རྔུ་འདོན་ཞིང་། ཧཱུཾ་དང་ཕཊ་ཀྱི་སྒྲ་སྒྲོགས་པས་འཁོར་རྣམས་སྐྲག་པའོ། །ལག་པ་དང་རྐང་པ་ཀླུ་ནོར་རྒྱས་ཀྱིས་བརྒྱན་པ། ཀླུ་ནག་པོ་སེ་རལ་ ཁར་ཐོགས་པ།ཀླུ་ནག་པོ་དང་ཉེ་དགའ་བོས་སྙན་ཆ་བརྒྱན་པ་ཞེས་པ་ནི། ལག་པ་ལ་སྦྲུལ་ནག་པོ་དང་སེར་པོས་བརྒྱན་པར་ཤེས་པར་བྱའོ། །རྐང་པ་ལ་སྦྲུལ་ནག་པོས་བརྒྱན་པའི་སྐ་རགས་དམར་པོ་བྱས་པའོ། །སེ་རལ་ཁ་ནི་ཀླ་ཁེངས་པོའི་རིགས་ཀྱིས་ག་ཤར་བྱས་པའོ། ། ཀླུ་དགའ་བོ་དང་ཉེ་དགའ་བོའི་མིང་ཡིན་ལ། དེ་དང་འདྲ་བའི་སྦྲུལ་དཀར་པོས་སྙན་ཆ་བརྒྱན་པར་བསྟན་ཏོ། །སྦྲུལ་འབར་བ་རིན་པོ་ཆེའི་ཅོད་པན་ཐོགས་པ། སྦྲུལ་གདུག་པ་འབར་བ་ཟ་ཞེས་པ་ལ། སྦྲུལ་འབར་བ་རིན་པོ་ཆེའི་ཅོད་པན་ཐོགས་པ་ནི། དབུ་ལ་ནོར་བུ་རིན་པོ ཆེས་བརྒྱན་པའོ།།འབར་བ་ནི་ནག་པོ་ལ་སོགས་པའི་ཁ་དོག་བཞིན། སྦྲུལ་རིན་པོ་ཆེ་དང་ལྡན་པས་དབུ་ལ་བརྒྱན་པར་བསྟན་ཏོ། །གདུག་པ་ཟ་བ་ནི་ཞལ་དུ་སྦྲུལ་ནག་པོ་གསོལ་བར་བསྟན་ཏོ། །དེས་ཀྱང་གཙོ་བོ་འདོད་ཆགས་རྣམ་པར་དག་པ་དང་། ཚུལ་ཁྲིམས་ཉམས་ པའི་སྐྱོན་དང་བྲལ་ཞིང་།ཕྱི་རོལ་གྱི་ཀླུའི་རིགས་དྲུག་འདུལ་བའི་རྟགས་སུ་བསྟན། །བཞིན་རྒྱས་པ། སྨིན་མ་དཔྲལ་བར་བསྡུས་པ། ཡ་སོས་མ་མཆུ་མནན་པ། གཤིན་རྗེའི་ཆ་བྱད་ཅན་ཞེས་བྱ་བ་ནི། བཞིན་རྒྱས་པ་ནི་སྟོང་པ་ཉིད་ཀྱི་དོན་རྒྱས་པས་གདོང་གི་འཕེལ་ བ་སྟེ།ལྷ་ལ་སོགས་པ་གདུལ་བྱ་འདུལ་བར་བསྟན་ཏོ། །ཡ་སོས་མ་མཆུ་མནན་པ་ནི། ཡ་སོས་མ་མཆུའི་སྟེང་དུ་ཕྱིན་པ་སྟེ། བྱེ་བྲག་ཏུ་སྲིན་པོ་འདུལ་བའི་རྟགས་སོ། །སྨིན་མ་དཔྲལ་བར་བསྡུས་པ་ནི། ཁྲོ་གཉེར་གསུམ་དཔྲལ་བར་འདུག་པ་སྐུ་གསུམ་དང་ལྡན་ པའི་རྟགས།གཤིན་རྗེའི་ཆ་བྱད་ཅན་ནི་ཁྲོ་བོ་མིའུ་ཐུང་གི་གཟུགས་འདྲ་བའོ། །དེས་ནི་གཤིན་རྗེའི་རིགས་འདུལ་བའོ། །ལྕེ་གློག་ལྟར་འགྱུ་བ། སྦྲུལ་ཟ་བ། གསུས་པ་ཆེ་བ། ལག་པ་བརྡབས་པའི་སྒྲས་འཇིགས་པར་བྱེད་པ་ཞེས་བྱ་བ་ནི། ལྕེ་གློག་ལྟར་འགྱུ་བ་ནི། སྤྲུལ་པ་གློག་ པས་མྱུར་བའོ།།སྦྲུལ་ཟ་བ་ནི་སྦྲུལ་ཀླུའི་ནད་ངན་འདྲ་བས་འདོད་ཆགས་ཀྱི་གདུང་བ་སེལ་བའོ། །གསུས་པ་ཆེ་བ་ནི་གསུས་ཁྱིམ་ཆེ་བ་སྟེ། སྟོང་པ་ཉིད་ཀྱང་བསྟན་ཏོ། །ལག་པ་བརྡབས་པ་ནི་གཙོ་བོ་ལག་པ་རྡོ་རྗེ་དང་ལྡན་པས་མ་རུངས་པ་འཇིགས་པར་བྱེད་པའོ། །ཀླུའི་རྒྱལ་ པོ་འདབ་བཟངས་སྐ་རགས་སུ་བཅིངས་པ། ལ་ལ་ཞེས་སྒྲོགས་པར་བྱེད་པ་ཞེས་པ་ལ། འདབ་བཟངས་ནི་སྦྲུལ་དམར་པོའི་སྐ་རགས་སུ་བཅིངས་པ། ཨ་ལ་ལ་ནི་དེ་འདྲའི་རྒྱན་ཆ་ལ་ངོ་མཚར་བའོ། །དེ་སྒྲོགས་པ་ནི་སྒྲ་སྒྲོགས་པའོ། །རྒྱ་མཚོའི་ཟབས་སུ་ དཔག་ཚད་བརྒྱད་ཁྲི་བཞི་སྟོང་ཡོད་པ་རྐང་པའི་པུས་མོར་ཕྱིན་པ།དབང་པོ་དང་ཉི་མ་ཕྲག་པ་ལ་ཁུར་ཞེས་པ་ལ། རྒྱ་མཚོ་ལ་དཔག་ཚད་བརྒྱད་ཁྲི་ཡོད་པས་ཕྱག་ན་རྡོ་རྗེའི་བུས་མོ་ནུབ་པ། སྐུ་བྱིན་པོ་ལ་ཉིས་འབུམ་དྲུག་ཁྲི་ཡོད་པ་ཞེས་པ་སྟེ། སྤྲུལ་པའི་སྐུའི་བོང་ཚད་བསྟན་ཏོ། །དབང་ པོ་དང་ཉི་མ་ནི་ཐབས་ཤེས་རབ་ཀྱི་སྟེ།ནང་གཙོ་བོ་བཞུགས་ཞེས་པ་ལ། ཡང་ན་གཙོ་བོའི་ཕྲག་པ་ལ་ཉི་ཟླ་རྒྱུ་བ་སྟེ་ཞེས་པའི་ཚད་དོ། །ལ་ལ་ན་རེ་ལྷའི་དབང་པོའི་ཕྲག་པ་ལ་ཉི་ཟླ་རྒྱུ་སྟེ། དེའི་སྟེང་ན་ཕྱག་ན་རྡོ་རྗེ་བཞུགས་ཞེས་པ་སྟེ། ལྷ་འདུལ་བའོ། །ཀླུ་ཐམས་ཅད་རླག་པར་ བྱེད་པ།གད་རྒྱངས་ཆེན་པོ་དགོད་པས་ཀུན་དུ་འཁྲུགས་པར་བྱེད་པ་ཞེས་པ་ལ། ཀླུའི་རིགས་ཀྱི་བདག་པོ་ལ་སོགས་པ་བརླག་པའི་ཕྱིར། ཧ་ཧ་ཞེས་བྱ་བའི་སྒྲ་དྲངས་པའི་ཕྱིར་རོ། །གད་རྒྱངས་ནི་ཧ་ས་དེ་བ་ཏའི་སྒྲ་བསྒྲགས་པས་ཀླུ་ཐམས་ཅད་སྔངས་ཤིང་བརྒྱལ་ཏེ་ཤ་རུས་ཁྲོ་བོའི་ ཞལ་དུ་སྟོབས་ཞེས་པའོ།།ཀླུ་ཐམས་ཅད་འཆིང་བར་བྱེད་པ། འབྱུང་པོ་ཐམས་ཅད་འགུགས་ཤིང་ཞི་བར་མཛད་པ་ཞེས་བྱ་བ་ལ། འབྱུང་པོའི་བདག་པོ་དབང་ལྡན་ལ་སོགས་པ་འགུགས་ཤིང་བཅིང་བ་སྟེ། ལྕགས་ཀྱུའི་སྦྱོར་བས་བཀུག་ནས། དཀར་གསུམ་དང་མངར་ གསུམ་དང་ལྡན་པའི་གཏོར་མ་སྦྱིན་ཞེས་པའོ།།ཀླུ་ཐམས་ཅད་ཅེས་པ་ནི། བཅིང་བ་ནི་གཅོད་མི་ནུས་ཏེ། གཞན་གཤིན་རྗེ་དང་འབྱུང་པོ་སྤྱི་ཡང་ཡོངས་སུ་བཟུང་བ་སྟེ། སྦྱོར་བ་ཐམས་ཅད་གཅོད་པར་མཛད་པ། སྦྱོར་བ་ཐམས་ཅད་ཟློག་པར་མཛད་པ། སྦྱོར་བ་ཐམས་ཅད་གནོན་པར་ མཛད་པ།ཡོན་ཏན་མ་ལུས་པའི་བདག་པོ་དེ་ཞེས་པ་ལ་སྦྱོར་བ་ནི་ཕྱིའི་དྲུག་དང་། ཁྲག་དང་སྔགས་ཀྱིས་བྱས་པའི་གནོད་པ་སྟེ། གཞན་གྱིས་བྱས་པའི་རིག་སྔགས་ཚུར་མི་ཚུགས་པར་བཟློག་པའོ། །སྦྱོར་བ་བཟློག་པ་ནི་རང་བསྲུང་བ་དང་ཕ་རོལ་རང་ལ་བཟློག་པའོ། །སྦྱོར་བ་གནོན་པ་ནི་ཕ་རོལ་ བཟློག་པའི་འཁོར་ལོ་ཐོད་པ་མི་མཐུན་པས་གནོན་ཞེས་པའོ།།ཚིག་དེ་གསུམ་ཡང་ཟབ་པའི་ཕྱིར་བླ་མའི་མན་ངག་ལ་རག་ལས་པར་བྱ་བའི་ཕྱིར་བཤད་པར་མི་བྱའོ། །ཡོན་ཏན་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། སྟོབས་བཅུ་དང་མི་འཇིགས་པ་བཞི་དང་། སོ་སོ་ ཡང་དག་པར་རིག་པ་བཞི་དང་།བྱམས་པ་ལ་སོགས་པའི་ཡོན་ཏན་དང་ལྡན་པའོ། །དེས་ཀྱང་གནས་ཁྱད་པར་ཅན་ན་སྟོན་པ་ཡོན་ཏན་དང་ལྡན་པ་བཞུགས་པར་བསྟན་ཏོ། །གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དང་། གནོད་སྦྱིན་མཐུ་བོ་ཆེ་ཐམས་ཅད་ཅེས་པས་འཁོར་ ཕུན་སུམ་ཚོགས་པར་བསྟན་ཏེ།རང་གི་འཁོར་ནི་ས་བཅུའི་བྱང་ཆུབ་སེམས་དཔའ་ལག་ན་རྡོ་རྗེ་དང་ལྷ་དང་མི་དང་མི་མ་ཡིན་པ་ལ་སོགས་པའོ། །གཞན་ཡང་རིགས་ལྔའི་ཁྲོ་བོ་དང་ལྷ་མོ་དང་། སྒོ་མ་ལ་སོགས་པའི་ནང་ནས་ཁྲོ་བོ་ཁམས་གསུམ་རྣམ་རྒྱལ་ལངས་ཏེ། འདི་ སྐད་གསོལ་ཞེས་འོག་དང་འབྲེལ་ཏོ།།བར་དུ་གཅོད་པའི་ཕྱིར་གནོད་སྦྱིན་སྨོས་ཏེ་གང་བ་བཟང་པོ་དང་། ནོར་བུ་བཟང་པོ་དང་། ལྡས་རྩེན་ལ་སོགས་པ་ཉི་ཤུ་རྩ་བརྒྱད་དོ། །གནོད་སྦྱིན་མཐུ་བོ་ཆེ་ཐམས་ཅད་དང་ཞེས་པ་ལ་མཐུ་ནི་རང་གི་འཁོར་རྣམས་ཐམས་ཅད་ལ་འདུལ་སེམས་ ཅན་ཐམས་ཅད་ལ་ཤིང་གི་ཡོལ་གོས་ཆུ་འཐོར་བའོ།།གནོད་སྦྱིན་དྲག་པོ་ཐམས་ཅད་ནི་ཤ་རློན་པ་རྗེན་པར་ཐ་བའོ། །དེ་ནི་ལྷ་མིན་དང་ལྷ་དང་གནོད་སྦྱིན་མ་རུངས་པ་འདུལ་བ་ཡང་ཤེས་པར་བྱའོ། །ལྷ་ཐམས་ཅད་དང་། ཀླུ་ཐམས་ཅད་དང་། དྲི་ཟ་ཐམས་ཅད་དང་། ལྷ་མ་ཡིན་ ཐམས་ཅད་དང་ཞེས་པ་ལྷ་ནི་བརྒྱད་དེ།ལྷ་དང་། ལྷའི་དབང་པོ་དང་། ལྷ་མིན་བདག་།མ་ཧཱ་དེ་བ་དང་། ཁྱབ་འཇུག་ཆེན་པོ་དང་། ཨུ་མ་དེ་བ། ཀུན་དུ་རྒྱུག་།འཆི་མེད་དབང་པོའོ། །ཀླུ་ཡང་དགའ་བོ་ལ་སོགས་པ་བརྒྱད་དེ། དེ་ཡང་འཁོར་དང་བཅས་པའོ། །དྲི་ཟ་ ནི་ཟུར་ཕུད་ལྔ་པའོ།།ལྷ་མ་ཡིན་ནི་ཐགས་བཟངས་རིས་འཁོར་དང་བཅས་པའོ། །ནམ་མཁའ་ལྡིང་ཐམས་ཅད་དང་། མིའམ་ཅི་ཐམས་ཅད་དང་། ལྟོ་འཕྱེ་ཆེན་པོ་ཐམས་ཅད་དང་། འབྱུང་པོ་དང་ཞེས་པ་ལ། ནམ་མཁའ་ལྡིང་ནི་གསེར་མིག་ཅན་འཁོར་དང་བཅས་ པའོ།།མིའམ་ཅི་ནི་ལྗོན་པ་རྟ་མགོ་ཅན་ལ་སོགས་པ་རི་རབ་ཀྱི་ཁོང་གསེང་ན་གནས་པའོ། །ལྟོ་འཕྱེ་ནི་ལྟོ་འཕྱེ་ཉིད་དེ། མིའི་ལུས་པོ་ལ་སྦྲུལ་གྱི་མགོ་བོ་ལ་སོགས་པའོ། །འབྱུང་པོ་ནི་དབང་ལྡན་ལ་སོགས་པ་བརྒྱད་དོ། །ཡི་དགས་དང་བརྗེད་བྱེད་ལ་ སོགས་པ་དང་ཐབས་ཅིག་ཏུ་བཞུགས་ཏེ་ཞེས་བྱ་བ་ལ།ཡི་དགས་ནི་ཁ་ནས་མེ་འབར་ལ་སོགས་པའོ། །བརྗེད་བྱེད་ནི་བྱོལ་སོང་གི་རྒྱལ་པོ་རི་རབ་ལ་གནས་པ་རྣམས་སོ། །ཐབས་ཅིག་ནི་བསྐོར་བའོ། །འདི་ལྟར་ཉི་མ་དང་ཟླ་བ་དང་སྐར་མའི་ཚོགས་ལྟ་བུ་བཞུགས་སོ་ཞེས་པ་ལ་ཉི་ཟླ་དང་འདྲ་བ་ནི་ བདེན་པ་གཉིས་དང་ཐབས་ཤེས་རབ་དང་ལམ་གཉིས་ལ་སོགས་པའོ།།སྐར་མ་དང་འདྲ་བ་ནི་ལམ་དེ་དག་གི་ཡན་ལག་གི་ཚོགས་དང་ཐབས་ཅིག་ཏུ་སྐར་མ་ལྟ་བུ་བཞུགས་ཞེས་པ་སྟེ། གནས་དེར་སྟོན་པ་དེ་འཁོར་རྣམས་དང་ལྷན་ཅིག་ཏུ་ཆོས་གསུང་ངོ་ཞེས་བསྟན། དེ་ནི་ཆོས་ཕུན་སུམ་ཚོགས་པ་ཡང་ཡོངས་སུ་ བསྟན་ཏོ།།དེའི་ཆོས་ཡང་ཞེས་པ་མི་སྣང་བར་གྱུར་གྱི་བར་ལ་དངོས་སུ་བསྟན། སྟོན་པ་དང་ཆོས་ཀྱི་བྱིན་རླབས་ཡིན་པའི་ཕྱིར་དེ་མ་གསུངས་སོ། །དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་ཅན་ལ་འཁོར་ཐམས་ཅད་ཀྱིས་གསོལ་བ་ཞེས་པ་ལ། དེ་ནས་ནི་ ཆོས་དེ་ལྟ་བུ་ལ་སྟོན་པ་བཞུགས་ཏེ་ཞེས་པའོ།།འཕགས་པ་ནི་སྒྲིབ་པ་རྣམ་པ་གཉིས་སྤངས་པའོ། །གོང་མ་དང་ཁྱད་པར་གྱི་དོན་དེ་ནི་སྤྲུལ་སྐུ་ལག་ན་རྡོ་རྗེ་གོས་སྔོན་པོ་ཅན་ནོ། །དེ་ལ་འཁོར་ཐམས་ཅད་ཀྱི་ནང་ནས་ཁམས་གསུམ་རྣམ་པར་རྒྱལ་བ་ལངས་ནས་བླ་གོས་ སྔོན་པོ་གསོལ་ཏེ།།གོས་སྔོན་པོ་ཅན་ཁྱོད་ཅི་ཞེས་ཏེ། ཁྱོད་ཀྱི་བྱ་བའི་ལས་དང་ངོ་བོ་ཇི་ལྟ་བུ་ལགས། བདེ་གཤེགས་ཀུན་གྱི་སྤྲུལ་པ་ཡིན་ནམ། སངས་རྒྱས་ཀུན་གྱི་སྤྲུལ་པའི་ངོ་བོ་ཁྱོད་ཡིན་ནམ། གལ་ཏེ་སྐུ་གསུང་ཐུགས་ཀྱི་བདག་པོར་བསྡུས་པ་ཡིན་ ནམ།ཕྲིན་ལས་ཐམས་ཅད་ཀྱི་བདག་པོར་དབང་བསྐུར་བ་ཡིན་ནམ། བདག་ཁམས་གསུམ་རྣམ་པར་རྒྱལ་བ་དང་འཁོར་རྣམས་ཀྱིས་བྱ་བ། ལས་བསྐྱེད་རྫོགས་གྲོགས་དང་ལས་ཀྱི་ཚོགས་ལ་སོགས་པ་སྟོན་པའི་བསྟན་པ་སངས་རྒྱས་ཐམས་ཅད་ གཅིག་གི་ངོ་བོ་ལས་ཀྱི་བྱ་རྒྱུད་ཇི་ལྟ་བུ་ལགས།བདག་ཅག་གིས་བཀའ་ཉན་གྱི་ཁྱོད་ཀྱི་སྐུ་གསུང་ཐུགས་དྲག་པོར་བསྟན་པ་ནི། ལམ་ཉེ་བ་སྟེ་འཁོར་བ་ལས་མྱུར་དུ་སྒྲོལ་ཞལ་པའོ། །དེ་བདག་ཅག་འཁོར་དང་བཅས་པ་རྣམས་སྟོན་པས་གསུངས་པ་ཉན་ཏོ་ཞེས་པའི་ དོན་ཏོ།།ལེའུ་གང་ལ་མིང་དེ་ཡོད་པ་ལ་དེ་སྐད་ཅེས་བྱ་སྟེ། གླེང་གཞི་ཕུན་སུམ་ཚོགས་པ་ལྔ་ཡོད་པས། དེ་ལ་དང་པོ་གླེང་གཞིའི་ལེའུ་ཞེས་བྱའོ། །ལག་ནི་རྡོ་རྗེ་རྩ་བའི་རྒྱུད་ལས་གླེང་གཞིའི་ལེའུ་སྟེ་ལེའུ་དང་པོའི་བཤད་པའོ།། །།དེ་ལྟར་ གླེང་གཞི་བསྟན་ཀྱང་བསྐྱེད་རྫོགས་ཀྱི་དོན་མ་བསྟན་ན་འགྲུབ་པར་མི་འགྱུར་བས་ད་ནི་ལེའུ་གཉིས་པ་བསྟན་ཏོ།།དེས་ན་ལག་ན་རྡོ་རྗེས་རྡོ་རྗེས་རྡོ་རྗེ་དྲག་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་གསུངས་སོ་ཞེས་པ་ལ། དེ་ནས་ཞེས་བྱ་བ་ ལ།དེ་ནས་ཀྱི་སྒྲ་ནི་གླེང་གཞི་སོང་བའི་རྟིང་དེ་ནས། བར་ཅིས་ཀྱང་མ་ཆོད་པར་ལག་ན་རྡོ་རྗེའི་སྟོན་པ་སྐུ་གསུང་ཐུགས་དྲག་པོའི་ཆོས་གསུམ་གྱི་ཏིང་ངེ་འཛིན་ལ་སྙོམས་པར་བཞུགས་ཏེ་འདི་སྐད་གསུངས་ཞེས་བྱ་བར་སྦྱར་རོ། །ཕྱག་རྒྱ་གསང་སྔགས་ཐུགས་ སྦྱོར་ལ།།ཁྲོ་བོའི་རྒྱལ་པོ་བསམ་པར་བྱ། །ཁྲོ་བོ་རྡོ་རྗེའི་ཏིང་འཛིན་གྱི། །བྱིན་རླབས་ཡ་མཚན་སྣ་ཚོགས་ལྡན། །ཞེས་བྱ་བ་ལ། བླ་མ་གཅིག་ནས་གཅིག་ཏུ་བརྒྱུད་པའི་རིམ་པ། ཕྱག་རྒྱ་ནི་སྲུང་བ་དང་བསོད་ནམས་ཀྱི་ཚོགས་དང་ཡེ་ཤེས་དངོས་སམ་ གཞལ་ཡས་ཁང་བསྐྱེད་པ་ལ་སོགས་པའོ།།གསང་སྔགས་ནི་གཞལ་ཡས་ཁང་གི་ནང་དུ་སེང་གེ་དང་པདྨ་ལ་སོགས་པའི་སྟེང་དུ། སྙིང་རྗེའི་སྟོབས་ཀྱིས་ངོ་བོ་ཧཱུཾ་དུ་བྱུང་བའོ། །ཐུགས་སྦྱར་ནི་ཡིག་འབྲུ་ལས་ཕྱག་མཚན་དུ་གྱུར་པ་སྟེ། ལས་གཉིས་བྱས་པའོ། །དེ་ ལས་སྐུ་རྫོགས་པ་ནི།ཁྲོ་བོའི་རྒྱལ་པོ་སྟེ་རྡོ་རྗེ་རིགས་ཀྱི་ཁྲོ་བོའོ། །ཁྲོ་བོའི་མིང་ནི་གོས་སྔོན་ཅན། །དེ་མཐོང་ན་ནི་ཁྲོ་བོ་གཞན། །ཐམས་ཅད་ཀྱིས་ནི་ལག་ཆ་འཆོར། །ཞེས་གསུངས་པ་སྟེ། རི་རབ་ཏུ་གནོད་སྦྱིན་འདུལ་བའི་དུས་སུའོ། །དེ་རྣམས་ཀྱི་རྒྱལ་པོ་ཡིན་པའི་ཕྱིར་ རྒྱལ་པོའོ།།ཁྲོ་བོ་རྡོ་རྗེའི་ཏིང་འཛིན་ནི། །ོཾ་ཨཱཿཧཱུཾ་གིས་བསྡུས་པ་དང་། བསྲེག་པ་དང་སྦྱངས་པ་སྟེ། སྐུ་གསུམ་གྱི་ལྷར་བསྐྱེད་པའོ། །བྱིན་རླབས་ནི་ལྷག་པའི་ཡེ་ཤེས་བསྟིམ་པ་དང་། རིག་པའི་དབང་ལྔ་བསྐུར་ཏེ་སངས་རྒྱས་ལྡས་གཙོ་བོ་ལ་དབང་ རྟགས་སུ་བརྒྱན་པའོ།།བླ་མའི་རིགས་ལྷའི་རང་བཞིན། ཨཱཿཧཱུཾ་དཀར་དམར་གྱི་ངོ་བོ། གུ་ཧྱ་ཨ་བྷི་ཥིཉྩ་ཞེས་པས་ལྕེ་ལ་བཞག་ནས་གསུང་དབྱངས་ཡན་ལག་བརྒྱད་ཅུ་དང་ལྡན་ཏེ། ཨ་ཧོ་སུ་ཁ་ཞེས་བཏུང་བར་བྱའོ། །དེས་སྔགས་བཟླས་པ་དང་འབྲེལ་ཏོ། །ཡ་མཚན་ སྣ་ཚོགས་དང་ལྡན་པའི་དངོས་གྲུབ་ཐོབ་པའོ།།ཡང་མན་ངག་རྒྱ་ཆེན་པོ་དང་སྦྱར་ཏེ་བཤད་དེ། ཕྱག་རྒྱ་ནི་གཞལ་ཡས་ཁང་དང་གཙོ་བོ་བསྐྱེད་པ་བསྟན་ཏེ། དེ་ཡང་ཚོགས་བསགས་པ་དང་། ཚད་མེད་པ་བསྒོམ་པ་དང་། ཨོཾ་མ་ཧཱ་ཤཱུ་ནྱ་ཏཱ་རྨྱེཛྙཱ་ན་བཛྲ་སྭཱ་བྷཱ་བ་ཨཱཏྨ་ ཀོུ྅ཧཾ་ཞེས་པས་ཡེ་ཤེས་ཀྱི་ཚོགས་བསགས་ཏེ།དེ་ནས་བསྲུང་བ་བཞི་དང་པདྨ་ཡང་ཧཱུཾ་གི་ཆོ་འཕྲུལ་གྱིས་བསྐྱེད་པར་བྱའོ། །གསང་སྔགས་ནི་སྟོང་པ་ཉིད་དོ། །དེའི་བྱིན་རླབས་ཀྱི་ཡཾ་རཾ་བཾ་ལཾ་སུཾ་བྷཱུཾ་ལས་འབྱུང་བའི་དཀྱིལ་འཁོར་དང་། གཞལ་ཡས་ཁང་སྒོ་བཞི་པ་དུར་ ཁྲོད་བརྒྱད་དང་བཅས་པ་ཕྱིའི་རྒྱན་དང་ནང་གི་རྒྱན་གྱིས་མཛེས་པ་བསྐྱེད་དོ།།དེའི་དབུས་སུ་གདན་གྱིས་མཚན་པ་སྟེ། གཞལ་ཡས་ཁང་དེ་ཡང་རིན་པོ་ཆེ་ལྔ་ཡིས་བརྩིགས་པ་ལྷའི་སྣམ་བུ་དང་བཅས་པའོ། །དེར་ཧཱུཾ་གི་ཆོ་འཕྲུལ་གྱིས་ཆོ་ག་གསུང་གི་གཙོ་བོར་ཡབ་ཡུམ་ རྫོགས་པར་བསྐྱེད་པའོ།།དེ་ཡང་ཡུམ་ལ་ནི་བསྐྱེད་པ་མེད། ལུས་དང་གྲིབ་མ་བཞིན་དུ་རྫོགས་ཞེས་པའོ། །གསང་སྔགས་ནི་ཡབ་ཡུམ་གྱི། ཨེ་ལྦཾ་བྱིན་གྱིས་བརླབས་ཏེ་ཡབ་ཡུམ་སྙོམས་པར་ཞུགས་ཏེ། དེས་རིགས་ལྔ་ཡབ་ཡུམ་བསྐུལ་ཏེ་ཐིག་ལེ་དཀར་དམར་ གཞལ་ཡས་ཁང་གི་ནང་དུ་གསང་སྔགས་ཀྱི་ངོ་བོ་ཐིག་ལེ་དང་ཡིག་འབྲུ་བསམ་པའོ།།ཐུགས་ནི་དེ་ལས་ཕྱག་མཚན་དུ་གྱུར་པའོ། །ཁྲོ་བོའི་རྒྱལ་པོ་ནི་དེ་ལས་སྐུ་རྫོགས་པའོ། །ཁྲོ་བོ་རྡོ་རྗེ་ཏིང་འཛིན་ནི། གསང་བ་ནས་ལྷ་རྣམས་སྤྲོ་བ་བསྟན་ཏེ། ཨོཾ་བཛྲ་ཀྲོ་དྷ་ ནཱི་ལཱཾ་བ་ར་དྷ་ར་ཧཱུཾ།ོཾ་བུདྡྷ་ཀྲོ་དྷ་ནཱི་ལཱཾ་བ་ར་དྷ་ར་ཧཱུཾ། ཨོཾ་རཏྣ་ཀྲོ་དྷ་ནཱི་ལཱཾ་བ་ར་དྷ་ར་ཧཱུཾ། ཨོཾ་པདྨ་ཀྲོ་དྷ་ནཱི་ལཱཾ་བ་ར་དྷ་ར་ཧཱུཾ། ཨོཾ་ཀརྨ་ཀྲོ་དྷ་ནཱི་ལཱཾ་པར་དྷ་ར་ཧཱུཾ། ཨོཾ་ཏྲཻ་ལོཀྱ་བི་ཛ་ཡེ་ཧཱུཾ། ཨོཾ་མ་ཧཱ་ཀཱ་ལ་རོ་ཥ་ཎ་ཧཱུཾ། ཨོཾ་བི་རཱུ་ཊྷ་ཀ་ཡེ་ཧཱུཾ། ཨོཾ་བཻ་ཤྲ་བ་ཎ་ཡེ་ཧཱུཾ། ཨོཾ་བཛྲ་ལཱ་སྱེ་ཧཱུཾ། ཨོཾ་བཛྲ་ མཱ་ལེ་ཏྲཱཾ།ོཾ་བཛྲ་གཱི་ཏི་ཧྲཱིཿ། ཨོཾ་བཛྲ་ནརྀ་ཏི་ཨཿ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་པུཥྤེ་ཏྲཱཾ། ཨོཾ་བཛྲ་ཨཱ་ལོ་ཀེ་ཧྲཱི། ཨོཾ་བཛྲ་གནྡྷེ་ཨཿ། ཨོཾ་བཛྲ་ཨཾ་ཀུ་ཤ་ཛཿ། ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾ། ཨོཾ་བཛྲ་བྷཎྚེ་ཧོཿ།། ཨོཾ་བུདྡྷ་ཊཱ་ཀི་ཨ་ཧྲཱི་ཧཱུཾ། ཨོཾ་བཛྲ་ཌཱ་ཀི་ཨ་ཧྲཱི་ཧཱུཾ། ཨོཾ་རཏྣ་ཌཱ་ཀི་ཨ་ཧྲཱི་ཧཱུཾ། ཨོཾ་ པདྨ་ཌཱ་ཀི་ཨ་ཧྲཱི་ཧཱུཾ།ོཾ་ཀརྨཱ་ཌཱ་ཀི་ཨ་ཧྲཱི་ཧཱུཾ། ཡང་ན་ཀྲོ་དྷི་ཤྭ་རི་ཧཱུཾ་ཞེས་སྦྱར་བར་བྱའོ། ཞེས་བྱ་བའི་སྔགས་ཀྱིས་ཁྲོ་བོ་རྣམས་མཁའ་ནས་བཏོན་ཏེ། དབུས་ཀྱི་ཁྲོ་བོ་རང་སོར་སོང་ནས། གཞན་ཡང་། རང་རང་རིགས་ཀྱི་ཁ་དོག་ལ། །སྟག་དང་གོས་སྔོན་ཤམ་ཐབས་ཅན། ། རང་རང་རིགས་ཀྱིས་དབུ་རྒྱན་བྱས་པའོ། །ཁྲོ་བོ་རྡོ་རྗེ་ཏིང་ངེ་འཛིན་གྱིས་ཞེས་པ་ལ། ཤར་དུ་སངས་རྒྱས་གོས་སྔོན་ཅན། །ལྷོ་རུ་རིན་ཆེན་གོས་སྔོན་ཅན། །ནུབ་ཏུ་པདྨ་གོས་སྔོན་ཅན། །བྱང་དུ་ལས་ཀྱི་གོས་སྔོན་ཅན། །སངས་རྒྱས་སྤྱན་ལ་ཁྲོ་བོ་ཞལ། །ཕྱག་མཚན རྣམས་ནི་ཀུན་ཀྱང་གཡས་ན་རྡོ་རྗེ་དང་།འཁོར་ལོ་དང་། རིན་པོ་ཆེ་དང་། པདྨ་དང་། རྒྱ་གྲམ་བསྣམས་པ་ལ་གཡོན་པས་དྲིལ་བུ་བསྣམས་པའོ། །རྣམ་རྒྱལ་ནི་སྐུ་མདོག་དམར་པོ་འཁོར་ལོ་དང་དབྱུག་པ་བསྣམས་པའོ། །མགོན་པོ་ཡང་སྐུ་མདོག་ནག་པོ་དུད་ཀ་ལ་ཕྱག་ན་ རིན་པོ་ཆེ་དང་།ཙནྡན་བསྣམས་པ། འཕགས་སྐྱེས་པོ་ཡང་སྐུ་མདོག་སྔོན་པོ་ལ་ཕྱག་ན་མཆོད་རྟེན་དང་པདྨ་བསྣམས་པའོ། །རྣམ་ཐོས་སྲས་ཀྱང་སྐུ་མདོག་སེར་པོ་ལ། ཕྱག་ན་མཆོད་རྟེན་དང་ནེའུ་ལེ་བསྣམས་པའོ། །ལྷ་མོ་དང་སྒོ་བ་ཡང་རང་རང་གི་སྐུ་མདོག་དང་ཕྱག་མཚན་ བསྣམས་པའོ།།དེ་རྣམས་ལ་སྐུ་གསུང་ཐུགས་བྱིན་གྱིས་བརླབས་པ་ནི་ཡིག་འབྲུའམ། ཕྱག་མཚན་ནམ་སྐུས་བྱིན་གྱིས་བརླབ་ཅེས་པའོ། །བྱིན་རླབས་ནི་ཡེ་ཤེས་སེམས་དཔའ་མདུན་གྱི་ནམ་མཁའ་ལ་སྤྱན་དྲངས་ཏེ། བགེགས་བསྐྲད་པ་དང་མཆོད་ཡོན་དང་མཆོད་ པ་དང་བསྟོད་པ་བྱ་སྟེ།ལྕང་ལོ་ཅན་གྱི་ཕོ་བྲང་ནས། །བཅོམ་ལྡན་རྡོ་རྗེ་གོས་སྔོན་ཅན། །འོད་ཟེར་སྟོབས་ཀྱིས་ཀླུ་རྣམས་འདུལ། །མཐུ་སྟོབས་ཅན་ལ་ཕྱག་འཚལ་ལོ། །བཅོམ་ལྡན་སངས་རྒྱས་གོས་སྔོན་ཅན། །སྐུ་མདོག་དཀར་པོ་སྐྱོན་མ་གོས། ། འཁོར་ལོ་དྲིལ་བུ་ཕྱག་ན་བསྣམས། །མེ་ལོང་ཡེ་ཤེས་ཁྱོད་ཕྱག་འཚལ། །བཅོམ་ལྡན་རིན་ཆེན་གོས་སྔོན་ཅན། །སྐུ་མདོག་སེར་པོ་དོན་རྣམས་རྒྱས། །རིན་ཆེན་དྲིལ་བུ་ཕྱག་ན་བསྣམས། །མཉམ་ཉིད་ཡེ་ཤེས་ཁྱོད་ཕྱག་འཚལ། །བཅོམ་ལྡན་པདྨ་གོས་སྔོན་ཅན། །སྐུ་མདོག དམར་པོ་ཆགས་པར་ལྡན།།ཆུ་སྐྱེས་དྲིལ་བུ་ཕྱག་ན་བསྣམས། །ཀུན་རྟོག་ཡེ་ཤེས་ཁྱོད་ཕྱག་འཚལ། །བཅོམ་ལྡན་ལས་ཀྱི་གོས་སྔོན་ཅན། །སྐུ་མདོག་ལྗང་གུ་ཕྲིན་ལས་རྒྱས། །རྒྱ་གྲམ་དྲིལ་བུ་ཕྱག་ན་བསྣམས། །བྱ་གྲུབ་ཡེ་ཤེས་ཁྱོད་ཕྱག་འཚལ། །ཁྱམས་ ཀྱི་ཆ་ལ་གནས་པ་ནི།།ཁམས་གསུམ་རྒྱལ་དང་མགོན་པོ་གནག་།འཕགས་སྐྱེས་པོ་དང་རྣམ་ཐོས་སྲས། །སྤྲུལ་པ་སྐུ་ཡི་ཚུལ་བསྟན་པ། །སྟོང་པའི་རང་བཞིན་ཁྱོད་ཕྱག་འཚལ། །དཀར་མོ་སྒེག་དང་རིན་ཆེན་སེར། །བི་ཝང་མ་ནི་དམར་མོ་སྟེ། །ནརྀ་ཏི་ལྗང་གུ་ གར་རྣམས་བསྒྱུར།།སྟོང་པའི་དོན་གྱིས་ཚིམ་མཛད་པ། །མཆོད་པའི་ལྷ་མོ་ཁྱོད་ཕྱག་འཚལ། །ཤར་ལྷོ་ལྷ་མོ་བདུག་པ་སྟེ། །ལྷོ་ནུབ་མཐིང་ག་མེ་ཏོག་མ། །ནུབ་བྱང་དམར་མོ་གསལ་བྱེད་མ། །བྱང་ཤར་ལྗང་གུ་དྲི་ཆབ་མ། །ཕ་རོལ་ཕྱིན་བཅུ་རྫོགས་མཛད་ཅིང་། །འདོད་ པའི་དོན་གྲུབ་ཕྱག་འཚལ་བསྟོད།།ལྕགས་ཀྱུ་ཞགས་པ་ལྕགས་སྒྲོག་དྲིལ། །བདུད་བཞི་མ་ལུས་ཚར་གཅོད་ཅིང་། །ཕྲིན་ལས་རྣམ་བཞི་ལྷུན་གྲུབ་པ། །སྒོ་བ་བཞི་ལ་ཕྱག་འཚལ་བསྟོད། །སངས་རྒྱས་མཁའ་འགྲོ་དཔལ་འབར་མ། །སྨུག་ནག་འབར་བའི་རལ་པ་ ཅན།།རྡོ་རྗེ་མཁའ་འགྲོ་དཔལ་འབར་མ། །མཐིང་ནག་འབར་བའི་རལ་པ་ཅན། །རིན་ཆེན་མཁའ་འགྲོ་དཔལ་འབར་མ། །སེར་ནག་འབར་བའི་རལ་པ་ཅན། །པདྨ་མཁའ་འགྲོ་དཔལ་འབར་མ། །དམར་ནག་འབར་བའི་རལ་པ་ཅན། །ལས་ཀྱི་མཁའ་འགྲོ་ དཔལ་འབར་མ།།ལྗང་ནག་འབར་བའི་རལ་པ་ཅན། །སྟོང་པ་བཞི་ཡི་རང་བཞིན་ཅན། །སྤྲུལ་པའི་སྐུ་ཡི་ཚུལ་སྟོན་པ། །ཕྱག་ན་ཅང་ཏེའུ་ཁ་ཊྭཱཾ་བསྣམས། །མཁའ་འགྲོ་རྣམས་ལ་ཕྱག་འཚལ་ལོ། །ཞེས་པས་བསྟོད་ལ་སྔགས་བཞིས་གཉིས་སུ་མེད་པར་ བསྟིམ་མོ།།དབང་ཡང་སྔ་མ་བཞིན་དུ་བླང་བ་སྟེ། །གོང་དུ་བསྟན་པ་འདིར་མི་བཤད་དོ། །དེས་གཏོར་མ་དང་བསྟོད་པ་ཐུན་གྱི་བར་དུ་བྱས་ཏེ། བཟླས་པ་བྱ་བ་ནི། རིན་པོ་ཆེའི་ཕོ་བྲང་དུ་སེམས་པ་སུམ་བརྩེགས་གསལ་བར་བྱས་ཏེ། གྲངས་ཀྱི་བསྙེན་པ་བསྐྱལ་ ཞེས་པ་སྟེ།མཚན་མ་དང་དུས་ཀྱང་ཡོངས་སུ་ཤེས་ཤིང་གཟུང་ངོ་། །ཐུན་གྱི་རྣལ་འབྱོར་གྱི་སྤྱོད་པའི་སྐབས་སུ་ལམ་གྱི་སེམས་བསྐྱེད་ཀྱང་བསྒོམ་ཞིང་བཟླས་སོ། །སྭཱ་ཧཱ་ཧཱུཾ་ཕཊ་ཅེས་བརྗོད་ཅིང་ཡོངས་སུ་སྨིན་པར་བྱའོ། །སྨོན་ལམ་དགེ་རྩ་བསྔོ་ལེགས་པས་ཚེ་འདི་ལ་ནད་ དང་སྡུག་བསྔལ་བྱང་སྟེ།ཐུན་མོང་ཀུན་གྱི་དངོས་གྲུབ་འབྱུང་། །ཞེས་བླ་མ་རྣམས་གསུང་ངོ་། །དེ་ནི་ཡ་མཚན་སྣ་ཚོགས་ལྡན། །ཞེས་པའོ། །ལས་རྣམས་གྲུབ་ལ་ཐེ་ཚོམ་མེད། །ཞི་རྒྱས་དབང་དང་དྲག་པོ་སྟེ། །གསད་རྨོངས་སྣ་ཚོགས་ངེས་པར་གྲུབ། །དེ་ཉིད་ངེས་ འགྲུབ་གདོན་མི་ཟ།།ཞེས་པ་ལ་གོང་དུ་བསྟན་པ་བཞིན་བསྒྲུབས་ན། ལས་སྣ་ཚོགས་ཞི་བ་དང་རྒྱས་པ་འགྲུབ་པར་ཐེ་ཚོམ་མི་ཟ་སྟེ། རྩ་བ་ན་གསལ་བས་མ་བྲིས་སོ། །དེས་ན་དཀྱིལ་འཁོར་དེ་ལ་གཙོ་བོའི་དབང་དུ་བྱས་ཏེ། ལྷ་གཅིག་དང་། གཉིས་དང་། གསུམ་དུ་ སྒྲུབ་པ་དང་།ལྷ་བཅུ་དང་། བཅོ་བརྒྱད་ཉི་ཤུ་རྩ་གཉིས་དང་། རྩ་དྲུག་སུམ་ཅུ་ལྔའི་དཀྱིལ་འཁོར་ལྔ་དང་ནི། མཁའ་འགྲོ་བཞིའི་དཀྱིལ་འཁོར་དང་དྲུག་ཏུ་འགྱུར། རང་དང་གཞན་གྱི་དཀྱིལ་འཁོར་དུ་བླ་མ་མཁས་པ་རྣམས་ཀྱིས་བསྟན་ཏོ། །དེ་དག་བསྟན་པ་ཀུན་ལ་ཡང་། ། ཚོགས་བསགས་བསྲུང་དང་ལྷ་བསྐྱེད་པ། །ཆོ་གའི་སྦྱོར་བ་མཁས་པས་བྱ། །ཞེས་པ་སྟེ། བླ་མའི་མན་ངག་ལ་རག་ལས་པའོ། །ཡང་ཤི་བ་ལ་ཕན་གདགས་པའི་ཕྱིར། ཕྱག་རྒྱ་གསང་སྔགས་གསུངས་ཏེ། རྒྱས་པར་རོ་བསྲེག་ཆོ་ག་ནས་ཤེས་པར་བྱའོ། ། འདིར་དང་པོར་རོ་ལ་ཁྲུས་བྱས་བགེགས་བསྐྲད། གོས་དང་རྒྱན་བཟང་པོ་བཏགས་ནས། རྒྱུན་འཆགས་དང་སྡོམ་པ་བཟུང་བ་ཡང་གཉེན་འདུན་ནམ་ཕ་མས་བྱ་སྟེ། རོལ་བསྲུང་བ་དང་བསྙེན་པ་བྱ་སྟེ། ཕྱི་རོལ་དུ་ས་ཆོག་རྒྱས་བསྡུས་གང་རུང་བྱ་སྟེ། དཀྱིལ་འཁོར་གྲུ་བཞི་མཐའ་ཡས་པར་བྱ་སྟེ། ཐིག་གི་ཆོ་གས་ཐིག་གདབ་སྟེ། དབུས་དང་ཚངས་ཐིག་བཏབ་ལ་ཐིག་ཆེན་དང་ཆ་ཆེན་དང་ཆ་བྲན་ལེགས་པར་བཏབ་ལ། ས་ཚོན་བྱིན་གྱིས་བརླབས་ལ། དཀྱིལ་འཁོར་སྒོ་གཉིས་རྩིག་པ་རྒྱན་དང་བཅས་པ་བྲི་ཞེས་པའོ། ། ལུང་ལས། ཤི་ལ་ཕན་གདགས་དོན་ཆེད་དུ། །ས་ཆོག་རྫོགས་པའི་དཀྱིལ་འཁོར་བརྩམ། །སྒོ་གཉིས་རྫོགས་ནས་རྒྱན་རྣམས་མཛེས། །མཆོད་དང་གཏོར་མ་ཡོངས་སུ་བཏང་། །ཞེས་གསུངས་སོ། །དེ་ནས་མཆོད་པའི་ཡོ་བྱད་གཏོར་མ་ཆ་གཉིས་ལ་སོགས་པ་རྫོགས་ལ། དཀྱིལ་འཁོར་དབུས་སུ་ཐབ་བརྩིགས་ལ། རོ་ཤིང་རྟའི་འཁོར་ལོས་སྤྱན་དྲངས་ཏེ། རྔ་དང་དུང་དང་པི་ཝང་ཆེན་པོ་དང་བཅས་པའི་སིལ་སྙན་དང་རོལ་མོས་སྣ་དྲངས་ཏེ། དབང་གི་བུམ་པས་ཁྲུས་བྱེད་ཅིང་། བཅོམ་ལྡན་རྡོ་རྗེ་གོས་སྔོན་ཅན། །སྐུ་གསུང་ཐུགས་ཀྱི་བྱིན རླབས་ཀྱིས།།གཤིན་ལ་ཕན་གདགས་དོན་ཆེད་དུ། །དབང་བསྐུར་བྱིན་རླབས་མཛད་དུ་གསོལ། །ོཾ་སརྦ་ཏ་ཐཱ་ག་ཏ་ནཱི་ལཱཾ་བ་ར་དྷ་རཤུདྡྷཿཤུདྡྷོུ྅ཧཾ་ཞེས་བརྗོད་དོ། །བསྲེག་ཁང་ལ་བསྐོར་བ་བྱས་ཏེ་རོ་བསྲེག་ཁང་དུ་བཞག་ལ། རང་སེམས་བསྐྱེད་པ་དང་སྡོམ་པ་ག ཟུང་བ་དང་ལྷག་པའི་ལྷའི་ཏིང་ངེ་འཛིན་བསྒོམས་ལ།བདེ་བར་གཤེགས་པ་སྤྱན་དྲང་བ་དང་། བཞུགས་སུ་གསོལ་བ་ཡན་ཆོད་བྱ་སྟེ། རྡུལ་ཚོན་གྱི་སྟེང་གི་ནམ་མཁའ་ལ་མཆོད་པ་དང་། ཕྱག་འཚལ་བ་དང་རིན་པོ་ཆེ་སྣ་བདུན་དང་རྡོ་རྗེ་ལྷ་མོས་མཆོད་པ་དང་། བསྟོད་པ་ལ་ སོགས་པ་ཡང་ཡོངས་སུ་རྫོགས་པར་བྱས་ལ།བསང་གཏོར་དང་འབྱུང་པོ་ཐམས་ཅད་པའི་གཏོར་མ་བྱིན་གྱིས་བརླབས་པ་དང་མགྲོན་བསྐྱེད་པ་དང་། གཏོར་མ་དབུལ་བ་ལ་སོགས་པ་བྱའོ། །ཚངས་པ་ཆེན་པོ་མི་མཇེད་ཀྱི་བདག་པོ་གཟུགས་ཁམས་ལྷ་ཚོགས་ཞེས་བྱ་ བ་ལ་སོགས་པའི་ཚིགས་བཅད་ཡང་ཕྱི་རྒྱུད་བཞིན་བརྗོད་པར་བྱའོ།།དེ་བཞིན་དུ་གཏོར་མ་གཉིས་པ་ཡང་དགའ་བའི་ཚལ་དང་། ལྷ་རྣམས་སྤྱན་དྲང་བ་དང་བྱིན་གྱིས་བརླབས་པ་དང་བསྟོད་པ་དང་སྔགས་ཀྱིས་དབུལ་བ་ལ་སོགས་པ་བྱའོ། །གཏོར་མ་ཕུལ་ཏེ། ངན་སོང་ ཡོངས་སུ་སྦྱོང་བའི་སྔགས་དང་།ཡེ་ཤེས་པའི་འོད་ཟེར་གྱིས་གཤིན་གྱི་ལས་སྦྱང་བ་ལ་སོགས་པ་བྱ་ཞེས་སོ། །ཐ་མར་གཤིན་དང་ཡོངས་སུ་འབྲེལ་པའི་སྨོན་ལམ་བཏབ་ལ་རུས་བུ་ཚ་ཚར་ཡོངས་སུ་གདབ་པར་བྱ་ཞེས་འབྲེལ་ཏོ། །དེ་ནི་བྱིན་བརླབས་མཚན་སྣ་ཚོགས་ དང་།དེ་ཉིད་ངེས་འགྲུབ་གདོན་མི་ཟ། །ཞེས་བྱའོ། །ཡང་། ཕྱག་རྒྱ་གསང་སྔགས་ཐུགས་སྦྱོར་ལ། །ཞེས་པ་ལ། གསང་བའི་དབང་དང་གསུམ་པ་དང་བཞི་པ་དང་རྩ་རླུང་ཐིག་ལེ་དང་། བྱང་ཆུབ་ཀྱི་སེམས་དང་རིམ་པ་ལྔ་ལ་སོགས་ཡང་སྦྱར་བར་ཤེས་པར་བྱའོ། །རང་ གཞན་འཕགས་དང་བླ་མ་དང་།།ཤིན་ཏུ་བླ་མ་དམ་པ་མཆོད། །དངོས་གྲུབ་མྱུར་དུ་འབྱུང་ཞེས་པ་ལ། རང་ངམ་གཞན་གྱིས་འཕགས་པ་སྟེ། དཀོན་མཆོག་གསུམ་མམ། རང་གི་ལྷག་པའི་ལྷ་ལ་དངོས་སམ་ཡིད་ཀྱིས་མཆོད་ཅེས་པའོ། །བླ་མ་ནི་སྡེ་སྣོད་གསུམ་ སྟོན་པའི་བླ་མ་སྟེ།བྱིན་གྱིས་རློབ་པ་དང་འདྲེན་པ་ཡང་ཡོངས་སུ་གསུང་ངོ་། །ཤིན་ཏུ་བླ་མ་དམ་པ་ནི་གསང་བ་བླ་ན་མེད་པའི་སློབ་དཔོན་ཏེ། དེ་ལ་དངོས་སམ་ཡིད་ཀྱིས་མཆོད་ན། འདོད་པའི་དོན་མྱུར་ཞེས་པའོ། །ཚིག་གསུམ་གྱིས་ནི་བསྐྱེད་པའི་སྐབས་སུ། ཚོགས་པའི་ཆོ་ག་བསྟན་ཏོ། །གལ་ཏེ་གཞན་ལ་ཕན་འདོགས་ན། །སྐུ་དེ་སྣ་ཚོགས་སྐུ་རུ་སྣང་། །སྣང་བ་སྒྱུ་མའི་སྐུ་ཡིན་ཏེ། །ཞེས་པ་ལ། གཞན་ལ་ཕན་འདོགས་པ་ནི་སྤྲུལ་སྐུའོ། །སྐུ་དེ་སྣ་ཚོགས་སྐུ་རུ་སྣང་། །ཞེས་པ་ལ། གང་དང་གང་འདུལ་བ་དེ་དང་དེ་རུ་སྣང སྟེ།དེས་དེའི་དོན་བྱེད་ཅེས་པའི་དོན་ཏོ། །ལྷའི་དཀྱིལ་འཁོར་དུ་སྣང་བ་ཡོད་པ་མ་ཡིན་ཏེ། སྒྱུ་མའམ་རྨི་ལམ་དུ་སྣང་གིས་དོན་དམ་པ་ལ་མེད་ཅེས་བྱའོ། །འོ་ན་སྒོ་མེད་ན་སྣང་བར་མི་རིགས་སོ་སྙམ་ན། གདུག་པ་འདུལ་ཕྱིར་རགས་པའི་སྐུར་སྟོན་ཏོ། །སྣ་ཚོགས་དེ་ ཉིད་བསམ་བྲལ་བས།།དངོས་གཞི་ཐར་པར་ཡང་དག་གཅིག་།ཅེས་པ་ལ། སྣ་ཚོགས་དངོས་པོའི་དོན་ཏོ། །བསམ་པ་ནི་ཤེས་པའོ། །ངོ་བོ་ནི་སྣ་ཚོགས་པར་སྣང་བའོ། །དེ་ཡང་ལུང་ལས། ཆུ་རྡུལ་འཛའ་ཡི་སྣང་བ་བཞིན། །སེམས་ཉིད་དངོས་ པོ་ཡུལ་དུ་སྣང་།།ཞེས་པའོ། །འོ་ན་སེམས་ཉིད་དངོས་པོར་བདེན་ནམ་སྙམ་པ་ལ་ཤེས་པར་སྣང་ཡང་ཤེས་པར་མི་བདེན་ཏེ། རིགས་པས་བརྟགས་ན་སྣང་བ་ཉིད། །དངོས་པོ་སྟོང་པ་ཉིད་ཅེས་གསུངས་སོ། །སྟོང་པ་ཡང་བདེ་བ་དང་སྣང་བའོ། །སྣང་བ་ཡང་བདེ་སྟོང་དེ་ བཞིན་ཉིད།ཐར་པར་ཡང་གཅིག་ནི་བདེན་པ་ཉིད་ལས་འདས་ཏེ་དངོས་པོ་ལ་བདེན་པ་གཉིས་པོ་ཡང་མ་བསྟན་ཅེས་བྱའོ། །གཉིས་སམ་གཅིག་ཏུ་ཡང་མ་གྲུབ་པ་སྟེ། །གཉིས་མེད་བསམ་བྲལ་དངོས་ཀྱི་དོན། །ཞེས་གསུངས་སོ། །དེས་ན། སྣ་ཚོགས་སེམས་ཀྱི་ཆོ་འཕྲུལ་ཏེ། ། སེམས་ལས་མ་གཏོགས་ཆོས་གཞན་མེད། །ཆོས་སུ་སྣང་བ་འཁྲུལ་པའི་སེམས། །སེམས་ཉིད་དེ་ཡང་སྐྱེ་མེད་ཕྱིར། །ཡོད་མེད་མཐའ་ལས་འདས་པའོ། །བསམ་དུ་མེད་དེ་བརྗོད་དུ་མེད། །མིང་མེད་ཚིག་མེད་ཡི་གེ་མེད། །ཅེས་གསུངས་སོ། །ལེའུ་གཉིས་པ་ནི་གྲངས ཀྱི་གཉིས་པའོ།།ལག་ན་རྡོ་རྗེ་རྩ་བའི་རྒྱུད་ལས་ལེའུ་གཉིས་པའི་བཤད་པའོ།། །།དེ་ལྟར་ལེའུ་གཉིས་པར་བདག་དོན་དང་གཞན་དོན་བསྟན་ཡང་། གོས་སྔོན་པོ་ཅན་གྱི་རྩ་བའི་སྔགས་དང་། མཐའ་སྒྱུར་མ་ཤེས་ན། གྲུབ་པར་མི་འགྱུར་བས། དེའི་ཕྱིར་དེ་ལ་དེ་སྟོན་ཏོ། །དེ་ ནས་ཡང་འཁོར་གྱི་ནང་ནས་ཁྲོ་བོ་ཁམས་གསུམ་རྣམ་པར་རྒྱལ་བ་ལངས་ནས།བླ་གོས་ཕྲག་པ་གཡས་སུ་སྦྱར་ནས་འདི་སྐད་གསོལ་ཞེས་སྦྱར་རོ། །མཐའ་ཡང་གསུངས་པ་གང་། གཞན་ཡང་གསང་སྔགས་སྦྱོར་བ་ཡིས། །ད་ཧ་བསྲེགས་སོགས་གསང་སྔགས་ ཀྱི།།ཐོགས་མེད་ལས་རྣམས་འགྲུབ་པ་ཡིན། །ཞེས་པ་ལ། གཞན་ཡང་གསང་སྔགས་སྦྱོར་བ་ནི། །ཞེས་པ་ལ། ཞི་གནས་དང་ཏིང་ངེ་འཛིན་གྱི་ལས་མ་ཡིན་ཏེ། རྩ་སྔགས་དང་ལས་འགྲུབ་པ་དང་། ཤམ་བུའི་སྔགས་བསྟན་ཏོ། །ད་ཧ་ཞེས་པས་སྔགས་སྔོན་དུ་ བསྟན་ཏེ་སྲེག་པར་བྱེད་པ་རྩ་བའི་སྔགས་དང་།ད་ཧ་ད་ཧ་པ་ཙ་ཞེས་གསུངས་སོ། །ཐོགས་མེད་ལས་རྣམས་འགྲུབ་པ་ནི། །ལྷའི་ང་རྒྱལ་དང་ལྡན་པས་སྔགས་བཟླས་ན། གང་ལ་བྱ་བ་འགྲུབ་སྟེ། དཔེར་ན་གནམ་ལས་ལྕེ་འབབ་པ་བཞིན་ནོ། །གཉིས་ཀྱི་འོག་མ་གསུམ་ པར་བརྒྱན།།དེ་ལ་གཉིས་ཀྱི་གོང་ལྡན་པས། །ཟུང་རབ་ཟུང་མིང་དང་ལྡན་པ། །ཡང་མིང་སྐུལ་དང་བསམ་གཏན་ནི། །ལྕགས་ཀྱུ་སྦྱོར་བས་རབ་ཏུ་བྱ། །ཞེས་པ་ལ། གཉིས་ཀྱི་འོག་མ་ནི་ཤེས་རབ་ཀྱི་ཡི་གེ་གཉིས་པའོ། །གསུམ་པ་ཐབས་ཀྱི་ཡི་གེ་རིང་པོར་གསུམ་པའོ། ། བརྒྱད་ནི་དྲུག་པ་གཉིས་པའོ། །དེ་ལ་གཉིས་ཀྱི་གོང་ལྡན་པ་ནི། ཐབས་ཀྱི་ཡི་གེ་ཟད་པའོ། །གོང་མ་ནི་ཧའོ། །ལྡན་པ་ནི་ཐབས་ཀྱི་གསུམ་པའི་མཐའོ། །གྲྀཧྞ་གྲྀཧྞ་སྟེ་ཟུང་རབ་ཏུ་ཟུང་བའོ། །ཡང་མིང་ཆེ་གེ་མོ་ཞེས་བྱ་བའོ། །བསམ་གཏན་ནི་ལྕགས་ཀྱུ་ཐོགས་པའི་ཁྲོ་བོ རྣམས་སོ།།རང་གི་ལག་པས་ལྕགས་ཀྱུའི་ཕྱག་རྒྱ་བཅའ། །ཞེས་པའོ། །སྔགས་ནི་དངོས་སུ་བས་ཏེ། ལྷའི་ང་རྒྱལ་དང་ལྡན་པས། གོང་གི་སྔགས་བཟླས་པས་འགུགས་པས་ཐོགས་མེད་པ་ཞེས་པའོ། །མཇུག་རྫོགས་གོང་དང་གསུམ་པའི་མཐའ། །ལན་གཉིས་ གོང་བཞིན་བརྡེག་སྔགས་ཤེས།།ཞེས་པས་མཇུག་རྫོགས་ཤྐ་གསུམ་པ་ཐབས་ཀྱི་ཡི་གེ་ཁོ་ནའོ། །གོང་ནི་ཧའོ། །གཉིས་གོང་བཞིན་ནི་ཧ་ན་ཧ་ན་ཞེས་བརྗོད་པས། རང་དང་འབྲེལ་པའི་སྔགས་བརྗོད་པས་རལ་གྲི་དང་མཚོན་ཐོགས་པའི་ཁྲོ་བོ་རྣམས་ཀྱིས་གནད་སར་མཚོན་ རྒྱོབ་ཅིག་པའོ།།གསུམ་པའི་དང་པོའི་གཉིས་པ་དང་། །གོང་གི་དྲུག་པའི་ཐབས་ཡིག་ལྡན། །ལྡན་གཉིས་གོང་བཞིན་རྟོགས་བྱེད་སྔགས། །ཞེས་པ་ལ། གསུམ་པའི་དང་པོ་ནི་ཕོ་ཡིག་ཊའོ། །གཉིས་པ་ནི་ཐའོ། །གང་གི་དྲུག་པ་ནི་ཕོ་ཡིག་ཡའོ། །ལན་གཉིས་ གོང་བཞིན་བརྡེག་སྔགས་ཤེས་ནི།ཐོ་བ་དང་ཐོག་དང་། རྡོ་རྗེ་རྣམས་ཀྱིས་རྡུངས་རབ་ཏུ་རྡུངས་ཤིག་པའོ། །གཉིས་དང་ལྡན་པའི་དང་པོ་ལ། །དྲག་པོའི་དགའ་བའི་ས་བོན་ལྡན། །ལན་གཉིས་ལན་བཏུས་ལས་འགྲུབ་པར། །གོང་མ་བཞིན་དུ་འཚོད་བྱེད་དོ། ། ཞེས་པ་ལ། གཉིས་པ་ནི་ཐབས་ཀྱི་སྟེ། གཙོ་བོ་དང་པོ་སྟེ་གོང་བཞིན་དུ་ཤེས་པར་བྱའོ། །ལྔ་པའི་དང་པོའོ། །དྲག་པོ་དགའ་བ་ནི་ཧའོ། །ལན་གཉིས་ནི་པ་ཙ་ཧ་ཞེས་པ་སྤུན་གཉིས་སོ། །ལས་འགྲུབ་པ་ནི་གང་བྱས་པ་དེ་འགྲུབ་པའོ། །འཚོད་བྱེད་ནི་མཚོན དང་ཐོ་བས་ཤིན་ཏུ་ཚོས་པར་སྲེགས་ཤིག་པའོ།།ལེའུ་གསུམ་པ་ནི་གྲངས་ཀྱི་གསུམ་པའོ། །ལག་ན་རྡོ་རྗེ་རྩ་བའི་རྒྱུད་ལས་ལེའུ་གསུམ་པའི་རྒྱ་ཆེར་བཤད་པའོ།། །།དེ་ལྟར་སྔགས་བཏུ་བ་བཤད་ཀྱང་རྩ་བའི་སྔགས་དང་ཤམ་བུ་མ་བསྟན་ན་གང་ལ་བྱ་བ་མི་འགྲུབ་ པས།དེ་ལ་དེ་བསྟན་ཏོ། །དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་ཅན་སྣ་ཚོགས་མངོན་པར་བསྒྲུབ་པའི་ཏིང་ངེ་འཛིན་ལ་སྙོམས་པར་ཞུགས་ནས། དེ་སྐད་གསུངས་སོ་ཞེས་པ་ལ། འཕགས་པ་ལག་ན་རྡོ་རྗེ་ནི་སྤྲུལ་སྐུ་གཞན་ལས་བྱ་བ་ཁྱད་པར་འཕགས་ པ་སྟེ།དེ་ནི་ལག་ན་རྡོ་རྗེ་སྟེ། ཉོན་མོངས་པ་དང་ཤེས་བྱའི་སྒྲིབ་པ་ཡོངས་སུ་སྤངས་པས་ན་ལག་ན་རྡོ་རྗེ་འཕགས་ཞེས་པའོ། །སྣ་ཚོགས་སྔོན་པོའི་སྐུ་གསུམ་སྣ་ཚོགས་པའི་ཏིང་ངེ་འཛིན་ལ་སྙོམས་པར་ཞུགས་པ་ནི། ལས་ཀུན་འགྲུབ་པའི་སྔགས་འདི་གསུངས་སོ། །སྔགས་ འདི་སྔོན་དུ་བས་ཏེ་འཕགས་པ་ལག་ན་རྡོ་རྗེ་གྲུབ་པའི་སྔགས་འདི་རྒྱུན་དུ་བཟླས་ཞེས་པའོ།།རྒྱུན་དུ་རྩ་བའི་གསང་སྔགས་བཟླས། །གདོན་དང་སྡུག་བསྔལ་ཐམས་ཅད་ལས། །ཐར་པར་འགྱུར་བ་གདོན་མི་ཟ། །ཞེས་གསུངས་སོ། །གང་ཞིག་འདི་འཛིན་རྣལ་འབྱོར་དེ། ། ཉེས་པ་ཀུན་ལས་རབ་ཏུ་ཐར། །ལེགས་པའི་ཡོན་ཏན་ཐམས་ཅད་ཐོབ། །ཅེས་པ་ལ། གང་ཞིག་འདི་འཛིན་པ་ནི་སྒྲུབ་པ་པོར་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་སྔགས་འདི་འཛིན་ན། དེ་རྣལ་འབྱོར་ཏེ་སྟོང་པའི་དོན་དང་ལྡན་ཞེས་པའོ། །ཉེས་པ་ནི་ངན་འགྲོ་དང་། སྡུག་བསྔལ་གསུམ་མམ་བརྒྱད་དང་ནད་དེ་ལས་ཐར་པའོ། །ལེགས་པའི་ཡོན་ཏན་ནི་སངས་རྒྱས་ཀྱི་ཡོན་ཏན་ཐམས་ཅད་ཐོབ་ཅེས་པའོ། །འབྲས་བུ་ཡང་དག་མངོན་པར་འགྲུབ། །སྔགས་འདི་གང་ཡིན་མིང་ཡིན་ཏེ། །གདུལ་བྱ་མཐའ་དང་ལྡན་པ་ལ། །ཐ་མ་ལས སྔགས་མཐའ་དང་ལྡན།།ཞེས་པ་ལ། འབྲས་བུ་ཡང་དག་མངོན་པར་འགྲུབ་ནི། མཆོག་གི་ཡོན་ཏན་དང་ཐུན་མོང་འགྲུབ་ཅེས་པའོ། །སྔགས་འདི་གང་ཡིན་མིང་ཡིན་ན། །དོན་དམ་པའི་མིང་ཡིན་ཏེ། །ཀུན་རྫོབ་ཏུ་ཕྱག་ན་རྡོ་རྗེའོ། །གདུལ་བྱའི་མཐའ་ནི་ཆེ་གེ་མོ། ། ཞེས་པ་དང་། ཕྲིན་ལས་བཞི་ཡི་སྔགས་འབྲེལ་པས། །རྩ་སྔགས་བསྡོངས་པ་དེ་འགྲུབ་པོ། །ཞེས་པའི་དོན་ཏོ། །ལེའུ་བཞི་པ་ནི་གྲངས་ཀྱི་བཞི་པའོ། །ལག་ན་རྡོ་རྗེ་རྩ་བའི་རྒྱུད་ལས་ལེའུ་བཞི་པའི་རྒྱ་ཆེར་བཤད་པའོ།། །།རྩ་བའི་སྔགས་དང་ཤམ་བུ་བསྟན་ཀྱང་། ། ཀླུའི་ནད་དབྱུང་བའི་གཉེན་པོ་མ་བསྟན་ན་འགྲུབ་པར་མི་འགྱུར་བས། དེ་ལ་དེ་བསྟན་ཏོ། །དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་ཅན་འོད་ཟེར་མངོན་པར་འགྲུབ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་གསུངས་སོ་ཞེས་བྱ་བ་ལ། འཕགས་པ་ནི་གོང་དུ བསྟན་པས་འདིར་མ་བཤད་དོ།།དེ་ལ་ཁམས་གསུམ་རྣམ་པར་རྒྱལ་བས་ཞུས་ཏེ། དེ་ནས་སྟོང་པས་འོད་ཟེར་ནི་འབྱུང་བ་ལྔའི་འོད་ཟེར་ནུས་པ་དང་ལྡན་པ་དེ་ལ་སྙོམས་པར་ཞུགས་ཏེ། ཀླུའི་ནད་དབྱུང་བའི་ཆོས་འདི་གསུངས་ཞེས་སྦྱར་བར་བྱའོ། །འབྱུང་བཞི་སངས་རྒྱས་ རབ་བསྒོམས་ན།།སོ་སོ་ལས་ཀྱི་སྒོམ་པ་ནི། །མེ་བརྒྱད་རླུང་གཉིས་ལྡན་པར་བསམ། །ཆུ་བརྒྱད་དངོས་པོ་དེ་ཡིན་ཏེ། །དེ་བཞིན་ས་བརྒྱད་ཧཱུཾ་འབྲས་ལྡན། །ཞེས་བྱ་བ་ལ། འབྱུང་བཞིའི་སངས་རྒྱས་ནི་ཆུའི་རྡོ་རྗེ་གོས་སྔོན་ཅན་ལ་སོགས་པའོ། །སོ་སོ་ལས་འབྱུང་བའི་ སྒྲ་འཐབ་པ་དང་།ལུགས་བཞིན་གསོ་བའོ། །སྔགས་ཀྱང་རཾ་དང་པཾ་དང་ལཾ་དང་ཡཾ་ཞེས་རང་རང་གི་གཉེན་པོ་གནས་བརྒྱད་དུ་ཡིག་འབྲུ་བསྒོམས་ཏེ་རང་གི་སྔགས་བཟླས་ཞེས་པ་དང་འབྲེལ་ཏོ། །འབྱུང་བཞི་ནི་ལས་ཐ་དད་པ་སྣང་བ་མཐའ་ཡས་ཀྱི་དབང་དུ་བྱས་ཏེ་གནས། རྐང་ མཐིལ་གཉིས་དཔྱི་མིག་གཉིས་ལག་པ་གཉིས་མདོམས་དང་མགྲིན་པ་བརྒྱད་དུ།རཾ་ལས་འབྱུང་བའི་གྲུ་གསུམ་དམར་སེར་བརྒྱད་བསྒོམས་ནས། ནད་སེལ་བ་དང་། ཡཾ་ལས་རླུང་བརྒྱད་ཀྱིས་འཐོར་བ་དང་། བཾ་ལས་ཆུ་བརྒྱད་ཀྱིས་འཁྲུ་བ་དང་། །ལཾ་ལས་ས་གཞི་སེར་པོ་ བརྒྱད་ཀྱིས་བརྟན་པར་བྱ་སྟེ།རིན་ཆེན་འབྱུང་ལྡན་བརྒྱད་བསམས་ཏེ་བརྟན་པའི་དོན་ཏོ། །དེ་བཞིན་དུ་འབྱུང་བ་གཞན་ལ་ཡང་དེ་ལྟར་སྣང་ཞེས་གསུངས་སོ། །ལུགས་གཅིག་ལ་འབྱུང་བ་བཞིའི་རང་བཞིན་ནུས་པ་སྒྲུབ་པ་ལས་བསྟིམས་པར་སྟོན་ཏེ། རླུང་ བརྒྱད་མེ་གཉིས་ལྡན་པ་ནི།།མེ་གཉིས་རང་དང་ཁྱད་པར་གྱི་མེ་སྟེ་ལས་དང་བག་ཆགས་སད་པར་བྱེད་པའི་དོན་ཏོ། །རླུང་ཡང་སྟེང་དང་འོག་གི་དེས་ནི་མེའི་སྔགས་གསུམ་བསྲེས་ཏེ་བཟླས་པས་འགྲུབ་སྟེ་ཁྱད་པར་དུ་མཛེ་ནད་དོ། །མེ་གཉིས་པོ་ཡང་ཟབ་པའི་ཕྱིར་བླ་མའི་ མན་ངག་ལ་རག་ལས་པས་འདིར་མ་བྲིས་སོ།།འབྲས་བུ་རིགས་ཀྱི་གནོད་སྦྱིན་གཙོ། །གྲུབ་པའི་སྔགས་བཞི་མངོན་པར་འགྲུབ། །ཅེས་པ་ལ། འབྲས་བུ་རིམ་གྱིས་ནི་འབྱུང་བ་བཞིས་ནད་བྱང་ནས། ཐིག་ལེ་བཾ་གྱིས་བཀྲུས་ཏེ། ཡི་གེ་ལས་རང་ལྷག་པའི་ལྷ་རུ་བསྐྱེད། གནས་བརྒྱད་དུ་རིན་ཆེན་འབྱུང་ལྡན་བསྒོམ་ཞེས་པའོ། །གྲུབ་པའི་སྔགས་བཞི་ནི་རཾ་ལ་སོགས་པའོ། །དེས་འགྲུབ་པ་ཡིན་པའི་ཕྱིར་རོ། །ེ་དང་སོ་སོ་མཐའ་ལྡན་པས། །མེ་ལྷ་གོང་མས་མངོན་པར་འགྲུབ། །རྒྱུན་དུ་རྩ་བའི་གསང་སྔགས་བཟླས། །ཞེས་པ་ལ། ཨེ་དང ནི་གོང་དུ་བསྟན་པ་དེ་ལ་ངོ་མཚར་བའི་ཚིག་གོ།།སོ་སོའི་མཐའ་ནི་འབྱུང་བ་བཞིའི་སྔགས་སོ། །མེ་ལྷས་གོང་མ་འགྲུབ་ནི་ཆུའི་ལྷ་ལ་སོགས་པ་ཡང་དེ་བཞིན་དུ་འགྲུབ་ཅེས་བསྟན་ཏོ། །རྒྱུན་དུ་རྩ་བའི་སྔགས་བཟླས་ཞེས་པ་ལ། རྒྱུན་དུ་དེ་ཉིད་མ་གྲུབ་ཀྱི་བར་དུ་བཟླས་པ་སྟེ། ལས་སྔགས་ནི་ལས་ཀྱི་སྐབས་སུའོ། །ལེའུ་ལྔ་པ་ནི་གྲངས་ཀྱི་ལྔ་པའོ། །ལག་ན་རྡོ་རྗེ་གོས་སྔོན་པོ་ཅན་གྱི་རྩ་བའི་རྒྱུད་ལས། ལེའུ་ལྔ་པའི་རྒྱ་ཆེར་བཤད་པའོ།། །།འབྱུང་བ་བཞིའི་གསོ་བ་བསྟན་ཀྱང་ཀླུའི་ནད་ལ་ཕྲིན་ལས་བཞིའི་སྦྱིན་སྲེག་མ་བསྟན་ན་འགྲུབ་པར་མི འགྱུར་བས་དེ་ལ་དེ་བསྟན་ཏོ།།དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱིས་ལས་བཅུའི་མངོན་པར་འགྲུབ་པའི་ཏིང་ངེ་འཛིན་ལ་སྙོམས་པར་ཞུགས་ནས། ལས་བཅུའི་སྦྱིན་སྲེག་འདི་གསུངས་སོ། །འཕགས་པ་ནི་གོང་དུ་བསྟན་ཏོ། །ལས་བཅུ་ནི་ཕྲིན་ལས་ བཞི་དང་འབྲེལ་ཞིང་བསྐྲད་པ་དང་།དམིགས་པར་བྱ་ཞིང་མནན་པ་དང་། མྱོས་ཞིང་དགུག་པ་དང་། མི་སྣང་ཞིང་རྐང་མགྱོགས་དང་། དོན་ཐམས་ཅད་འགྲུབ་པ་དང་། བསྲུང་བའི་ཏིང་ངེ་འཛིན་དེ་ལ་སྙོམས་པར་ཞུགས་ཞེས་པའོ། །ཕྲིན་ལས་དེ་ལ་སྙོམས་པར་ཞུགས་པའོ། ། ལས་བཅུའི་སྦྱིན་སྲེག་འདི་ཁོ་ན་གསུངས་ཞེས་བྱའོ། །ཞི་ལ་ཤཱནྟིཾ་ཀུ་རུ་སྟེ་ཞེས་པ་ནས། ཐབ་ཁུང་འདབ་བརྒྱད་དབྱིབས་ཡིན་ཏེ། །ཞེས་པ་ནི་རྩ་བ་ན་གསལ་བས་མ་བྲིས་སོ། །བི་དྷྭནྶ་ཡ་ནི་དབྱེ་བའོ། །ུ་ཙ་ཏ་ན་ནི་བསྐྲད་པའོ། །མོ་ཧ་ཡས་རྨོངས་པར་གསུངས་སོ། ། སྟམྦྷ་ཡ་མནན་པའོ། །ུད་མ་ན་ཐུན་མོང་གི་དངོས་གྲུབ་པོ། །ཱ་ཀཪྵ་ཡ་དགུག་པའོ། །བ་ཤིང་ཀ་ར་མི་མངོན་ཞིང་འགུགས་སུ་གཞུག་པའོ། །རཀྵ་བསྲུང་བའོ། །མོ་ཧ་ཡ་དོན་གྲུབ་པའོ། །དེ་ལ་ལས་ཀྱི་མན་ངག་ནི། །ཐབ་ཟླུམ་པོ་དཀར་བོ་དང་། སེར་པོ་གྲུ་བཞི་དང དབང་ཟླ་གམ་དང་།དྲག་པོ་གྲུ་གསུམ་དང་། བྷ་གའམ་པདྨ་ལྟ་བུ་ལ་བྱ་ཞེས་གསུངས་པའི་ཕྱིར་ཐབ་ནི་ལྔ་རུ་ཤེས་པར་བྱའོ། །བ་བག་ན་མི་ཏྲ་མ་ཧེ་ཏྲོ་ཀྲོ་ད་མི་ཐ་ཞེས་པའི་མེ་ལྷ་ལས་དང་མཐུན་པར་སོ་སོའི་བྱ་བའི་རིམ་པ་དང་། ཐབ་ཁུང་སོ་སོའི་གཞལ་ཡས་ཁང་དུ་ མེ་ལྷ་སོ་སོར་བསྐྱེད་དེ་མཆོད་ཅིང་སྲེག་རྫས་ཕུལ་ཞིང་།ཤཱནྟིཾ་ཀུ་རུའི་སྔགས་ལ་སོགས་པ་བཟླས་པས། དོན་སོ་སོར་འགྲུབ་པར་བསྟན་ཏོ། །ཙནྡན་གྱིས་ཤིང་དང་། མི་ཋ་ཞེས་པ་ཡོངས་སུ་འབྲེལ་ཏེ། འུག་པ་དང་ཕོ་རོག་ཤ་དང་། རྔ་མོའི་ཤ་དང་། ཡང་ན་ནད་དམུ་ཆུས་ཤི་བའི་ཤ་དང་ ཕྱེ་མ་གསུམ་གྱི་ཐུན་ནོ།།བྱ་རྒོད་ཤ་དང་ཁྲ་དང་ཀླག་གི་ཤ་དང་། སྲིན་བྱའི་ཤའམ། ཙནྡན་མཆོད་ཅིང་ཡོངས་སུ་བསྔགས་ལ་པུག་ཤུད་ཤ་ཡོངས་སུ་བསྲེགས་པའོ། །དེ་ཡང་ལུང་ལས། ཐབ་ཁུང་གཞལ་ཡས་སོ་སོ་རུ། །སོ་སོར་མེ་ལྷ་སྤྱན་དྲངས་ཏེ། གཉིས་མེད་བསྟིམ་ དང་མཆོད་བྱ་སྟེ།།འཕགས་པ་གོས་སྔོན་བསྐྱེད་བྱ་སྟེ། །སོ་སོའི་མེ་ལྷས་དབུ་རྒྱན་བྱ། །མཆོད་ཅིང་བསྟོད་ན་ལས་རྣམས་འགྲུབ། །ཅེས་པའོ། །དེ་བཞིན་དུ་སྤྱན་དྲངས་པ་དང་མཆོད་པ་དང་འདོད་པ་གསོལ་བ་བཏབ་པས་གང་ལ་བྱ་བའི་དོན་འགྲུབ་པར་བསྟན་ཏོ། །ལེའུ་ དྲུག་པ་ནི་གྲངས་ཀྱི་དྲུག་པའོ།།ལག་ན་རྡོ་རྗེ་གོས་སྔོན་པོ་ཅན་གྱི་རྩ་བའི་རྒྱུད་ལས། ལེའུ་དྲུག་པའི་བཤད་པའོ།། །།དེ་ལེའུ་དྲུག་པར་སྦྱིན་སྲེག་གི་ཆོ་ག་བསྟན་ཡང་། རྨེ་སྲེག་དང་དབང་བསྐུར་བ་མ་བསྟན་ན་འགྲུབ་པར་མི་འགྱུར་བས། དེ་ལ་དེ་སྐད་ བསྟན་ཏོ།།དེ་ནས་དཔལ་ལྡན་གོས་སྔོན་ཅན། །གདུལ་བར་དཀའ་བ་འདུལ་བའི་མཆོག་།གསང་བའི་བདག་པོ་གོས་སྔོན་ཅན། །ཞེས་བྱ་བ་ལ། དེ་ནས་ནི་ལེའུ་དྲུག་པ་བཤད་པའི་རྟིང་དེ་ནས་སོ། །དཔལ་ལྡན་ནི་རྒྱུ་ཡེ་ཤེས་ལས་བྱུང་བའི་བདག་དང་གཞན་གྱི་དཔལ་ཏེ། ལྷ་མོ་རྡོ་ རྗེ་ཏིང་ངེ་འཛིན་པ་ནི།སྟོང་པ་དང་ནི་སྙིང་རྗེའོ། །གདུལ་བར་དཀའ་བའི་གནོད་སྦྱིན་བས་པ་དང་། ཀླུ་སྟེ་གདུག་པ་ཅན་ནོ། །འདུལ་བ་ནི་ལག་ན་རྡོ་རྗེ་སྟེ། རི་རབ་རྩེ་ལ་འདུལ་བ་ཡིན་ཏེ་སྔར་བཤད་པས་སོ། །གསང་བའི་བདག་པོ་ནི་སྐུ་གསུང་ཐུགས་ཀྱི་བདག་པོ་སྟེ། དེ་ནི་སྡུད་བ་ པོ་ཡིན་པར་བསྟན་ཏོ།།དྲག་པོ་ཆེན་པོ་རབ་ཏུ་འབར་བའི་ཏིང་ངེ་འཛིན་ལ་སྙོམས་པར་ཞུགས་ནས། འཁོར་གྱི་ཀླུ་ཚོགས་དབང་སྡུད་ཚེ། །ཞེས་བྱ་བ་ལ། དྲག་པོ་ནི་སྐུ་གསུང་ཐུགས་དྲག་པོར་སྟོན་པས་དེའི་ཏིང་ངེ་འཛིན་ལ་སྙོམས་པར་ཞུགས་ཏེ། མཁའ་ལྡིང་རྒྱལ་པོས་ སྤྲུལ་པ་བཀྱེ་ནས་རྒྱ་མཚོ་ཆེན་པོར་གཤེགས་ཏེ།རིགས་བཞིའི་ཀླུ་ཡང་དབང་བསྡུས། །ཞེས་པའོ། །ཉེན་རྣམས་བཟློག་པའི་ཆོ་གར་གསུངས། །གནས་ཁང་རིམ་པ་གསུམ་དག་ལ། །ཕྱི་རོལ་རྨེ་སྲེག་བྲལ་བར་བྱ། །ཉེན་རྣམས་ནི་ཀླུ་དང་འབྱུང་པོས་ཟིན་པ་སྡུག་བསྔལ་གྱིས་ཉེན་པ་ རྣམས་སོ།།གནས་ཁང་རིམ་པ་གསུམ་ནི་ཁང་པ་རིམ་པ་གསུམ་པ་ལ། སྒོ་ཤར་དང་ནུབ་དང་ལྷོ་རུ་འདོད་དོ། །ཕྱི་རོལ་རྨེ་སྲེག་ནི་ཁང་པ་ཕྱི་བ་བྱ་བ་བསྟན་ཏོ། །གྲུ་གསུམ་ནག་པོའི་འབྲུབ་ཁུང་དུ། །ཙནྡན་དུག་ཤིང་བསྲེ་བྱས་ཏེ། །མི་ནག་ཕྱི་ཐ་རྣམས་ཀྱི་མེས་སྦར་ཏེ། །ལྷ་དང་མེ་ ལྷ་གཉིས་མེད་གཅིག་ཏུ་བསྐྱེད།།ཡེ་ཤེས་བསྟིམ་དང་བྱིན་བརླབས་བསྡུ་བ་བྱས། །ལྷ་དང་མེ་གཉིས་གཉིས་མེད་གསལ་བྱས་ལ། །ནད་པའི་སྟེང་དང་འོག་ཏུ་མེ་བསམ་ཞིང་། །གནས་བརྒྱད་མེ་དེས་བགེགས་ཀྱི་ནུས་མཐུ་རྣམས། །སྲེག་ཅིང་སྣ་བུག་ཡོངས་བཀབ་ལ། ། སློབ་དཔོན་བྱ་ཁྱུང་གི་ཏིང་ངེ་འཛིན་དང་ལྡན་པས། མཆོད་པ་དང་སྲེག་རྫས་ཕུལ་ཞིང་། ཀླུ་གཟིར་བའི་དྲག་སྔགས་བཟླས་ཤིང་། གུ་གུལ་དང་མི་ཚིལ་ལ་སོགས་པའི་དུད་པས་བདུག་ཅིང་དེས་བགེགས་མེད་པར་བྱ་ཞིང་བྲལ་ན་འབྲོས་པའོ། །བར་ཁང་དེར་ནད་པ་ལ་ཕྱི བདུད་དང་བདུད་ལྟས་རང་བཞིན་གྱི་ནུས་པ་བསྐྱེད་པར་སྟོན་ཏོ།།དེ་ཡང་ཡུམ་ནི་ལྕང་ལོ་ཅན། །བདུད་རྩི་བུམ་པ་ཐོགས་པ་ཡིས། །འོད་འཕྲོས་སྟོང་གསུམ་མ་ལུས་ཚེ། །ཕྱི་ནང་དགུག་དང་བསྟན་པ་ནི། །ཡི་གེ་གསུམ་གྱི་ལས་སུ་གསུངས། །དེ་ནས་ཨོཾ་ཨཱཿ་ ཧཱུཾ་བཛྲ་ཨཱ་ཡུཿཥིཉྩ་ཧཱུཾ།ཞེས་གསུངས་ཏེ། རང་རང་གིས་སྔོན་དུ་བདུད་རྩིའི་ངོ་བོས་ཁྲུས་བྱའོ། །ནང་གི་ཁྲུས་སྟོང་པ་ཉིད་བསྒོམ་མོ། །དེར་སློབ་དཔོན་ལ་ཡོན་གྱིས་མཉེས་པར་བྱའོ། །ནང་དུ་བུམ་པའི་དབང་བསྐུར་ལ། །ཉེན་རྣམས་བཟློག་པར་ཐེ་ཚོམ་མེད། །ཅེས་པ་ ལ།དང་པོ་བསྙེན་པ་བསྐྱལ་ཏེ། དུས་གྲངས་མཚན་མའི་བསྙེན་པའོ། །ཡང་ན་གོང་དུ་བསྙེན་པ་སོང་བས། བསྙེན་སྦྱོར་བསྒོམ་པར་བྱ་ཞེས་སོ། །ས་དང་སྟ་གོན་དང་། དཀྱིལ་འཁོར་སྒྲུབ་པ་དང་། སློབ་མ་གཞུག་པའི་ཆོ་ག་ཕྱི་ནང་འཇུག་པ་ཡོངས་སུ་དག་པར་བྱ་སྟེ། དབང་སྟེགས་ཁྲི་ལ་བཞག་ལ། རིགས་དང་རང་རིག་ཤེས་པ་དང་། སྦྱིན་དང་ཉོན་མོངས་འཁྲུད་པར་བྱེད། །བདག་པོ་ལ་སོགས་དབང་གིས་སུ། །རྒྱུད་དག་འབྲས་བུ་ཐོབ་པར་བྱེད། །ཅེས་གསུངས་སོ། །དེ་ནས་སླར་བཤད་པ། །ོཾ་སརྦ་ཏ་ཐ་ག་ཏ་ནཱི་ལཱཾ་བ་ར་དྷ་ར་ཨ་བྷི་ཥིཉྩ ཧཱུཾ།ཞེས་པས་མེ་ཏོག་སྔོན་པོ་དང་འབྲེལ་ཏོ། །ོཾ་སརྦ་ཏ་ཐཱ་ག་ཏ་ནཱི་ལཱཾ་བ་ར་དྷ་ར་བཛྲ་ཨཱ་དཪྴ་ཨ་བྷི་ཥིཉྩ་ཧཱུཾ། ཞེས་པས་ཆུའི་དབང་དང་འབྲེལ་ཏེ་ཞེ་སྡང་རྣམ་པར་དག་པའོ། །ོཾ་སརྦ་ཏ་ཐཱ་ག་ཏ་རཏྣ་བཛྲ་ཨ་བྷི་ཥིཉྩ་ཧཱུཾ། ཞེས་པས་དབུ་རྒྱན་དང་འབྲེལ་པས་ང་རྒྱལ་རྣམ་ པར་དག་པའོ།།ོཾ་སརྦ་ཏ་ཐཱ་ག་ཏ་ས་མནྟ་ཨ་བྷི་ཥིཉྩ་ཧཱུཾ། ཞེས་པས་རྡོ་རྗེ་དང་འབྲེལ་པས་འདོད་ཆགས་རྣམ་པར་དག་པའོ། །ོཾ་སརྦ་ཏ་ཐཱ་ག་ཏ་པྲ་ཏི་ས་མ་ཎ་ཡ་ཨ་བྷི་ཥིཉྩ་ཧཱུཾ། ཞེས་པས་དྲིལ་བུ་དང་འབྲེལ་པས་ཕྲག་དོག་སེལ་བའོ། །ོཾ་སརྦ་ཏ་ཐཱ་ག་ཏ་ཀྲི་ཏ་ཨ་ནུཥྛཱ་མ་ཨ་བྷི་ ཥིཉྩ་ཧཱུཾ།ཞེས་པས་གཏི་མུག་རྣམ་པར་དག་སྟེ། ཡེ་ཤེས་ལ་དབང་བའོ། །དེ་ནས་དུས་གསུམ་སངས་རྒྱས་ཀྱིས་དབང་བསྐུར་ཞིང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཨ་བྷི་ཥིཉྩ་ཧཱུཾ་ཧཱུཾ་ཧཱུཾ་ཞེས་བརྗོད་དོ། །དེ་ནས་ལས་ཐ་དད་པ་དང་གསང་བའི་དབང་ཡང་བསྐུར་ཏེ་ ཐིག་ལེ་དཀར་དམར་ལྕེ་ལ་བཞག་སྟེ།གུ་ཧྱ་ཨ་བྷི་ཥིཉྩ་ཧཱུཾ་ཧཱུཾ་ཧཱུཾ་ཞེས་བརྗོད་དོ། །དེ་ནས་སློབ་དཔོན་གྱིས་ལྷ་སྒོམས་ཤིག་པ་དང་སྔགས་ལ་སོགས་པའི་གནང་བ་སྦྱིན་པའོ། །དེ་ཡང་དབང་བསྐུར་བའི་རྒྱུད་ནས། ཉན་ཅིང་སྒྲུབ་པ་ལ་སོགས་པ། །དབང་བསྐུར་གནང་བར་ མ་བྱས་ན།།འབྲས་བུ་མེད་ཅིང་བརླག་པར་འགྱུར། །དེ་བས་དབང་བསྐུར་རབ་ཏུ་གཅེས། །ཞེས་གསུངས་སོ། །དེ་ལྟར་བྱས་པས་སྡུག་བསྔལ་ནད་དང་ངན་འགྲོ་ལས་བཟློག་ཅེས་གསུངས་སོ། །ཀྱེ་ཧོ་ཉེན་རྣམས་གདུལ་བའི་མཆོག་།ེ་མ་སྔགས་ཆེན་དྲག་པོ་ཆེ། །ེ་ མ་མ་རུངས་འཇིགས་པ་ཅན།།ཞེས་པ་ལ། དབང་བསྐུར་བ་སྟོན་པ་ཡིན་ཏེ། དབང་གི་ལྷ་དང་རྩ་སྔགས་འབྲེལ་པར་བཟླས་པ་ལ་ངོ་མཚར་བསྟོད་པའོ། །ེ་མ་སྔགས་ཆེན་དབང་དང་འབྲེལ་པའི་ཀླུའི་དྲག་སྔགས་སོ། །ེ་མ་མ་རུངས་འཇིགས་པ་ཅན་ནི་ཀླུའི་གདོན། །དབང་དང་ལས་ སྦྱོར་གྱིས་འཇོམས་པའོ།།ེ་མ་ཡང་གསང་རྣལ་འབྱོར་ཆེ། །ཕྱག་ན་རྡོ་རྗེ་ཁྱོད་ཕྱག་འཚལ། །ཕྱོགས་བྲལ་ཁྲོ་བོ་ཁྱོད་ཕྱག་འཚལ། །ཞེས་པ་ལ། ཨེ་མ་ཡང་གསང་ནི་སྨྲ་བཅད་པའི་ངོ་བོ་རྡོ་རྗེ་ཤུབ་བུར་བཟླས་པ་གསང་བའི་དོན་བྱེ་བ་ཕྲག་གཉིས་སུ་བཟླས་པས། །རྣལ་ འབྱོར་ལྷ་དང་འབྲེལ་པས་རྣལ་འབྱོར་དེས་བཟླས་ཞེས་པའོ།།གོང་གི་ཡོན་ཏན་བསྟན་པ་ནི་ཁྱོད་ཡིན་པས་ཁྱོད་ལ་བསྟོད། །ཕྱོགས་བྲལ་ནི་གདུལ་བྱ་མ་ལུས་པ་དང་། ཡེ་ཤེས་མ་ལུས་མངའ་བ་ཁྱོད་ལ་བསྟོད། །ཅེས་གསུངས་སོ། །ལེའུ་བདུན་པ་ནི་གྲངས་ཀྱི་བདུན་པའོ། ། ལག་ན་རྡོ་རྗེ་རྩ་བའི་རྒྱུད་ལས་ལེའུ་བདུན་པའི་རྣམ་པར་བཤད་པའོ།། །།གདོན་བྲལ་བ་དང་དབང་བསྐུར་བ་བསྟན་ཀྱང་། གཏོར་མའི་ལས་མེད་ན་འགྲུབ་པར་མི་འགྱུར་བས་དེའི་ཕྱིར་དེ་ལ་དེ་བསྟན་ཏོ། །ཡང་འཁོར་གྱི་ནང་ནས་ཁམས་གསུམ་རྣམ་པར་རྒྱལ་བ་སྟན ལས་ལངས་ནས།འདི་སྐད་ཞུས་པའི་ཚིག་ལིའུ་ཀུན་ལ་སྦྱར་རོ། །ལན་གསུངས་པས་དེ་སྐད་གསུངས་ནས། འཁོར་ཐམས་ཅད་དགའ་བའི་རྗེས་ལ་འདི་སྐད་གསུངས་སོ་ཞེས་པ་ལ། དེ་སྐད་གསུངས་པ་ལ་གོང་གི་ཚིག་གོ། །འཁོར་འགའ་མིན་དབང་དང་རྨེ་ འབྲེལ་ལོ།།འདི་སྐད་གསུངས་ནི་འོག་མའི་ཚིག་རྣམས་སོ། །དེས་དེ་རྣམས་གསུངས་པར་བསྟན་ཏོ། །ཐམས་ཅད་ལྡན་པའི་གཏོར་མ་ལ། །ཞེས་པས། ཕྱི་ནང་གཉིས་ཀྱི་གཏོར་མ་སྟེ། དེ་ཡང་ཕྱིའི་གཏོར་མ་ལ། གཙང་གཏོར་དང་བགེགས་གཏོར་གཉིས་ཏེ་དང་པོ་ ནི།དཀར་གསུམ་མངར་གསུམ་འབྲས་ཟན་དང་། །ལྡན་པའི་གཏོར་མ་སྦྱིན་པར་བྱ། །ཞེས་གསུངས་པ་ལ། པདྨ་དཀར་པོ་སྡོང་པོའི་སྟེང་དུ། ཨོཾ་སྭ་སྭཱ་ཧཱ་ཧཱུཾ་ཛཿ། ཨོཾ་ཨིནྡྲ་ཡེ་ཧཱུཾ་ཛཿ། ཨགྣ་ཡེ་ཧཱུཾ་ཛཿ། ཡ་མཱ་ཡ་ཧཱུཾ་ཛཿ་ནི་རྲྀ་ཏྱཱ་ཡ་ཧཱུཾ་ཛཿ། བ་རུ་ཎཱ་ཡ་ཧཱུཾ་ཛཿ། བཱ་ཡ་བེ་ཧཱུཾ་ ཛཿ།ཀུ་བེ་རཱ་ཡ་ཧཱུཾ་ཛཿ། ཨཱི་ཤ་ནཱ་ཡ་ཧཱུཾ་ཛཿ། ཧེ་ཏ་ཨ་དྷི་པ་ཏ་ཡེ་ཧཱུཾ་ཛཿ། སཱུ་ཪྻ་ཙནྡྲཱ་ཡ་ཧཱུཾ་ཛཿཞེས་པས་སྤྱན་དྲངས་ཏེ། གཏོར་མ་ཕྱི་རྒྱུད་བཞིན་ཕུལ་ལ། གོང་དུ་བསྟན་པའི་སྔགས་ཀྱི་ཤམ་བུ་ཡང་ཧཱུཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཨནྡི་ཛ་མ་ཛ་ལ་ཛཀྑ་བྷཱུ་ཏི་བ་ཧྞི་ཡ་བ་རཀྵ་ཙནྡ་ སུ་ཙ་མ་ཏ་པབེ+ེ་ཏཱ་ལ་བ་ཏཱ་ལ་ཨཥྚ་སཐར་སྭཱ་ཧཱ་ཨི་དཾ་བ་ལིཾ་བྷུ་ཛ་ཞེས་པས་ཀྱང་གཏོར་མ་དབུལ།སྤྱན་དྲང་བར་བྱ་སྟེ། སྟོང་གསུམ་མི་མཇེད་འཇིག་རྟེན་ཞེས་པས་སྤྱན་དྲངས་ལ་མཆོད་པས་མཆོད་དེ། ཚངས་པ་ཆེན་པོ་མི་བདག་།གཟུགས་ཁམས་ལྷ་ཚོགས་ཐམས་ ཅད་དང་།།ཆོས་བཟངས་ལྷ་ཡི་འདུན་ས་ན། །རྡོ་རྗེ་འཆང་རྒྱལ་ཐར་ལམ་སྟོན། །བརྒྱ་བྱིན་འཁོར་དང་བཅས་པ་རྣམས། །རི་རབ་སྟེང་ན་ལྷ་ཚོགས་དང་། །དབང་པོ་རྡོ་རྗེ་འཆང་བ་ཞེས་པ་ལ་སོགས་པའི་ཚིགས་བཅད་ཡང་བསྒྲགས་སོ། །དེས་མཆོད་ཅིང་སྨོན་ལམ་བསྒྲགས་ པར་བྱའོ།།ཤ་ཆང་དང་ལྡན་པའི་གཏོར་མ་ལ་ཨོཾ་ཨ་ནརྀ་སུ་ཏྲི་པྲེ་དུ་ཛ་ཞེས་པ་ལྕགས་ཀྱུ་དང་བཅས་པས་སྤྱན་དྲངས་ལ། གཏོར་མ་གོང་བཞིན་ཡང་མཆོད་པ། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟངས་ལུས་སྲུལ་པོ། །གང་དག་ས་ལ་གནས་ པའི་རྫུ་འཕྲུལ་ཅན།།བུ་སྨད་བཅས་ཤིང་གཡོག་འཁོར་བཅས་པ་རྣམས། །གནས་ནས་ཕན་གདགས་ཕྱིར་ནི་འདིར་གཤེགས་ཤིག་།སྲིད་པའི་རྩེ་ནས་དམྱལ་བའི་གནས་ཡན་ཆད། །རྒྱུད་དྲུག་སྐྱེ་འགྲོ་མ་ལུས་ཐམས་ཅད་ཀུན། །གནས་ནས་ཕན་ གདགས་ཕྱིར་ནི་འདིར་གཤེགས་ཤིག་།ཅེས་བརྗོད་དོ། །མཆོད་པས་མཆོད་དེ་དགའ་བའི་ཚལ་དང་ཞེས་པ་དང་འདི་ལྟར་ཕན་པར་བྱེད་པ་ལ་ཞེས་བརྗོད་ལ། གཏོར་མ་གཉིས་བཏང་སྟེ་དེ་ནི་རོ་སྲེག་གམ་རབ་གནས་སམ། དབང་བསྐུར་དུས་སུ་ཕྱི་མཆོད་བགེགས་ཉེ་བར་ཞི་བའོ། ། ནང་གཏོར་ནི་ཐམས་ཅད་ལྡན་པའི་ཟེར་མས་ཤ་ལྔ་བདུད་རྩི་ལྔ། ཕྱིའི་ཡོ་བྱད་དང་འབྲེལ་པའོ། །རཾ་གྱིས་སྦྱངས་ནས། ཡཾ་གིས་བུས། ཁཾ་གིས་བཀྲུས་ཏེ་དག་པ་ལ་ཞེས་པ་ལ། རཾ་དམར་པོ་ཀ་པཱ་ལ་དང་གསང་བའི་དམ་རྫས་སྲེག་པའོ། །བསྲེགས་པའི་ཐལ་བ་ཡཾ་ལས་རླུང་གིས གཏོར་བའོ།།བཾ་གྱི་ཆུ་རྒྱུན་གྱིས་བཀྲུས་པའོ། །ཡཾ་རཾ་དབབ་པའི་སྦྱོར་བ་བྱ། །ཞེས་པ་ལ་ཡཾ་ལས་རླུང་རཾ་ལས་མེ་ཨ་ལས་ཀ་པཱ་ལ། རླུང་གིས་བཏེག་པའམ་སྐུ་གསུང་ཐུགས་ཀྱི་ངོ་བོས་བཏེག་པའོ། །ནང་དུ་ཨ་ལས་ཟླ་བའི་ནང་དུ་བདུད་རྩི་ལྔ་ཉི་མའི་སྟེང་དུ་ཤ་ལྔ། དེ་སྟེང་གསང་ སྔགས་རྒྱལ་པོ་འབྲུ་གསུམ།རྡོ་རྗེ་སྔོན་པོ་དང་ཤེས་རབ་ཨཱ་ལི་དང་བཅས་པའོ། །རླུང་བསྐྱེད་མེ་འབར་ཐབས་ཤེས་རབ་ཞུ་ནས་ཡིག་འབྲུ་གསུམ་པོས་སྦྱངས་ཏེ། ཨེ་ལས་འོད་འཕྲོས་པ་དང་། ཧཱུཾ་གིས་བདག་པོ་འོད་ཟེར་རྩེ་ལ་ཛ་འཕྲོས་པས་ཡེ་ཤེས་བདུད་རྩི་དབབ་པའོ། ། ཨོཾ་ཨཱ་རལླི་ཧོ་ས་མ་ཡ་ཛཿ། ཞེས་ཀྱང་བརྗོད་ཅིང་ཨོཾ་ཨཱཿཧཱུཾ་སྭཱ་ཧཱ། ཞེས་བརྗོད་ལ་གཏོར་མ་བྱིན་གྱིས་བརླབ་བོ། །རིགས་དྲུག་སེམས་ཅན་ཛཿཞེས་པས་བཀུག་ལ་ཡེ་ཤེས་ལྷ་ཚོགས་ཀྱི་ངོ་བོ་བྱིན་གྱིས་བརླབས་ལ་ཡེ་ཤེས་ཀྱི་ལྷ་ཚོགས་མང་པོ་ཡང་སྤྱན་དྲངས་གཉིས་སུ་མེད པར་བསྟིམས་ལ་བླ་མ་ཡང་མི་བསྐྱོད་པར་བྱིན་གྱིས་བརླབས་ལ།རང་རང་གི་རྩ་བའི་སྔགས་ལ་བ་ལིཾ་ཏ་ཁཱ་ཧི་ཞེས་ལན་བདུན་ནམ་ཉི་ཤུ་རྩ་གསུམ་བརྗོད་ལ། མ་མ་སརྦ་ཤ་ཏྲཱུཾ་ཧཱུཾ་ཨ་མུ་ཀ་མ་ཧི་མ་ཙ་མོ་ཏ་བ་སཾ་བ་བུ་ག་རུ་ཏི་རཾ་ཕྲ་ཡོ་བཀྵ་བ་ལི་ཨི་དཾ་གྲྀཧྞ་ཧི་ཁཱ་ཧི་རཀྟ་ པི་བ་ཏོ་ཨཱཿཧཱུཾ་ཀྲ་མ་ས་མ་ཡེ་སྭཱ་ཧཱ།ཞེས་ལན་གསུམ་བརྗོད། ཨོཾ་ཨ་ཀཱ་རོས་སེམས་ཅན་ཐམས་ཅད་ལ་དབུལ། དེ་ནས་བསམ་གཏན་ལྷ་མོས་མཆོད་པ་དབུལ། ཧཱུཾ་གི་འོད་ཟེར་རྩེ་ལ་ལྷ་མོ་མང་པོ་བྱུང་ནས་མཆོད་ཅེས་པའོ། །གཙང་གཏོར་ནི་གོང་དང་མཐུན་པས་འདི་རུ་ཡང་ཤེས་ པར་བྱའོ།།དེས་ན་དབང་བསྐུར་བའི་ཏྭ་ནྷྲ་ལས། གཏོར་མའི་ལས་རྣམས་ཀུན་ལ་ཡང་། །སྔོན་བྱས་མེད་ཅིང་གོ་རིམས་བྲལ། །རྫས་མ་ཚོགས་དང་བསམ་གཏན་བྲལ། །འདི་ཡང་བར་ཆོད་སྦྱོང་བའོ། །ཞེས་གསུངས་པའི་ཕྱིར། སྔོན་འགྲོ་ལྷ་བསྒོམས་པ་དང་། ཕྱི་ནང་གི་གཏོར་མའི་ རྫེས་མ་འདྲེས་པར་སོ་སོར་ཚང་པ་ལ་བྱིན་གྱིས་བརླབས་ཏེ་བསྔོ་ཞིང་སྨོན་ལམ་བཏབ་ལ་ས་གཙང་སར་བསྐྱལ་ཞེས་པའོ།།ད་ནི་ཁྲོ་བོ་གོས་སྔོན་ཅན་ཞེས་པས་དམ་ཚིག་བསྒྲག་པ་སྟེ་དངོས་སུ་བས། ཨ་ཀཱ་རོ་མུ་ཁཾ་ཡང་ཀུན་ལ་སྦྱིན་པ་སྟེ། གོང་དུ་བསྟན་ཏོ། །ལེའུ་བརྒྱད་པ་ ནི་གྲངས་ཀྱི་བརྒྱད་པའོ།།ལག་ན་རྡོ་རྗེ་རྩ་བའི་རྒྱུད་ལས་ཕྱི་ནང་གི་གཏོར་མ་རྒྱ་ཆེར་བཤད་པ་སྟེ་ལེའུ་བརྒྱད་པའོ།། །།དེས་ཕྱི་ནང་གི་གཏོར་མ་བཏང་ཡང་སྔགས་མ་བསྟན་ན་དེ་ལ་མོས་པ་རྣམས་ཀྱིས་མི་འགྲུབ་པས་དེ་བསྟན་ཏོ། །དེ་ནས་དཔལ་ལྡན་གོས་སྔོན་ཅན། །གདུལ་ ཀ་འདུལ་བའི་བདག་པོ་དེས།།ཞེས་པ་ལ་དེ་ནས་ལེའུ་བརྒྱད་པ་སོང་བའི་རྟིང་དེ་ནས། དཔལ་ནི་བསོད་ནམས་དང་ཡེ་ཤེས་ཀྱི་ཚོགས་དཔལ་གཉིས་ཏེ་ལྷ་མོའོ། །གདུལ་དཀའ་ནི་གོང་དུ་བསྟན་ཏོ། །བདག་པོ་ནི་སྤྲུལ་སྐུ་བཛྲ་པཱ་ཎི། བསམ་གཏན་འཁོར་ལོ་མེད་པ་ལ། །སྔགས་ ཀྱི་ངེས་པ་བཤད་པར་བྱ།།ཞེས་པ་ལ། བསམ་གཏན་ནི་ཞི་གནས་དང་ལྷག་མཐོང་མེད་པ་ལ་སྟེ། རྣལ་འབྱོར་དེ་ལ་མི་མོས་པའོ། །སྔགས་ཀྱི་ངེས་པ་ནི་དབྱེ་བ་བཤད་པའོ། །དེ་ལ་ཏདྱ་ཐཱ་ནས་བ་པི་ཤུདྡྷི་ཞེས་པའི་ཡིག་འབྲུ་སོ་གཅིག་པས། རྩ་སྔགས་བསྟན་ཏོ། །ཏདྱ་ཐཱ་བུདྡྷ་ ཞེས་པ་ནས།ནཱ་ག་ཏྲ་ཏ་ས་ཏ་ན་ཡ་ཕཊ་ཅེས་པས་ཀླུ་གཟིར་བའི་སྨེ་བྲལ་གྱི་དུས་སམ་མནན་ཅིང་གསད་པའི་དུས་སོ། །ནཱི་ལཱཾ་བ་ས་ན་ཡ་ཕཊ་ཅེས་པ་ནས། ཀུན་ཤན་མ་དོད་ས་ཧ་ཡ་ཕཊ་ཅེས་པས། གཤིན་རྗེའི་གདོན་བཟློག་པ་དང་ནོར་བསྒྲུབ་པ་དང་སྒོ་ལྕགས་དབྱེ་བ་དང་། དེའི་ ལས་བསྟན་ཏོ།།པྲེ་ཏ་ཞེས་པ་ཡི་དགས་དང་ཤ་ཟ་བཟློག་པར་བསྟན་ཏོ། །ཡཀྵ་ཞེས་པས་གནོད་སྦྱིན་བཟློག་པར་ཤེས་པར་བྱའོ། །ཧ་ས་ནས་བིག་ཤ་ཀ་ར་ཡ་ཕཊ་ཕཊ་ཀྱིས་འབྱུང་པོ་སྤྱིར་གསད་པ་སྟེ། ཀུན་ལ་སྦྱར་བར་ཤེས་པར་བྱའོ། །སརྦ་ཤ་ཏྲཱུཾ་ ནི་དགེ་འདུན་གྱི་དགྲ་འདུལ་བ་སྟེ།འབྲུབ་ཁུང་གྲུ་གསུམ་པ་རུ་གསེག་ཤང་གི་རྩེ་གཉིས་པས་བརྡུངས་ཏེ། སྔགས་ཀྱང་སྟོད་སྨད་དང་ཡང་ན་གསུམ། ནཱི་ལཱཾ་བར་དང་སང་ཧ་ནི་ཡབ་ཡུམ་གྱི་སྔགས་སོ། །དེ་ལ་བསྙེན་པ་དང་སྒྲུབ་པ་ལ་སྦྱར་རོ། །གཏུབས་ཏེ་བཟླས་པ་དང་མི་ གཏུབ་པ་དང་།བདེ་བར་གཤེགས་པ་མ་གསུངས་ཏེ། གང་ལ་བྱ་བ་དེ་གྲུབ་ཅེས་གསུངས་སོ། །ཡང་སྔགས་རིངས་ཁོ་ན་ལ་ཨོ་ཙནྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་རྟགས་ནི་ཀླུ་གདོན་དུ་གྱུར་པ་ལ་བཟླས་པར་ཤེས་པར་བྱའོ། །རྡོ་རྗེ་བེ་ཅོན་ནས་ཁྱོད་ཕྱག་འཚལ་གྱིས་བསྟོད་པ་ བསྟན་ཏེ།མ་བཀྲོལ་ལོ། །ལེའུ་དགུ་པ་ནི་གྲངས་ཀྱི་དགུ་པའོ། །ལག་ན་རྡོ་རྗེ་རྩ་བའི་རྒྱུད་རྒྱ་ཆེར་བཤད་པ་ལས་ལེའུ་དགུ་པའི་བཤད་པའོ།། །།ཀླུ་མ་ཁུགས་ན་གསད་པའི་ལས་མི་འགྲུབ་པས་དགུག་པ་བསྟན་ཏོ། །དེ་ནས་ཀླུ་དགུག་པའི་སྔགས་བསྟན་ཏོ། །རྡོ་ རྗེ་ལྕགས་ཀྱུ་རླུང་གི་སྦྱོར་བས་འགྲུབ་པར་འགྱུར།།དེ་བཞིན་མེ་ཡིས་ཀྱང་ནི་འདུལ་བར་ནུས་པ་ཡིན། །ཞེས་པ་ལ། དེ་ནས་ནི་ལེའུ་དགུ་པ་སོང་བའི་རྟིང་དེ་ནས་བར་ཚིག་ཀྱང་མཆོད་པར་ཀླུ་ནི་ཀླུ་སྟེ་ཞེས་རིང་བའོ། །རྡོ་རྗེའི་ཏིང་ངེ་འཛིན་དང་ལྡན་པས། ལག་ན་རྡོ་རྗེ་ལྕགས་ཀྱུའི་ སྔགས་འོག་མ་ཟློས་ཤིང་།འོག་ཏུ་རླུང་ལྷ་རྔ་མོས་བཏེག་སྟེ་འགུགས་པའོ། །དེ་བཞིན་མེ་ཡིས་ཀྱང་འདུལ་བར་ནུས་པ་ཡིན། དེ་ལྟར་ནུས་ཕྱིར། དགུག་པའི་སྔགས་འདི་བསྟན་པར་བྱ། །ཞེས་པ་ལ། མི་ཡིས་ཀྱང་འདུལ་ཞེས་པ་ལ། གནོད་པའི་གནས་སུ་མེའི་སྔགས་དང་ འབྲེལ་པས་སྲེག་སྟེ།དེ་ནས་དགུག་པར་ཤེས་པར་བྱའོ། །སྔགས་ནི་ཆེ་གེ་མོ་ཞེས་པ་དང་འབྲེལ་ཏོ། །དངོས་སུ་བསྟན་ཏོ། །བསམ་གཏན་དྲག་པོས་བཟླས་པར་བྱ། །བཟླས་པ་འདི་ལ་རབ་འབད་བྱ། །ཞེས་བྱ་བ་ལ། བསམ་གཏན་དྲག་པོ་ནི་ཁྲོ་བོའི་ཆ་བྱད་ཅན་ཏེ། རྔམ་པ་ འཇིགས་སུ་རུང་བའོ།།བཟླས་པ་གྲྀ་ཧྞ་ཞེས་པ་དང་འབྲེལ་ཏོ། །ཁྲོ་བོ་ལྕགས་ཀྱུ་ཐོགས་པ་མང་པོས་ཁྲིད་ནས་འོངས་པར་གསུངས་སོ། །ཀླུ་རིགས་དུ་མ་ཐམས་ཅད་ཀུན། །འགུགས་འགྱུར་འདི་ལ་གཞན་དུ་མིན། །ཞེས་པ་ལ། ཀླུ་རིགས་དུ་མ་ནི་ཀླུ་རིགས་བཞིའི་ཀླུ་དང་ གཉན་དང་ས་བདག་ཀྱང་ཡོངས་སུ་གསུང་ངོ་།།ཏིང་ངེ་འཛིན་དང་སྔགས་གོང་དུ་བསྟན་པ་འདི་མ་ཡིན་པ་གཞན་གྱིས་ཁུག་པ་མ་ཡིན་པར་བསྟན་ཏོ། །ཇི་སྲིད་ཁུག་པའི་ཏིང་འཛིན་གྱིས། ཁུགས་པར་གྱུར་པའི་ཀླུ་རྣམས་ཀུན། །ཞེས་པ་ལ། འགུགས་པའི་ཏིང་ངེ་ འཛིན་ནི་གོང་དུ་གསུངས་པའོ།།ཁུགས་པར་གྱུར་པ་ནི་གནས་ནས་འོངས་པའོ། །དེ་ལ་དམ་ལ་མ་བཏགས་པའི་ཀླུ་ལ། སྐྱེར་པའི་བམ་པོ་དང་སྦྱིན་སྲེག་བྱེད་པར་འབྲེལ་ཏེ། ཐབ་སྐུད་པ་ལ་སོགས་བླ་མའི་གདམས་ངག་ལ་རག་ལུས་པར་བྱའོ། །ཟངས་གཞོང་ནང་དུ་སྤྱན་ དྲངས་ཏེ།ཞེས་པ་ཟངས་གཞོང་དུ་ཀླུ་བ་སུ་དྷ་རིས་དྲུག་གི་གཟུགས་བག་ཟན་ལས་བྱས་ལ་ཀླུ་སྨན་སྣ་ཚོགས་ཡང་བླུགས་ལ། ཉེན་པས་ཟིན་པའི་གཟུགས་ལ་སྦལ་པ་ལ་སོགས་པ་བཀོད་ལ། ལྕགས་ཀྱི་སྐམ་པ་ཀ་ཡ་ཙས། །ཤིང་དག་སོར་ནི་བཅུ་གཉིས་པ། །ཡོངས་ སུ་བཅད་པར་བྱ་བ་ཡིན།།ཟེར་བས། སྨྱག་ཤད་ཀྱི་ལྕུག་མ་སོར་བཅུ་གཉིས་པ། བྱིས་པ་ལོ་བརྒྱད་ལོན་པས་བརྔས་ཏེ། རྨ་བྱའི་མདོངས་དང་ཚོན་སྐུད་ཀྱིས་བཅིངས་ལ། ཉེན་པ་རྣམས་ལ་བྱབས་ཏེ། སྦལ་པ་ཡང་མཎྜལ་སྟེང་དུ་ཕབ་ལ། ཉེན་དང་ལྡན་པ་ལྷར་བསྒོམས་ཏེ་ བསྲུང་བ་བྱ་ཞེས་པ་དང་འབྲེལ་ཏེ།དེ་ནས་དམ་ཚིག་བསྲེ་བ་དང་། སྨན་གྱི་མཆོག་གིས་ཚིགས་བཅད་དང་བཅས་པས་གསོ་སྟེ། ཁྲོ་བོའི་ཆེ་བ་བརྗོད་ཅིང་གནོད་པ་མ་བྱེད་པར་བསྒོ་ལ། གང་གནོད་པའི་སར་བསྐྱལ་ཞེས་བྱའོ། །ལེའུ་བཅུ་པ་ནི་གྲངས་ཀྱི་བཅུ་པའོ། །ལག་ ན་རྡོ་རྗེ་རྩ་བའི་རྒྱུད་རྒྱ་ཆེར་བཤད་པའི་འགྲེལ་པ་ལས་ལེའུ་བཅུ་པའི་བཤད་པའོ།། །།དགུག་པ་བསྟན་ཀྱང་དྲག་པོ་ཁོ་ནའི་ལས་མ་བསྟན་ན་ཚར་ཆོད་པར་མི་འགྱུར་བས་དྲག་པོའི་ལས་བསྟན་ཏོ། །དེ་ནས་གཞན་ཡང་བཤད་བྱ་སྟེ། །ཞི་བའི་ལས་ཀྱིས་མི་འདུལ་བའི། །ཀླུ གཟིར་དྲག་སྔགས་བསྟན་པར་བྱ།།ཞེས་པ་ལ། དེ་ནས་གཞན་ཡང་བཤད་པ་ནི་ཁུགས་པའི་རྟིང་ལ་གཞན་ཀླུ་གཉན་ས་བདག་ཞི་བས་མི་ཉན་པ་ལ། ཀླུ་གཟིར་བའི་སྔགས་དང་ཕྱག་རྒྱ་དང་རྫས་དང་ཏིང་ངེ་འཛིན་བསྟན་ཏོ། །དམ་ལ་མ་ཐོགས་པ་ ལ་དང་པོར་ཞི་བས་བྱས་ལ་དེ་ནས་དྲག་པོས་གདུལ་ཞེས་པའོ།།ོཾ་བཛྲ་པཱ་ཎི་ཞེས་པ་ནས། ཧཱུཾ་ཕཊ་ཀྱི་བར་གྱི་སྔགས་གསུངས་སོ། །དེ་ཡང་བདག་གི་མིང་དང་འབྲེལ་པ་ལས་ཁྲོ་བོ་རྣམས་ཀྱིས་ཀླུ་ལ་རྒྱོབ་མཚོན་ཆ་རྒྱོབ་ཅེས་པའོ། །ད་ཧ་ནི་སྲེགས་རོ་སྲེགས་ཞེས་པའོ། །ནོན་ ནོན་ནུས་པའམ།སྟོབས་ཁྲོ་བོ་རྣམས་ཀྱིས་ནོན་ཞེས་པ་དང་ཤིན་ཏུ་ནོན་རྣམ་པར་ཚོགས། རྣམ་པར་ཚོགས། འགུལ་མི་ནུས་པར་རྒྱོབ་རྒྱོབ་ཅེས་བྱའོ། །བསམ་གཏན་རྡོ་རྗེ་ཐོགས་པ་ཡིས། །གདུལ་བྱའི་སྟེང་ནས་དབབ་པར་བྱ། །འོག་ཏུ་མེ་ཡི་འཁོར་ལོ་བསམ། ། ཞེས་པ་ལ། བསམ་གཏན་ནི་རང་རྩ་བའི་དཀྱིལ་འཁོར་གསལ་བའོ། །ཁྲོ་བོ་རྣམས་ཀྱི་སྤྲུལ་པ། རྡོ་རྗེ་དང་ཐོ་བ་ཐོགས་པའོ། །གདུལ་བྱ་ནི་སྟེང་ནས་ཁྲོ་བོ་རྣམས་ཀྱིས་ཆར་འབེབས་པའོ། །འོག་ཏུ་མེ་ཡི་འཁོར་ལོ་བསམ། །ཞེས་པ་ལ། གྲུ་གསུམ་གདེངས་པར་དམྱལ བའི་སྡུག་བསྔལ་དང་འདྲ་བར།ས་གཞི་མེ་འབར་བ་ན། བསྒྲུབ་བྱའི་ལྟེ་བ་ནས་ཀྱང་མེ་འབར་ཏེ་བསྲེག་པའོ། །མེ་དཔུང་ཆེན་པོའི་ཏིང་འཛིན་གྱིས། །མེ་འབར་ཀློང་ཆེན་དཀྱིལ་དུ་གཟིར། །ཞེས་པ་ལ། མེ་དཔུང་ནི་དུས་མཐའི་མེ་བས་ཆེ་བས་སྲེག་པར་འགྱུར། གཟིར་བ་ནི་ ཁྲོ་བོ་དང་མཚོན་ཆ་དང་འོད་ཟེར་རོ།།དེ་ཡང་བདག་གི་ཏིང་ངེ་འཛིན་རབ་གསལ་བས། ལས་ཀྱི་ས་གཞི་མེ་འབར་བའི་སྟེང་ནས་མཚོན་ཆའི་ཆར་བབས་པས། དེ་དང་བྲལ་བར་ཐེ་ཚོམ་མེད། །ཅེས་གསུངས་སོ། །ཡུངས་ཀར་དང་ནི་ཡུངས་ནག་གམ། །སྐྱེ་ཚེས་ བརྡེག་ཅིང་ཁྲོ་བོ་སྤྲོས།།ཞེས་པ་ལ། ཡུངས་ཀར་ལ་སོགས་པའི་ཡིག་འབྲུ་ཁྲོ་བོ་མཚོན་ཆ་ཐོགས་པར་སྤྲོས་ཏེ་གཟིར་བ་ནི་ཁྲོ་བོ་རྣམས་ཞེས་མན་ངག་ཏུ་བསྟན་ཏེ། སྔགས་གོང་མ་དང་འབྲེལ། །ཁྲ་སྤྱན་ལ་སོགས་རྩ་བའི་གསོབ་གདབ་ཅིང་ཁྲོ་བོའི་སྤྲུལ་པ་སྤྲོ། ཞེས་ པ་ལ།ཁྲ་དང་ཀླག་དང་འུག་རྒོད་དང་། ཕོ་རོག་བྱ་གཅན་ལྔའི་ཐུན་གྱིས་བྲབ་ཅིང་སྲོག་ཅོག་ནན་རྦད་ལུས་རྡུལ་མཱ་ར་ཡ་ཕཊ་ཅེས་བརྗོད་ནས། བྱ་ཁྱུང་གི་སྤྲུལ་པ་མང་པོས་གསང་ཅིང་གཟིར་བའོ། །གཅན་གཟན་སྣ་ཚོགས་མཆུ་སྡེར་དང་། །མཆུ་སྡེར་འབྲད་ཅིང་སྤྲུལ་པ་སྟོན། ། ཞེས་པ་ལ། སྟག་དང་སེང་གེ་དྲེད་དང་ནི། །བྱི་ལ་སྤྱང་ཀིའི་སྡེར་མོས་བྲད་ཅིང་ཁྲོ་བོ་མང་པོས་གཅན་གཟན་དང་འདྲ་བས་ཤ་དང་རུས་པ་འབྱེད་པའོ། །མྱུར་དུ་ཐར་བ་ནི་ཀླུའི་ནད་ལས་མྱུར་དུ་ཐར་བའོ། །ལེའུ་བཅུ་གཅིག་པ་ནི་གྲངས་ཀྱི་བཅུ་གཅིག་པའོ། །ལག་ན་རྡོ་རྗེ་རྩ་བའི་རྒྱུད་རྒྱ་ཆེར་བཤད་པ་ལས་ལེའུ་བཅུ གཅིག་པའི་བཤད་པའོ།། །།ཀླུ་གཟིར་བ་བསྟན་ཀྱང་མཆོད་པ་མེད་ན་དོན་མི་འགྲུབ་པས་མཆོད་པ་བསྟན་ཏོ། །དེ་ནས་འཕགས་པ་གོས་སྔོན་ཅན་གྱིས། ཉིད་ཀྱིས་མཆོད་ཕུལ་བས། །ཞེས་པ་ལ། འཕགས་པ་གོས་སྔོན་ནི་གོང་དུ་བསྟན་ཏོ། །ཉིད་ལ་ཉིད་ཀྱིས་མཆོད་པ་ཕུལ་བ ནི།།འཁོར་གྱིས་གཙོ་བོ་མཉེས་པ་དང་། །གཙོ་བོས་འཁོར་མཉེས་པ་དང་། རང་གིས་རང་མཉེས་པ་དང་། སེམས་ཅན་ཚོགས་རྣམས་བསགས་པའི་ཕྱིར། །ཉིད་ཀྱིས་ཉིད་ལ་མཆོད་པ་ལ། །འདི་ཡང་མཆོད་པ་ཆེན་པོ་སྟེ། །མི་དམིགས་བློ་ཡིས་རབ་ཟིན་པས། །བླ་མེད་མཆོད་ པ་ཞེས་སུ་གྲགས།།ཞེས་ལག་ན་རྡོ་རྗེ་རྒྱུད་ཕྱི་མ་ལས་གསུངས་སོ། །ཧཱུཾ་རྡོ་རྗེ་བདུག་པ་མ་ཧཱུཾ་ཞེས་པ་ནས། བཛྲ་ཨཱ་ལོ་ཀེའི་བར་གྱིས་ཕྱིའི་མཆོད་པ་བསྟན་ཏེ། དེ་ཡང་དང་པོ་སྤྱན་དྲང་གདན་དབུལ། ཕྱི་ནང་གི་མཆོད་པ་མང་པོ་ཕུལ་མཉེས་པར་བྱས་ཏེ་སྡིག་པ་བཤགས་ ཤིང་དགེ་རྩ་བསྔོ་ཞེས་གསུངས་སོ།།བཅོམ་ལྡན་ཆོས་དབྱིངས་རང་བཞིན་སྐྱོན་བྲལ་བ། །ཆོས་ཀྱི་དབྱིངས་ལས་བསྐྱོད་པ་མི་མངའ་ཡང་། །སྒྲུབ་སོགས་སེམས་ཅན་རྣམས་ལ་སྨན་བྱའི་ཕྱིར། །འགྲོ་མགོན་སྤྲུལ་པའི་ཚུལ་སྟོན་གཤེགས་སུ་གསོལ། །ཛཿཧཱུཾ་བཾ་ཧོཿ། སེངྒེ་གླང་ཆེན་འཁོར་ལོ་པདྨ་ཉི་ཟླ་ཁྲི་ཡི་གདན། །རབ་ཏུ་མཛེས་པའི་གདན་མཆོག་དྲི་མེད་དབྱངས། །མཐུ་ལྡན་རྡོ་རྗེ་བསྣམས་ལ་ལེགས་འབུལ་ལོ། །འགྲོ་མགོན་མི་མཆོག་གདན་ལ་བཞུགས་སུ་གསོལ། །མེ་ཏོག་དམ་པ་ཞབས་འོག་འདོར། །གདན་གྱི་མཆོད པའི་རིམ་པའོ།།བླ་མ་རང་བཞིན་གསང་བའི་དཀྱིལ་འཁོར་ནས། །ཐུབ་པ་རྒྱུད་རྣམས་ཀུན་གྱི་སྡུད་པ་པོ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །བཅོམ་ལྡན་རྡོ་རྗེ་བསྣམས་ལ་སྐྱབས་སུ་མཆི། །ཞེས་པ་ཚིག་གི་རྟེན་ཁྱད་པར་ཅན་ འཚལ་ཏེ།།བདུག་སྤོས་ཐོགས་པའི་ལྷ་མོ་སེར་མོ་དང་། མེ་ཏོག་ཐོགས་པའི་དཀར་མོ་དང་། །མར་མེ་ཐོགས་པའི་དམར་མོ་དང་། །དྲི་ཆབ་ཐོགས་པའི་ལྗང་གུ་སྟེ། །སྔགས་ནི་མངོན་སུམ་དུ་རྒྱུད་དུ་གསུངས་པས་མ་བྲིས་སོ། །ནང་གི་ལཱ་སྱེ་མཱ་ལེ་གཱི་ཏི་དྲྀ་ཏི་སྟེ། གཙོ་བོ་ཡང་ཡོངས་ སུ་ཤེས་ཏེ་ནང་གི་ཉམས་དང་མཐུན་པར་མཆོད་ཅིང་བསྟོད་པའི་ཕྱིར་རོ།།ཉི་ཤུ་མཆོད་པ་དང་། བཀྲ་ཤིས་རྟགས་བརྒྱད། རིན་པོ་ཆེ་སྣ་བདུན་ལ་སོགས་པ་ཡང་ཕྱི་རྒྱུད་དང་། མཐུན་པར་མཆོད་དོ། །ཇི་སྲིད་ཐམས་ཅད་མཆོད་པ་ཆེ། །ཇི་སྲིད་མཆོད་པ་བདེ་བ་ཆེ། །ཞེས་བསྟན་པ་ལ། ཇི་ སྲིད་ཐམས་ཅད་ནི་ཕྱི་རྫས་མ་ལུས་པ་སྟེ།བདུག་པ་དང་། མེ་ཏོག་དང་། མར་མེ་དང་། དྲི་ཆབ་དང་། ཞལ་ཟས་ལ་སོགས་པས་མཆོད་ཅེས་པའོ། །ཇི་སྲིད་བདེ་བ་ཆེ་བ་ནི། །ལྷ་མོ་དཀར་དམར་སེར་ལྗང་གུ། །མཐིང་གས་བྱང་སེམས་ཤ་ཆེན་དང་། །རཀྟ་བ་ལ་དྲི་ཆེན་ གྱིས།།རང་གི་ཉམས་སུ་བདེ་བ་བསྐྱེད། །ཅེས་གསུངས་སོ། །ཇི་སྲིད་མཆོད་པ་བླ་ན་མེད། །ཇི་སྲིད་མཆོད་པ་ཡང་དག་ཆེ། །ཞེས་པ་ལ། ཇི་སྲིད་བླ་མེད་ནི་ཐབས་ཤེས་རབ་ཟུང་དུ་འབྲེལ་བའི་མཆོད་པ། རྒྱས་བཏབ་གཉིས་སུ་མེད་པའོ། །ཇི་སྲིད་ཡང་དག་ནི་མི་དམིགས་པའི་ མཆོད་པའོ།།དེས་མཆོད་པའི་གཙོ་བོ་ཡང་བསྟན་ཏོ། །དེ་ནས་སྡིག་པ་བཤགས་པའི་ཆོ་ག་བྱ་བར་ཡང་གསུངས་ཏེ། སྡིག་པ་ཕྱིས་མི་བྱེད་པའི་ཕྱིར། བླ་མེད་དཀོན་མཆོག་གསུམ་པོ་དང་། །བཅོམ་ལྡན་ཕྱག་ན་རྡོ་རྗེ་དང་། །འཁོར་བཅས་མ་ལུས་ཐམས་ཅད་ཀུན། ། བདག་ལ་དགོངས་ནས་གཟིགས་སུ་གསོལ། །ཇི་ལྟར་དུས་གསུམ་སངས་རྒྱས་ཀྱིས། །ཡང་དག་བྱང་ཆུབ་ངེས་མཛད་པའོ། །རྣམ་གསུམ་ཚུལ་ཁྲིམས་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས བརྟན་པོར་གཟུང་བར་བགྱི།།དཀོན་མཆོག་དམ་པ་བླ་ན་མེད། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ ཆེན་པོ་ཡི།།དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀྱང་སོ་སོར་གཟུང་། །ལས་ཀྱི་རིགས་ མཆོག་ཆེན་པོ་ལ།།སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །སེམས་ཅན་ཀུན་གྱི་དོན་གྱི་ཕྱིར། །སྡོམ་པ་མ་ལུས་བདག་གིས་གཟུང་། །མ་བསྒྲལ་བ་ནི་བདག་གིས་ བསྒྲལ།།མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱུང་བ་དབུགས་ཕྱུང་བགྱི། །སེམས་ཅན་དམ་པའི་དོན་ལ་དགོད། །དཀྱིལ་འཁོར་མེ་ཏོག་སྔོན་པོར་བཅས། །རྡོ་རྗེ་བསྣམས་ལ་དབུལ་བར་བགྱི། །བདུད་རྩི་རྣམ་ལྔའི་གཏོར་མ་སོགས། །རྣམ་པ་ཀུན་དུ་ བསྟེན་པར་བགྱི།།ཆང་གིས་འཇིག་རྟེན་མྱོས་འགྱུར་ཏེ། །ཆང་གིས་མྱོས་འགྱུར་བདག་གིས་སྤང་བར་བགྱི། །སེམས་ཅན་མ་ལུས་དོན་གྱི་ཕྱིར། །སྙིང་རྗེ་ཆེན་པོ་བདག་གིས་བསྐྱེད། །ཤེས་རབ་སྟོང་པ་ཉིད་རྣམས་ལ། །རྣམ་པ་ཀུན་དུ་སྨད་མི་བྱ། །སེམས་ཅན་བདེ་བ་ ཡིད་མི་དཀྲུག་།ཅེས་པ་ལན་གསུམ་གྱིས་སྡོམ་པ་གཟུང་སྟེ། ཕྱིས་མི་བྱེད་པར་དམ་བཅའ་བའོ། །སྡོམ་པ་བླང་བ་ནི་ཁྲིམས་ལས་འདུག་པ་དང་འདྲ་བར་བསྟན་ཏེ་ཉེས་པ་ཡོད་པའི་ཕྱིར་རོ། །དེ་ནས་སྨོན་ལམ་གསུམ་གྱི་ཚུལ་དུ་བསྔོ་བ་ནི། །བྱང་ཆུབ་སེམས་དཔའ རྣམས་ཀྱི་ལམ་མོ།།དེ་ནི་དགེ་བའི་ཕྱོགས་གཞན་ཡང་ཡོངས་སུ་བཟུང་ངོ་། །ེ་མའོ་ནི་དགྱེས་པ་དང་ངོ་མཚར་བའོ། །ལེའུ་བཅུ་གཉིས་པ་ནི་གྲངས་ཀྱི་བཅུ་གཉིས་པའོ། །ལག་ན་རྡོ་རྗེ་རྩེ་བའི་རྒྱུད་རྒྱ་ཆེར་བཤད་པ་ལས་ལེའུ་བཅུ་གཉིས་པའི་བཤད་པའོ།། །། གྲོགས་སྤྱོད་བསྟན་ཀྱང་ཞི་དྲག་དང་འབྱུང་བ་བཞིས་བསྟོད་པ་མ་བསྟན་ན་འགྲུབ་པར་མི་འགྱུར་བས་དེ་ལ་དེ་བསྟན་ཏོ། །དེ་ནས་གཞན་ཡང་བཤད་བྱ་སྟེ། །བཅོམ་ལྡན་གསང་བདག་གོས་སྔོན་ཅན། །ཞེས་པ་ལ། དེ་ནས་ནི་ལེའུ་བཅུ་གཉིས་པའི་རྟིང དེ་ནས་སོ།།གཞན་ནི་ཞི་དྲག་གིས་ཀླུ་འདུལ་བའི་བསྟོད་པ་དང་། འཁོར་ལོ་བཞིས་བསྟོད་པ་བསྟན་ཏོ། །བཅོམ་ལྡན་གསང་བདག་ནི། བདུད་བཞི་འཇོམས་ཤིང་ཡེ་ཤེས་ལྔ་དང་ལྡན་པའོ། །དེས་ནི་སྐུ་གསུང་ཐུགས་ཀྱི་བདག་པོའི་རྡོ་རྗེ་རྣམས་ཡིན་པར་རབ་སྟན་ཏོ། །བསྡུ་ བའི་ཐབས་ཀྱི་ཏིང་ངེ་འཛིན།།འཁོར་གྱི་ཀླུ་རྣམས་སྡུད་མཛད་ནས། །ཞེས་པ་ལ། བསྡུ་ཐབས་ནི་སྔོན་རི་རབ་ཀྱི་རྩེ་ལ་གནོད་སྦྱིན་དང་ཀླུའི་རིགས་འདུལ་བའི་ཚེ། ཀླུ་དང་གནོད་སྦྱིན་རྣམས་བསྡུ་བ་མཛད་ཅེས་བསྟན་ཏོ། །མེ་ཡི་འཁོར་ལོར་སྙོམས་ཞུགས་ནས། །གསང་བ་ མེ་ཡི་སྔགས་བཟླས་པས།།ཞེས་པ་ལ། མེའི་སྙོམས་ཞུགས་ནི། བཅོམ་ལྡན་འདས་ཀྱིས་མེ་བརྒྱད་ཀྱི་འཁོར་ལོར་སྙོམས་པར་ཞུགས་ཏེ། ཀླུ་རྣམས་སྐྲག་པར་བྱ་བའི་དོན། མེའི་རང་བཞིན་མེའི་སྔགས་བཟླས་པས། ཀླུ་རྣམས་འདུལ་བར་ཚིག་འོག་མ་རྣམས་དང་འབྲེལ་ཏོ། ། ཀླུ་རྣམས་མ་ལུས་ཚིམ་པར་མཛད། །བྲལ་ནས་དཔག་ཚད་གནས་སུ་བྲོས། །ཞེས་པ་ལས། བཅོམ་ལྡན་འདས་མེའི་ཏིང་ངེ་འཛིན་ལ་སྙོམས་པར་ཞུགས་པ། འཁོར་གྱི་ཀླུ་རྣམས་ལ་འདིར་གནས་ན་མེ་ཡིས་འཆི་བའི་འཇིགས་པ་འབྱུང་བར་འགྱུར་སྙམ་པའི་འཇིགས་པ་འབྱུང་། དེ་ནས། བདག་གི་འཁོར་ན་མི་གནས་པར་འབྲོས་ཏེ་འགྲོ། །བོག་སྟེ་འགྲོ་བ་ནི་དཔག་ཚད་དང་རྒྱང་གྲགས་སུ་འབྱེར་བའོ། །སླར་འདུས་བདུད་རྩི་སྨན་གྱིས་གསོ། །ལས་བཅོལ་སོ་སོའི་གནས་སུ་དགོད། །ཅེས་པ་ལ། སླར་ཞི་བའི་ཐུགས་རྗེས་བསྡུས་ཏེ་ཡེ་ཤེས་བདུད་རྩིས གསོས་ཏེ།གནོད་པ་མ་བྱེད་པར་བཀའ་བསྒོ་ནས། རང་རང་གི་གནས་སུ་བསྐྱལ་ཞེས་པའོ། །དེ་བཞིན་དུ་ཀླུའི་གདོན་གྱིས་ཉེན་པ་རྣམས་ལ་ནི། མེའི་ཏིང་ངེ་འཛིན་མེ་བརྒྱད་ཀྱི་འཁོར་ལོ་ལ་གནས་ནས་མེའི་སྔགས་བཟླས་པས། འཆི་སྙམ་པའི་འཇིགས་པ་དང་བྲལ་ཞིང་ འགྲོ།དཔག་ཚད་དུ་བྱེར་ཞིང་འགྲོ་ཞེས་པའོ། །གནོད་པ་མི་བྱེད་པའམ་དམ་ལ་ཐོགས་པའི་ཀླུ་རྣམས་ལ་ནི་སླར་བདུད་རྩི་སྨན་གྱིས་གསོ། དེ་ནས་ཀླུ་ནད་གསོ་བ་རྣམས་ཀྱི་ནང་ན་ནི་མེ་ཡིས་གསོ་བ། དགེ་སློང་ཀླུའི་བྱང་ཆུབ་ཀྱིས་གསུངས་པ་བདེན་པའོ། །མི་སླུ་བའོ། །དེ་ནས་ འཁོར་རྣམས་ཀྱི་ནང་ནས་ཁམས་གསུམ་རྣམ་པར་རྒྱལ་བ་སྟན་ལས་ལངས་ཏེ།འབྱུང་བ་བཞིའི་བསྟོད་པ་གསུངས་པ། ཐལ་མོ་སྦྱར་བ་ནི་དངོས་ཏེ། པུས་མོ་བཙུགས་པའོ། །མོ་བརྒྱད་འཁོར་ལོ་བདག་ཉིད་ཆེ། །རྟག་ཏུ་མེ་ཡི་ཏིང་འཛིན་ལ། །སྙོམས་འཇུག་ཁྱོད་ནི་རྒྱལ་གྱུར་ཅིག་།ཅེས་པ་ལ་ གནས་བརྒྱད་ཀ་རྐང་མཐིལ་གཉིས།ལག་མཐིལ་གཉིས་དཔྱི་མིག་གཉིས། གསང་བ་དང་མགྲིན་པ་གཉིས་ཏེ་བརྒྱད་ནས་རཾ་ལས་བྱུང་བའི་དམར་སེར་བརྒྱད་གནས་པའོ། །དེས་བསྲེགས་པས་ན་འཆི་བའོ། །རྟག་ཏུ་ནི་དེའི་ཏིང་ངེ་འཛིན་ལ་གནས་ན་སྙོམས་པར་ཞུགས་ནས་བརྒྱལ་ཞིང་ འཇིགས་པ་སྟེ།ལྷན་ཅིག་མི་གནས་པའི་འགལ་བ་བཞིན་ནོ། །བདེ་བའི་རོལ་མོ་མེ་ཀློང་དུ། །སྲེག་མཛད་མེ་བརྒྱད་ཁྱོད་ཕྱག་འཚལ། །རང་བཞིན་མངའ་བདག་ཁྱོད་ཕྱག་འཚལ། །ཞེས་པ་ལས། བདེ་བའི་རོལ་མོ་མེ་ཀློང་ནི་ཡེ་ཤེས་ཀྱི་མེ་དང་ལྡན་པས་ཉོན་མོངས་པ་ སྲེག་པའོ།།སྲེག་པ་ནི་ནད་དང་ཉོན་མོངས་པའོ། །ཡང་སྨིན་ཅིང་སེལ་བས་ན་མེ་ལ་ཕྱག་འཚལ་ལོ། །དེས་ནི་ཁྱོད་ལས་མི་འདའ་བར་སྟོན་ཏོ། །རང་བཞིན་ནུས་པ་དེ་ཡོད་པས་ཁྱོད་ཕྱག་འཚལ་ཞེས་བྱའོ། །ཆུ་ཡི་ངང་ལ་གནས་དོད་ན། །ཆུ་བརྒྱད་ཏིང་འཛིན་ལ་ གནས་ཏེ།།ཞེས་པ་ལ། དེ་དང་འདྲ་བའི་ནད་དང་ཉོན་མོངས་པ་ཞི་བར་འདོད་ན། ཆུ་བརྒྱད་ནི་གོང་གི་གནས་བརྒྱད་དུ་བཾ་དཀར་པོ་ལས་ཆུ་བསྒོམས་པས་ནད་སེལ། དེ་ཚེ་འཁོར་གྱིས་འདི་སྐད་བསྟོད། །ཆུ་བརྒྱད་འཁོར་ལོ་བདག་ཉིད་ཆེ། །རྟག་པར་ཆུ་ཡི་དཀྱིལ་འཁོར་ ཅན།།ཞེས་པ་ལ། འཁོར་རྣམས་ནི་རྣམ་པར་རྒྱལ་བ་ལ་སོགས་པའོ། །དེས་ནུས་པ་ཆུ་དང་འདྲ་བའི་སྒོ་ནས་བསྟོད། ཆུ་བརྒྱད་འཁོར་ལོ་ནི་གནས་བརྒྱད་ནས་ཁྲུང་པའོ། །རྟག་ཏུ་འཁྲུང་པར་བྱེད་པའི་ནུས་པ་ཡོད་པས། ཆུའི་དཀྱིལ་འཁོར་ཅན་ནོ། །འབྱུང་བའི་གཙོ་ བོ་ཆུ་ཡི་བདག་།མངའ་བདག་གཙོ་བོ་ཁྱོད་ཕྱག་འཚལ། །ཞེས་པ་ནི། འབྱུང་བའི་གཙོ་བོ་ཆུ་ཡིན་ཏེ། དེ་དག་གི་གཙོ་བོ་གོས་སྔོན་པོ་ཡང་དེ་དང་འདྲ་ཞེས་སོ། །མངའ་བདག་གི་གཙོ་བོ་ཁྱོད་རང་བཞིན་ནམ་ནུས་པ་དེ་དང་ལྡན་པས་ཁྱོད་ཕྱག་འཚལ་ལོ། །རླུང བརྒྱད་ཏིང་འཛིན་ལ་གནས་པས།།འཐོར་ཞིང་འབུད་པའི་བདག་ཉིད་ཆེ། །ཞེས་པས་ནི་གནས་བརྒྱད་དུ་བསྲེགས་པའི་ཤུལ་རླུང་བརྒྱད་ཀྱིས་འཐོར་བའོ། །གཞན་དེའི་ནུས་པའི་དུག་འཐོར་བ་སྟེ་གོང་མའོ། །འཐོར་ཞིང་འབུད་པས་ན་རླུང་དང་འདྲ་བའི་ནུས་པས་འཐོར་ ཞེས་པའོ།།ཆེ་བ་སྟེ་སྤོབས་པ་དང་ལྡན་པའོ། །རླུང་ཆེན་དྲག་པོ་རྩལ་ཤུགས་ཅན། །རླུང་ལྷ་གོས་སྔོན་ཁྱོད་ཕྱག་འཚལ། །ཞེས་པ་ལ། ཆེན་པོ་ནི་ཡེ་ཤེས་ཀྱི་རླུང་ངོ་། །དྲག་པོ་རྩལ་ཤུགས་ནི་ཐོགས་པ་མེད་པའོ། །རླུང་ལྷ་གོས་སྔོན་ཅན་ནི། །དངོས་ཏེ་དེ་ལ་དེའི་ནུས་པ་ཡོད་ པའི་ཕྱིར་རོ།།ས་ཡི་དཀྱིལ་འཁོར་ལ་གནས་ནས། །མི་གཡོ་བརྟན་པའི་ལས་མཛད་པ། །ཞེས་པ་ལ། ས་ནི་གཞན་གྱི་ནུས་པ་གནོན་པ་སྟེ་གཞན་གྱི་ནུས་པ་གནོན་པའི་ཚེས་དང་འདྲ་བ་ལ་གནས་ཞེས་བྱའོ། །མི་གཡོ་བ་ནི་བདག་ཉིད་ལ་ཚུར་ལ་མི་བརྫི་བའོ། །བརྟན་པ་ནི་ མིས་མི་ལྡང་ཞེས་པའོ།།གསེར་ལྡན་རོལ་མོ་སྣ་ཚོགས་བདག་།ས་བདག་འཁོར་བདག་ཁྱོད་ཕྱག་འཚལ། །ཞེས་པ་ལ། གནོན་པའི་ཚེ་གསེར་གྱི་འཁོར་ལོ་དང་འདྲ་བའི་ཕྱིར་ཏེ། རོལ་མོ་ནི་དེས་སྣང་བའོ། །སྣ་ཚོགས་ནི་འབྱུང་བ་བཞིས་འདུལ་བའོ། །ས་བརྒྱད་ཀྱི་འཁོར་ ལོ་གནས་བརྒྱད་དུའོ།།ཁྱོད་ནི་དེའི་རང་བཞིན་ཡིན་པས་ཕྱག་འཚལ་ལོ། །ལེའུ་བཅུ་གསུམ་པ་ནི་གྲངས་ཀྱི་བཅུ་གསུམ་པའོ། །ལག་ན་རྡོ་རྗེ་རྩ་བའི་རྒྱུད་ལས་ལེའུ་བཅུ་གསུམ་པའི་རྣམ་པར་བཤད་པའོ།། །།དེ་ལྟར་བསྐྱེད་པ་དང་གྲོགས་སྤྱོད་བསྟན་ཀྱང་། རྫོགས་རིམ་མ་བསྟན་ན་འགྲུབ་པར་ མི་འགྱུར་བས་དེ་བསྟན་ཏོ།།དེ་ནས་དཔལ་ལྡན་གོས་སྔོན་ཅན། །ཕྲ་མོའི་ཏིང་འཛིན་ལ་གནས་པ། །ཞེས་པ་ལ། དེ་ནས་ལེའུ་བཅུ་གསུམ་པ་སོང་བའི་རྟིང་དེ་ནས། ཡོན་ཏན་གཉིས་དང་ལྡན་པའི་གོས་སྔོན་ཅན་དེས། ཕྲ་མོའི་ཏིང་ངེ་འཛིན་ནི་དཔེའི་ཡེ་ ཤེས་དང་།ལས་དང་ལམ་གྱི་ཡེ་ཤེས་མ་ཡིན་ཏེ། འབྲས་བུ་ཕྱག་རྒྱ་ཆེན་པོ་ལ་གནས་ནས་ཞེས་བཤད་དོ། །ལམ་ཡང་མཚན་བཅས་དང་མཚན་མེད་དོ། །ཕྲ་མོ་སྟོང་ཉིད་གོམས་པའོ། །སྣང་བ་དངོས་སུ་མེད་པ་སྟེ། །སྣང་བ་སྟོང་པའི་རང་བཞིན་ནོ། །སྟོང་ལ་བདེ་བའི་རིག་ པའོ།།དེ་ནི་སྣང་བ་དངོས་སུ་བསྟན། །ཐབས་དང་ཤེས་རབ་ཟུང་དུ་འབྲེལ། །མི་རྟོག་སྤྲོས་བྲལ་གོམས་པ་ནི། །མཚན་མེད་ལམ་དུ་བསྟན་པ་ཡིན། །སྐྱེ་བ་རྨི་ལམ་བར་དོ་ནས། །སྲིད་པ་བར་དོ་གསུམ་དུའོ། །དེ་ཡང་མི་རྟོག་སྤྲོས་བྲལ་ལོ། །དེ་ནི་གསང་བའི་སྲིད་པའི་ ལུང་ལས།།སྲིད་གསུམ་རང་བཞིན་འཕོ་བ་ཡང་། །འབྲས་བུ་ཡང་དག་འབྱིན་པ་སྟེ། །འདི་ནི་རྣམ་ཤེས་འཕོ་འཇུག་གོ། །མཚན་བཅས་ཀུན་བརྟགས་རྩ་རླུང་གི། །འཁོར་གྱི་གནོད་སྦྱིན་མང་པོ་ཀུན། །ཤིན་ཏུ་ཡིད་དགའ་དང་བས་ཞུས། །ཞེས་པ་ལ། འཁོར་གྱི་གནོད་ སྦྱིན་མང་པོ་ཀུན་ནི་གནོད་སྦྱིན་དུ་མའོ།།གོང་དུ་བསྟན་པའི་ཏིང་ངེ་འཛིན་ལ་དགའ་ནས། འཁོར་གྱི་ནང་ནས་རྣམ་པར་རྒྱལ་བཞེས་བྱའོ། །ཕྲ་མོ་ཐིག་ལེ་ཆེན་པོ་ཡིས། །ཅིར་སྣང་དངོས་པོ་གཅིག་ཏུ་འདུས། །དེ་ཉིད་མཐའ་འདས་རང་བཞིན་མེད། །ཅེས་པ་ལ། ཕྲ་མོ་ ཐིག་ལེ་ཆེན་པོ་ནི།།སྤྱི་བོ་དང་ནི་མགྲིན་པ་དང་། །སྙིང་ག་དང་ནི་ལྟེ་བ་དང་། །གཏུམ་མོ་རླུང་གི་འཁོར་ལོ་རྣམས་སོ། །རང་འབྱུང་གི་ཡི་གེ་གནས་པ་ནི་ཐིག་ལེའོ། །ཕྲ་བ་ནི་ཨཱ་ལི་དང་ལྡན་པའི་རྩ་ལ་རླུང་བུས་ཏེ། ཐིག་ལེ་ལས་མེ་འབར་ཏེ་བདེ་བ། ཤིན་ཏུ་བདེ་བ། མཆོག་ཏུ་བདེ་བ་བསྐྱེད་པ་ནི་ཕྲ་བའོ། །ཏིང་ངེ་འཛིན་དེ་ལ་མིང་དེ་ཡོད་པས་དེ་སྐད་ཅེས་བྱའོ། །ཅི་སྣང་དངོས་པོ་ནི་ཀུན་དུ་རྟོག་པ་ཐམས་ཅད་འབར་བ་སྟོང་པ་ཉིད་དུ་ཞུ་ཞེས་པའོ། །དེ་ཉིད་མཐའ་འདས་ནི་ལམ་ཆོས་ཀྱི་ཕྱག་རྒྱ་འོད་གསལ་ཉམས་སུ་བླངས་པས་དེ་ནི་ལམ་གྱི་འོད གསལ་ཞེས་བྱའོ།།རང་བཞིན་མེད་ནི་འབྲས་བུ་ཆོས་ཀྱི་སྐུ་ཐོབ་པའོ། །དངོས་པོ་མཐའ་དང་། བྲལ་བས་རང་བཞིན་མེད་ཅེས་བྱའོ། །ཡུམ་ལྕང་ལོ་ཅན་ལ། སྤྲུལ་པ་བདེ་ཆེན་ལོངས་སྤྱོད་ཆོས། །རླུང་དང་མེ་ལ་རབ་གནས་པས། །མཐའ་འདས་རང་བཞིན་ཆོས་སྐུ་ཐོབ། །ཅེས་ གསུངས་སོ།།དེ་ནས་དཔལ་ལྡན་གོས་སྔོན་ཅན། །བླ་མེད་རྫོགས་པའི་ཀློང་ཆེན་དུ། །འདོད་ཆགས་ཏིང་འཛིན་ལ་གནས་པ། །ཞེས་པ་ལས། སེམས་ཅན་ཆགས་པ་ཅན་དྲངས་པའི་ཕྱིར། །ཐབས་དང་ཤེས་རབ་ཀྱི་སྤྱོད་པ་བསྟན་ཏེ། རི་རབ་ཀྱི་རྩེ་ལ་ དཔལ་ལྡན་གོས་སྔོན་ཅན་ནི་ཁྲོ་མོ་རྡོ་རྗེ་སྲེག་མ་དང་སྙོམས་པར་ཞུགས་པའི་ཚུལ་བསྟན་ཏོ།།སངས་རྒྱས་གོས་སྔོན་ཅན་ནི་རྡོ་རྗེ་གསང་བ་མོ་དང་སྙོམས་པར་ཞུགས་སོ། །རིན་པོ་ཆེའི་མཚན་གོས་སྔོན་ཅན་ནི་རྡོ་རྗེ་ཞི་བ་མོ་དང་སྙོམས་པར་ཞུགས་སོ། །པདྨ་གོས་སྔོན་ཅན་ནི་ཁྲོ་མོ་ དག་བྱེད་མ་དང་སྙོམས་པར་ཞུགས་སོ།།ལས་ཀྱི་གོས་སྔོན་ཅན་ནི་རྡོ་རྗེ་རྒྱལ་བ་མོ་དང་སྙོམས་པར་ཞུགས་སོ། །དེ་དགའ་བ་བཞི་རྣམ་པར་དག་པ་སྐྱེ་བའི་ཚུལ་བསྟན་ཏེ། དེ་ནི་འདོད་པ་ལ་ཞེན་པ་རྣམས་རབ་ཏུ་འཇོམས་པའོ། །ལུང་ལས་རྡོ་རྗེ་ཁྲོ་བོ་རྣམས་དང་སྦྱོར། །གཞན་ལ་བདེ་བ་འཕྲོ་ འདུ་བྱ།།འོ་དང་འཁྱུད་པ་ལ་སོགས་པ། །དགའ་བཞིའི་ཚུལ་དང་ཡང་དག་ལྡན། །དེས་ཀྱང་རྣམ་པར་གྲོལ་བར་འགྱུར། །ཞེས་པའོ། །འཁོར་གྱི་གནོད་སྦྱིན་མང་པོ་ཀུན། །གནས་དང་དུས་དང་རྒྱལ་བ་ལས། །ཞེས་པ་ལ། འཁོར་གྱི་གནོད་སྦྱིན་མང་པོ་ཆགས་པ་དང་བྲལ་བའི་ རིགས་སོ།།དེ་ལྟ་བུའི་སྤྱོད་པས་སངས་རྒྱས་མཐོང་བས་འདི་ནི་ཐ་མལ་པ་སྤྱོད་པའི་འཁོར་བའི་ལམ་ཞེས་སྨྲ་ཞིང་སྔངས་པ་དང་། དུས་ཐོབ་པའི་ཐབས་མེད་དོ་ཞེས་ཟེར་ནས་བརྒྱལ་བའོ། །བསླང་སྟེ་བླ་མེད་དོན་བསྟན་པས། །ཐམས་ཅད་འདོད་ཆགས་མངོན་སངས་རྒྱས། །ཞེས་ པ་ལ།བཾ་སཾ་ས་མ་ཡ་ཧོ། །ཞེས་བརྗོད་ནས་བརྒྱལ་བ་ཀུན་བསླངས། བླ་ན་མེད་པ་ཕོ་ཉའི་ལམ་དགའ་བ་བཞི་དངོས་པོ་ལམ་སྟོང་པ་ཉིད་བཞི་ལམ་ལ་བཙུད་པས་ཆགས་པ་དང་བྲལ་བའི་གནོད་སྦྱིན་ཀུན་ཕོ་ཉའི་ལམ་ལས་སངས་རྒྱས་ཤིང་འབྲས་བུ་ཐོབ་བོ། །དེས་ན་འདོད་ཆགས་མངོན་ སངས་རྒྱས་ཞེས་བྱའོ།།འཁོར་གྱིས་སྐུ་ལ་བསྟོད་པ་ནི། །འཁོར་ལྷག་མ་རྣམས་ཡི་རངས་ཏེ། །བསྟོད་པ་གསུངས་པ་ཀྱེ་ཧོ་ཞེས་གཙོ་བོ་ཡེ་ཤེས་ལ་བསྟོད་དོ། །དེ་ནས་བསྟོད་པ་བཞིའི་ངོ་བོས་རྟོགས་པ་ཐམས་ཅད་འདག་པ་སྟེ། བསྟོད་པ་གཅིག་ནི་རྩ་བ་ན་གསལ་བས་མ་བྲིས་སོ། །སྙོམས་ བར་འཇུག་པ་ནས་ཐབས་དང་ཤེས་རབ་ཟུང་དུ་འབྲེལ་པའི་མངོན་ཤེས་སེལ་བའི་འདོད་ཆགས་ནི།སངས་རྒྱས་བྱང་ཆུབ་སེམས་དཔའི་ལམ། །བསྟོད་པའི་གནས་སུ་འདི་གསུངས་སོ། །ཞེས་པའོ། །ལེའུ་བཅུ་བཞི་པ་ནི་གྲངས་ཀྱི་བཅུ་བཞི་པའོ། །ལག་ན་རྡོ་རྗེ་རྩེ་བའི་རྒྱུད་རྒྱ་ཆེར་བཤད་པ་ལས་ལེའུ་བཅུ་བཞི་པའི་བཤད་པའོ།། །། དེ་ནས་འདུས་པའི་འཁོར་རྣམས་ཞེས་པ་ནས་འཁོར་གྱིས་གཙོ་བོ་ལ་བསྟོད་པ་ནས་བླ་མེད་སྐྱབས་མཛད་ཀྱི་བར་ལ། ཁམས་གསུམ་རྣམ་པར་རྒྱལ་བ་ལ་སོགས་པས་གཙོ་བོ་ལ་བསྟོད་པ་བསྟན་ཏེ། ཉམས་སུ་བླང་བ་མེད་པའི་ཕྱིར་དང་། གཙོ་བོ་ལ་མོས་པའི་ཕྱིར་དང་། ཚིག་དོན་ཡིན པས་རྒྱུད་དངོས་སུ་བསྟན་པས་བཤད་པ་ནི་མ་བྱས་སོ།།ཡི་རང་བ་ནི་སྟོན་པའི་ཆོས་གསུམ་དུ་བསྟན་པ་ལ་མོས་པས་ཡི་རང་བ་སྟེ། ལྷ་དང་ཀླུ་དང་ལྷ་མ་ཡིན་ལ་སོགས་པ་ཡང་ཡིད་དགའ་བའི་མཆོད་པས་ཁྱབ་པར་གྱུར་ཏོ་ཞེས་བྱ་བ་ལ། ལྷ་ནི་ཚངས་པ་དང་། པཉྩི་ཀ་ལ་སོགས་པའོ། ། ཀླུ་ནི་དགའ་བོ་ལ་སོགས་པའོ། །ལྷ་མ་ཡིན་ནི་ཐགས་བཟངས་ལ་སོགས་པའོ། །མིའམ་ཅི་ནི་རྟ་མགོ་ཅན་དང་། དྲི་ཟ་དང་། སྲིན་པོ་དང་། ནམ་མཁའ་ལྡིང་དང་། ལྟོ་འཕྱེ་ཆེན་པོ་ལ་སོགས་པ་རྣམས་བྱང་ཆུབ་སེམས་དང་ལྡན་ཞིང་། སྟོང་པ་ཉིད་ཀྱི་དོན་ཟབ་མོ་ལ་མོས་པའོ། ། མི་ལ་སོགས་པ་ཐམས་ཅད་འཇིག་པའི་རྟེན་དང་ལྡན་པ་ཐམས་ཅད་བདེ་བ་ལ་བཀོད་དོ་ཞེས་བྱ་བ་ལ། རི་རབ་ཀྱི་རྩེ་ལ་རྒྱུད་འདི་བཤད་པས། དེའི་བྱིན་གྱི་རླབས་ཀྱིས། མི་དང་ལྷ་དང་ཀླུ་དང་ལྷ་མ་ཡིན་ལ་སོགས་པ་རྣམས་ནད་ལས་གྲོལ་བར་གྱུར་ཏོ། །བདེ་གཤེགས་ཞལ ནས་གསུངས་པའི་རྒྱུད་རྣམས་ལ།།བཤད་ཅིང་མན་ངག་འགྲེལ་པར་བྱས་པ་རྣམས། །ཀུན་ལ་དོན་དང་ངག་གི་སྐྱོན་རྣམས་ཡོད་པ་སྟེ། །བཟང་པོར་སེམས་ཀྱང་སྐྱོན་ཏེ་དེ་ནི་རང་གི་ཁེངས་པའི་སེམས། །དཔེར་ན་འདམ་གྱི་སེང་གེ་སེང་གེ་ཡིན་ཞེས་ཉ་རྣམས་སྨྲ། ཞེས་ པ་ལྟ་བུའོ།།དེས་ན་འདིར་ནི་རྒྱུད་ཀྱི་དགོངས་པ་ལ། སྐྱེས་དང་ལྷག་པའི་མཐོང་ལས་ཚོགས་པ་གསུམ་དུ་འདུས། བསྐྱེད་པའི་རྒྱས་པ་བསྡུས་དང་ཤིན་ཏུ་བསྡུས་པར་གསུངས། །དེ་ཡང་། རིམ་གྱིས་བསྐྱེད་དང་ཅིག་ཅར་གྱིས། །གང་ཟག་བློ་ཡིས་རིམ་པར་གསུངས། ། རྫོགས་པ་གཉིས་སུ་བསྟན་པ་ཡང་། །མཚན་བཅས་དང་ནི་མཚན་མེད་དོ། །མཚན་བཅས་ཀུན་བརྟགས་ལམ་དུ་བྱེད། །རྩ་རླུང་བྱང་ཆུབ་སེམས་ཀྱིས་སུ། །རིམ་གྱིས་ཡེ་ཤེས་སྐྱེ་བར་འདོད། །མཚན་མེད་ཉམས་སུ་སྐྱེ་ལུགས་ཀྱང་། །མི་རྟོག་སྟོང་པ ཉམས་སུ་བླང་།།སྟོང་པས་སྟོང་པ་གོམས་པར་བྱེད། །སྐད་ཅིག་གོམས་སོགས་སྤངས་པ་ཡིས། །ལམ་ལྔ་དང་ནི་ལམ་གཉིས་བགྲོད། །འདི་ཡང་གསང་སྔགས་འབྲས་བུ་ལམ། །དྲི་བཅས་དང་ནི་དྲི་མ་མེད། །འདི་ནི་ཐར་པའི་ལམ་ལ་གནས། །དྲི་བཅས་དཔེ་ཡི་ཡེ་ ཤེས་ཚོལ།།དྲོད་དང་རྩེ་མོ་ཆོས་མཆོག་རྣམས། །མ་རྟོགས་མཐོང་ལམ་སྐྱེ་བ་མེད། །མཐོང་ལམ་སྐད་ཅིག་བཅུ་དྲུག་གིས། །མཐོང་སྤངས་ཉོན་མོངས་སྤོང་བར་བྱེད། །གཉེན་པོ་ཡེ་ཤེས་བཅུ་དྲུག་གོ། །ཉི་མ་གྲིབ་མ་ཚུལ་དུ་སྤོང་། །ཆོས་ནི་སྣང་བར་གསལ་བའོ། ། སྐད་ཅིག་ཕྱི་མ་སྣང་བ་མཆེད། །མཐོང་ལམ་ཡེ་ཤེས་མ་མཐོང་མཐོང་། །སྣང་བ་སྟོང་པར་ཐོབ་པའོ། །དྲོད་རྩེ་ལ་སོགས་གཉིས་ཀྱི་རྟེན། །ངེས་པར་བྱེད་པའི་ཆ་བརྒྱད་པོས། །སྒོམ་པ་སྤོང་བའི་ཉོན་མོངས་སྤོང་། །འདི་ནི་དྲོད་སྤང་བསྒོམ་པའི་ལམ། །རྒྱུ་ཡི་ཐེག་པར་རབ་བསྟན པའི།།ལམ་ལྔ་རིམ་གྱིས་བགྲོད་མི་དགོས། །འདི་རུ་ལམ་ལྔ་གསུངས་པ་ཡང་། །ཡེ་ཤེས་སྐྱེ་བའི་བགྲོད་ཚུལ་ལོ། །གྲོགས་ནི་ཚོགས་ཀྱི་གཏོར་མ་དང་། །སཱཙྪ་ཀློག་འདོན་ལ་སོགས་པ། །ཞི་གནས་ལྷག་མཐོང་སྐྱེ་བའི་རྒྱུ། །རྒྱུ་ལ་མ་བརྟེན་འབྲས་མེད། །དཔེར་ ན་ནམ་མཁའི་མེ་ཏོག་བཞིན།།འབྱུང་ངོ་ཞེ་ན་ཀུན་བརྟགས་འགྱུར། །དེ་ནི་མི་རིགས་སྨྲ་བ་སྟེ། །རི་བོང་རྭ་སོགས་ཚང་འཇལ་བཞིན། །ལེགས་པར་བསྟན་ཀྱང་དོན་མེད་འགྱུར། །ཡང་གསུངས་པ། རྒྱུ་ལས་འབྲས་བུ་འབྱུང་བ་མེད། །རྒྱུ་ལས་འབྲས་བུ་དངོས་ཡོད་ན། ། རྒྱུ་ལས་འབྲས་བུ་རྟོགས་པར་འགྱུར། །གལ་ཏེ་རྒྱུ་ཡིས་འབྲས་བསྐྱེད་ན། །འབྲས་བུ་དུས་སུ་རྒྱུ་མེད་པས། །རྒྱུ་འབྲས་ལྷན་ཅིག་མི་གནས་པས། །ཕན་ཚུན་སྤངས་པ་མི་གནས་འགྱུར། །ཡང་གསུངས་པ། རྒྱུ་ཡང་མཐོང་ལམ་ཡེ་ཤེས་ཏེ། །དེ་བསྒོམས་མཐར་ཕྱིན འབྲས་བུའོ།།སྟོང་ཉིད་བདེ་བའི་ཡེ་ཤེས་དང་། །སྐད་ཅིག་གོམས་སོགས་ཉམས་བླངས་པས། །རྒྱུ་འབྲས་གཉིས་མེད་བགྲོད་པ་ནི། །འབྲས་བུ་གསང་སྔགས་ཐོབ་ལུགས་སོ། །སྐད་ཅིག་གོམས་པ་རྒྱུ་ཡིན་ཏེ། །གོམས་པ་མཐར་སྔོན་རྟོགས་པའོ། །རྒྱུ་ལས་རྟེན་ བྱུང་ཤུགས་ཀྱིས་རྟོགས།།དེ་ནི་དངོས་མེད་འབྲས་བུའོ། །ཁོ་བོ་གཞུང་གིས་དེ་སྐད་སྨྲས། །ཡང་གསུངས་པ། བདེན་པ་གཉིས་སུ་རབ་བསྟན་པ། །བློ་ཡི་རྟོགས་ཚུལ་བྱེ་བྲག་གོ། །གཉིས་བྲལ་ཡང་དག་རྟོགས་ཚུལ་ནི། །བླ་མེད་དོན་ལ་གནས་ཞེས་གསུངས། ། དེས་ནི་རྒྱུད་ཀྱི་སྡོམ་ཚིག་ནི། །གཉིས་དང་གསུམ་དུ་འདུས་པར་གསུངས། །བདག་འདྲ་དམན་པའི་གང་ཟག་གིས། །ས་མ་ནོན་ཅིང་ཡི་དམ་ཞལ་མ་མཐོང་། །ཡང་སྤྲུལ་མཁའ་འགྲོ་རྣམས་དང་བདེ་གཤེགས་ལམ། །རང་ཉིད་གོས་སྔོན་ཅན་ལ་མོས་པ་ཡིས། །རང་ལ་བརྟེན དང་ཐར་པའི་ལམ།།རང་བས་བློ་ཞན་རྣམས་ལ་ཕན་པར་བྱ་ཕྱིར་དང་། །དུས་གསུམ་སངས་རྒྱས་ཐམས་ཅད་ཀྱི། །དགོངས་པ་མ་ཆད་བྱ་ཕྱིར་དང་། །སྙིང་རྗེ་གཉིས་མེད་སོགས་ཀྱི་མཚམས། །མན་ངག་ཚིག་དོན་རྒྱས་པར་བསྟན། །ཚིག་ལ་ཉེས་པ་མེད་དེ་སྔ་མ་སྔ་དང་གསང་ སྔགས་དག་ཏུ་སྦྱར།།དེ་གཞན་མེད་དེ་འདི་ལ་དགའ་བ་སྐྱེས། །གལ་ཏེ་བདག་གིས་ཁྲོ་ཚིག་དང་། །དོན་ལ་ཉེས་པ་ཤོར་སྲིད་ན། །དུས་གསུམ་རིགས་ལྔའི་བདེ་བར་གཤེགས་པ་དང་། །མཁས་ཤིང་ཤེས་པ་རྣམས་ལ་བཟོད་པར་གསོལ། །དད་པ་ཆེ་ལ་གྱོང་ཁེངས་མེད། ། སྒང་བུ་དམའ་ལ་འགྲོ་དོན་རྩོམ། །སྙིང་རྗེ་ཤེས་རབ་ཆེ་རྩོམ་ཞིང་། །གསང་སྔགས་ཆོས་དང་བླ་མ་ལ་ནི་གུས། །དབང་བསྐུར་ཐོབ་ཅིང་དམ་ཚིག་ལྡན་སོགས་པ། །དེ་ལ་གོང་མའི་མན་ངག་རྒྱུན་མ་ཆད་པར་སྦྱིན། །དེ་མ་བྱིན་ན་གསང་སྔགས་དམ་ཚིག་ཉམས། །ཡང་གསུངས པ།རྫོགས་ལྡན་དུས་ཀྱི་ཐ་མ་ལ། །རྩ་བ་དང་ཆད་སྙིང་རྗེ་བྲལ། ཁྭ་ལྟར་མུ་ཅོར་སྨྲ་ཞིང་གསང་སྔགས་ཕྲག་ཁྱེར་བ། །དེ་ལ་སོགས་པ་གང་ཟག་རྣམས་ལ་ནོར་ལ་བལྟས་ཏེ་བྱིན། །འཕེན་བྱེད་ལས་ཀྱིས་འཕངས་ན་རྡོ་རྗེ་དམྱལ་བར་སྐྱེ། །རྫོགས་བྱེད་ལས་ཀྱིས་ངན་སོང་ གསུམ་དུ་འཁོར།།ཞེས་རྒྱུད་ནས་གསུངས་སོ། །མནར་མེད་ངན་སོང་དུ་སྐྱེ་འབྲས་བུ་ཚ་གྲང་སྡུག་བསྔལ་མྱོང་། །ཐབས་དང་ཤེས་རབ་ཟུང་འབྲེལ་བའི། །ཉི་ཟླ་ལྟ་བུའི་དམ་ཆོས་འདི། །བདེན་པ་གཉིས་དང་མི་འགལ་གསང་སྔགས་འབྲས་བུའི་ལམ། །ཆོས་ འདི་ལེགས་པར་བྲིས་པས་ཁམས་གསུམ་སེམས་ཅན་རྣམས།།དྲོད་དང་རྩེ་མོ་བཟོད་པའི་ཆོས་ཀྱི་རྩེ། །ཡེ་ཤེས་བཞི་ཡི་ཚུལ་གྱིས་ཉོན་མོངས་སྡུག་བསྔལ་ཞི། །མཐོང་སྒོམ་སྒྲིབ་པ་རྣམས་དང་བྲལ་བ་དང་། །སྡུག་བསྔལ་གསུམ་དང་བརྒྱད་དང་ཡོངས་བྲལ་བའི། །མཛེ་ འབྲས་ནད་དང་བཞི་བརྒྱ་རྩ་བཞི་སོགས།།སྡུག་བསྔལ་རབ་ཞི་མྱུར་དུ་བདེ་བར་ཤོག་།བདག་དང་ཁམས་གསུམ་སེམས་ཅན་རྣམས། །སྡུག་བསྔལ་མ་ལུས་རབ་ཞི་ནས། །གོས་སྔོན་དངོས་གྲུབ་ཐོབ་པར་ཤོག་།འཕགས་པ་གོས་སྔོན་པོ་ཅན་གྱི་རྩ་བའི་རྒྱུད་ཀྱི་འགྲེལ་པ་ རྫོགས་སོ།། །།སྐྱེ་བ་ལྔ་བརྒྱར་བློ་རབ་སྦྱངས། །སྔགས་ཀྱི་ཐེག་པའི་བསྟན་བཅོས་འདི། །དབུ་མའི་ལྟ་བ་ཡང་དག་སྟེ། །མཁས་བཙུན་རྣམས་ཀྱིས་ཡོངས་སུ་གཟུང་། །སྒྲོལ་མ་གསལ་བ་ཞེས་བྱ་བའི་འགྲེལ་པ་དགེ་སློང་ཀླུའི་བྱང་ཆུབ་ཀྱིས་མཛད་པ་རྫོགས་སོ།། །།